Вы тут

У Гомелі вялікая вада пачала здаваць пазіцыі


У горадзе над Сожам вялікая вада пачала патроху здаваць пазіцыі. За суткі яе ўзровень у рацэ ў раёне горада ўпаў на пяць сантыметраў і цяпер складае пяць метраў. Між тым з-за паводкі даволі напружанай застаецца сітуацыя ў раёне вуліцы Палявой, што ў прыватным сектары Якубоўкі Навабеліцкага раёна Гомеля. Вада з поймы Сажа тут перамясцілася на агароды, падворкі, дамы. Падтоплена і частка дарогі. Для бяспекі руху людзей арганізаваны мабільны пост ратавальнікаў з плаўсродкамі, ажыццяўляецца перавозка грамадзян па вуліцы.


Дапамога такога «воднага таксі» на гэтым участку Гомеля — асабліва важная і папулярная сярод мясцовых школьнікаў, навучэнцаў і студэнтаў. У самым глыбокім месцы падтопленага ўчастку дарогі — амаль паўтара метры. Па вуліцы можна прайсці ў высокіх рыбацкіх ботах ці скарыстацца ўласнай лодкай. Не ўсе гатовы да такога выпрабавання, і ў любым выпадку з вялікай вадой лепш не жартаваць і абавязкова захоўваць усе меры бяспекі.

Ужо на пачатку восьмай гадзіны раніцы, калі значная колькасць мясцовых жыхароў дабіраюцца на работу і вучобу, супрацоўнікі МНС гатовы прымаць заяўкі на перавозку людзей на лодцы. Ратавальнікі адпраўляюцца па адрасах, дзе іх чакаюць грамадзяне.
«Праблем ніякіх няма. Мы не хвалюемся і з’язджаць не плануем», — так у асноўным рэагуюць на чарговыя выклікі паводкі жыхары Палявой.

— Нармальна гэта ўспрымаем. Усе ведаюць, што паводка, і нічога такога страшнага, нават «прыкольна» — плывеш на лодцы з самай раніцы, свежым паветрам дыхаеш, — з пазітыўным настроем пра жыццё на падтопленай вуліцы распавёў мясцовы жыхар навучэнец аднаго з гомельскіх каледжаў Антон Самадзед.

Юнак не менш чым два разы на дзень пераадольвае на лодцы ратавальнікаў «вулічную акваторыю». Ён нават з гонарам зазначае, што іх Якубоўка — знакамітая «гомельская Венецыя».

— Людзі пабудавалі дамы, і многія ведалі, што бываюць падтапленні. Проста апошнія гады такая моцная паводка, і нават двойчы — зімой і вясной. Цяпер не зразумець, ці будзе яшчэ паводка ў красавіку, як звычайна, ці гэта ўжо ўсё і вада будзе сыходзіць, — падзялілася турботамі мясцовых жыхарка Палявой Марына Мельнік.

Пры любым развіцці паводкавай сітуацыі на гэтым участку горада супрацоўнікі Гомельскага абласнога ўпраўлення МНС гатовы адрэагаваць аператыўна. На сёння з-за падтаплення вуліцы Палявой у Гомелі ўведзены рэжым павышанай гатоўнасці функцыянавання гарадскога звяна Дзяржаўнай сістэмы папярэджання і ліквідацыі надзвычайных сітуацый.

— За час работы мабільнага паста МНС па вуліцы Палявой у Гомелі перавезена 115 чалавек, у тым ліку 9 дзяцей, — адзначыў афіцыйны прадстаўнік Гомельскага абласнога ўпраўлення МНС Ягор Пасканный. — На дадзены момант адселены два жыхары вуліцы Палявой. Дамы і падворкі іх не падтопленыя, але гэтыя людзі — інваліды, маюць праблемы з апорна-рухальным апаратам. Між тым у цэлым у Гомельскай вобласці падрыхтавана каля 200 месцаў часовага адсялення для грамадзян, якія пражываюць на тэрыторыях, падтопленых паводкавымі водамі, — звярнуў увагу афіцыйны прадстаўнік Гомельскага абласнога ўпраўлення МНС.

Па яго словах, рэжымы павышанай гатоўнасці функцыянавання раённых звёнаў Дзяржаўнай сістэмы папярэджання і ліквідацыі надзвычайных сітуацый на Гомельшчыне ўведзены таксама ў Гомельскім і Веткаўскім раёнах.

— Акрамя таго, для аказання дапамогі насельніцтву па заяўленчым прынцыпе працуе мабільны пост супрацоўнікаў МНС у вёсцы Верхнія Жары Брагінскага раёна, — дадаў Ягор Пасканный.

Па апошняй аператыўнай інфармацыі Гомельскага абласнога ўпраўлення МНС, у Гомельскай вобласці талымі і паводкавымі водамі застаюцца падтопленыя 37 участкаў дарог, 134 жылыя дамы, 26 падвалаў жылых дамоў, 456 падворкаў, 213 гаспадарчых пабудоў і 135 іншых будынкаў.

Наталля КАПРЫЛЕНКА

Фота БелТА 

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі?