Вы тут

На выхадныя прыгрэе, а з панядзелка зноў «запахне» зімой


Пад уплывам мяккай Атлантыкі ў першай палове лютага ў нашай краіне адзначалася не па сезоне цёплае, а ў паўднёвых раёнах вельмі цёплае надвор’е. Пры гэтым акіянічнае паветра і ападкі ў выглядзе дажджу сталі прычынай знікнення снежнага покрыва. Не прадбачыцца асаблівых змяненняў ва ўмовах надвор’я і да канца гэтага тыдня, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.


Фота pexels.com

У пятніцу ўмовы надвор’я ў нашай краіне будзе вызначаць вільготная паветраная маса. Воблачна з праясненнямі. Месцамі, пераважна па поўначы краіны, пройдуць ападкі ў выглядзе снегу, мокрага снегу, днём снегу з дажджом. Ноччу і раніцай месцамі чакаецца туман, слабы галалёд. На асобных участках дарог галалёдзіца. Вецер паўднёвы слабы да ўмеранага. Тэмпература паветра ўначы складзе ад 6 марозу па паўночным усходзе да 3 цяпла па захадзе краіны. Максімальная тэмпература днём будзе ад нуля да плюс 6 градусаў, па захадзе Беларусі яна складзе 7–11 цяпла. Атмасферны ціск істотна не зменіцца.

Амаль вясновае надвор’е нас чакае ўжо ў суботу. У гэтыя суткі ноччу наша краіна ў асноўным будзе знаходзіцца ў полі павышанага атмасфернага ціску, раніцай і днём умовы надвор’я будуць вызначаць франтальныя раздзелы, якія ссоўваюцца з боку Заходняй Еўропы. Воблачна з праясненнямі. Ноччу пераважна без ападкаў, раніцай і днём на большай частцы тэрыторыі краіны пройдуць кароткачасовыя ападкі, у асноўным дождж. Ноччу і раніцай у асобных раёнах слабыя туман і галалёд, на дарогах галалёдзіца. Вецер паўднёвай чвэрці ўмераны, днём парывісты. Нават тэмпература паветра ўначы будзе пераменлівая — ад мінус 2 градусаў да 4 цяпла. Шырокая хваля станоўчых тэмператур чакаецца менавіта днём у суботу, калі тэмпература будзе ад плюс 1 градуса па поўначы да 10 цяпла па паўднёвым захадзе краіны.

У нядзелю ноччу захаваецца ўплыў атмасферных франтоў, якія ссоўваюцца на тэрыторыю Расіі, а днём тэрыторыя краіны апынецца ў вобласці павышанага атмасфернага ціску. Пераменная воблачнасць. Ноччу амаль паўсюдна чакаюцца кароткачасовыя ападкі ў выглядзе мокрага снегу і дажджу, а днём пераважна без ападкаў. На асобных участках дарог галалёдзіца. Вецер паўночна-заходні ўмераны, уначы месцамі парывісты. Тэмпература паветра ўначы ўжо ад мінус 3 градусаў да плюс 4 градусаў, а максімальная днём будзе ад 2 марозу па паўночным усходзе да 5 цяпла ў заходніх і паўднёвых раёнах краіны.

Згодна з папярэднім прагнозам айчынных сіноптыкаў, у пачатку наступнага тыдня на тэрыторыю нашай краіны пачне паступаць больш свежае паветра. Тэмпературны фон па краіне пачне паніжацца, і зноў «запахне» зімой.

У панядзелак будзе пераважна без ападкаў, толькі днём па крайнім захадзе краіны магчымыя невялікія кароткачасовыя ападкі ў выглядзе мокрага снегу і дажджу. На асобных участках дарог галалёдзіца. Уначы тэмпература панізіцца да мінус 1–8 градусаў, а пры праясненнях — да мінус 12 градусаў. Днём прагназуецца мінус 3 — плюс 4 градусы.

Ужо ў аўторак холад амаль адпусціць. Ноччу месцамі, а днём на большай частцы тэрыторыі краіны пройдуць кароткачасовыя ападкі ў выглядзе снегу, мокрага снегу, а днём з дажджом. У асобных раёнах слабыя туман і галалёд, на дарогах галалёдзіца. Уначы прагназуецца ад нуля да мінус 7 градусаў, а ўдзень — мінус 2 — плюс 5 градусаў.

Яшчэ цяплей будзе ў сераду. Ноччу на большай частцы тэрыторыі, днём месцамі па краіне чакаюцца кароткачасовыя ападкі (снег, мокры снег, дождж). У асобных раёнах слабыя туман і галалёд, на дарогах галалёдзіца. Уначы сіноптыкі абяцаюць ад мінус 5 да плюс 2 градусаў, а ўдзень ад мінус 1 градуса да 6 цяпла.

Сяргей КУРКАЧ

Выбар рэдакцыі

Грамадства

Больш за 100 прадпрыемстваў прапанавалі вакансіі ў сталіцы

Больш за 100 прадпрыемстваў прапанавалі вакансіі ў сталіцы

А разам з імі навучанне, сацпакет і нават жыллё.

Эканоміка

Торф, сапрапель і мінеральная вада: якія перспектывы выкарыстання прыродных багаццяў нашай краіны?

Торф, сапрапель і мінеральная вада: якія перспектывы выкарыстання прыродных багаццяў нашай краіны?

Беларусь — адзін з сусветных лідараў у галіне здабычы і глыбокай перапрацоўкі торфу.

Грамадства

Адкрылася турыстычная выстава-кірмаш «Адпачынак-2024»

Адкрылася турыстычная выстава-кірмаш «Адпачынак-2024»

«Мы зацікаўлены, каб да нас прыязджалі».