Вы тут

Што прапануе пакупнікам Першы нацыянальны гандлёвы дом


Будынак, дзе размясціўся «Першы нацыянальны гандлёвы дом», яшчэ нядаўна быў вядомым сталічным даўгабудам. Згодна з першапачатковай задумкай, гэта павінен быў быць «Магніт Мінска», будаваць які пачалі яшчэ ў 2009-м. Але праект так і адышоў у нябыт, і ў рэшце рэшт даўгабуд атрымаў «другое нараджэнне». Ён завершаны за кошт бюджэту, і цяпер гэта «Першы нацыянальны гандлёвы дом», які сабраў пад сваім дахам самыя яркія і значныя айчынныя брэнды. На верхніх паверхах будынка будуць кватэры, унізе — паркінг. Ну, а Першы нацыянальны гандлёвы дом, вітрына найлепшай прадукцыі кожнага з рэгіёнаў нашай краіны, адкрыўся 29 снежня, на тры дні раней за заяўлены тэрмін. У адкрыцці прымаў удзел Прэзідэнт Беларусі.


Для тых, хто шануе якасць

Мультыбрэндавая падача айчынных тавараў пакупніку — адна з ключавых тэндэнцый апошніх гадоў. Аб гэтым не раз і летась, і пазалетась казала, у прыватнасці, кіраўніцтва галіны лёгкай прамысловасці.

— Адзін з новых кірункаў развіцця менавіта падачы нашых тавараў пакупніку — мультыбрэндавыя прасторы. Гэта, напрыклад, сетка «Да дому», дзе прадстаўлена прадукцыя мноства прадпрыемстваў краіны, аб’яднаная агульнай канцэпцыяй дамашняй утульнасці. Мультыбрэндавыя крамы пад сваёй маркай адкрываюць «Conte», «Світанак» — там яны рэалізуюць прадукцыю і іншых беларускіх прадпрыемстваў, — адзначала ў інтэрв’ю «Звяздзе» намеснік старшыні канцэрна «Беллегпрам» Наталля Мурашка.

Тэндэнцыя актуальная і для іншых сфер — ад прадуктаў харчавання да мэблі. І «Першы нацыянальны гандлёвы дом» (133 гандлёвыя пляцоўкі: фірменныя крамы, кафэ, бытавыя аб’екты) — якраз маштабная рэалізацыя гэтай канцэпцыі. Гэтыя 133 гандлёвыя аб’екты размешчаны на трох паверхах, а каб у пакупніка «не разбегліся вочы», крамы згрупаваны па рэгіёнах: другі паверх (куды трапляеш з галоўнага ўвахода) — Віцебская і Магілёўская вобласці (і частка брэндаў Міншчыны), трэці — Брэст, Гродна, Гомель, першы (цокальны) паверх — ізноў жа, сталічная вобласць. 91 крама нехарчовых тавараў, 27 — тавараў харчовых, 5 кафэ і рэстаранаў і 10 аб’ектаў аказання паслуг. Каля ўвахода можна азнаёміцца як з падрабязным планам гандлёвага дома, так і з планам размяшчэння крам па кожным з рэгіёнаў.

Знаходзіцца «Першы» праз дарогу ад «Dana Mall», але канкурэнцыі не баіцца.

— «Дана Мол» нам не канкурэнт, — усміхаецца прадавец Юлія. — Ён прывабны ў першую чаргу для моладзі. Людзі больш дарослыя, умудроныя вопытам, упэўнена, прыйдуць да нас. Бо з вышыні пражытых гадоў вучышся шанаваць якасць. А беларуская прадукцыя і якасць — сінонімы.

Зрэшты, моладзі сярод наведвальнікаў новага ГЦ таксама дастаткова, прычым нават у 10 гадзін раніцы ў суботу (вырашыла прыехаць да адкрыцця ў надзеі, што большасць будзе спаць даўжэй — але памылілася).

— Сёння раніцай пакупнікоў няшмат, — адзначае суразмоўніца. — Вось у першыя дні пасля адкрыцця вельмі шмат людзей было. Прыходзілі сем’ямі, прыязджалі з рэгіёнаў, шмат расіян было, іншыя замежнікі. А цяпер працуем у звычайным рэжыме.

Не бульбай адзінай

Калі вам здалося, што на фоне амаль сотні нехарчовых крам тры дзясяткі крам харчовых — гэта няшмат, то вы памыляецеся. Рознага роду ежа тут — на кожным кроку. Не можаце вырашыць для сябе дылему, якая згушчонка вам бліжэй, рагачоўская ці глыбоцкая? Ідзіце ў «Першы нацыянальны гандлёвы дом»: варыянтаў згушчонкі ад абодвух знакамітых вытворцаў тут мноства, прычым з рознымі смакамі — некаторыя віды ў Мінску амаль не сустрэнеш. І калі вам цікавы параўнальны асабісты аналіз глазураваных сыркоў з розных не тое што абласцей, але нават раёнаў краіны — таксама заходзьце сюды. Ёсць магчымасць азнаёміцца, купіць пад адным дахам дзясятак (або некалькі дзясяткаў) сыркоў з усёй краіны, пакаштаваць і вырашыць для сябе гэтае пытанне.

А ў цэлым харчовы асартымент сапраўды шырокі і разнапланавы — арыентаваны на рознага пакупніка. Уражвае выбар паўфабрыкатаў — замарожаных варэнікаў, пельменяў, блінцоў і г. д. У тым ліку варыянты, раней асабіста мной у мінскіх крамах не бачаныя. Ёсць выбар для тых, хто лічыць сябе адэптам правільнага харчавання — напрыклад, да іх паслуг асартымент крамы «Віцебскі экапрадукт», а таксама прадукты з малака А2 (першым гэта цяпер моднае малако ў 2021 годзе пачаў выпускаць Лунінецкі малочны завод. А1 і А2 — генетычныя варыянты бялку бэта-казеіну, і ў чым тут «фішка», «Звязда» неяк пісала)…

Чакана шмат у новым ГЦ кандытаркі — і ў павільёнах ад «Камунаркі», «Спартака», «Чырвонага харчавіка», і ў фірменных крамах вытворцаў маштабам паменш. У шырокім асартыменце — і алкагольныя напоі, у першую чаргу традыцыйныя для беларускай кухні. Шмат сыроў, ад мацарэлы да відаў з цвіллю або спецыямі. І, вядома, да паслуг пакупнікоў вялікі выбар мяса і мясных прадуктаў. Індычку з розных рэгіёнаў, напрыклад, можна і трэба параўноўваць, як і стэйкі з мармуровай ялавічыны — варыянты ёсць. Не кажучы ўжо пра курыцу, свініну і вырабы з іх — ад сардэлек да «пальцам пханых» каўбас. Ёсць у новым гандлёвым цэнтры вялікі фудкорт, але пакуль што «кафэшак» там няшмат. А на першым (цокальным) паверсе размяшчаецца кафэ беларускай кухні «Пан Жыта».

Што здзівіла: у невялікай краме «Лясная хатка» Бялыніцкага лясгаса можна купіць тушонку з ласяціны, аленіны і нават мяса зубра. Каштуе ўсё задавальненне ў межах дзясяткі за стандартны слоік тушонкі. Можна, вядома, абурацца: маўляў, гэта ж сімвал краіны, да таго ж зубр — у Чырвонай кнізе. Але супрацоўнікі крамы запэўнілі, што ўсё ў межах закона. І раз ужо шкоду віду далікатэс не нанёс, чаму б не пакаштаваць?

Дарэчы, у гэтай жа краме прадаюцца вельмі мілыя шкляныя падарункавыя слоічкі з самым розным мёдам. У сярэднім 4 рублі за 130 грам.

«Хюгге» па-беларуску

Крамы мэблі і тавары для дома — яшчэ адзін найбуйнейшы кірунак, на які арыентаваны гандлёвы цэнтр. Наўрад ці так задумвалася першапачаткова, проста мэблю і інтэр’ерныя рэчы ў Беларусі вырабляе шмат буйных і невялікіх кампаній, вось «ухіл» і атрымаўся сам сабой. І па дызайнерскіх кірунках, і па фармаце мэблевыя крамы тут вельмі розныя. Ёсць, напрыклад, прасторы сеткавых крам «Амі-Мэбля», Black Red Whіte, ёсць пляцоўкі буйных вытворцаў, ёсць шоўрумы інтэрнэт-крам — напрыклад, dіvan. by ці furman. by. А таксама корнеры невялікіх прыватных вытворчасцяў.

Тое ж датычыцца аздаблення і дызайну кватэры (дома), а таксама прадметаў інтэр’ера: фарматы розныя. Нараўне з «Керамінам», «Беларускімі шпалерамі», «Віцебскімі дыванамі» і г. д. тут працуе таксама мультыбрэндавая прастора «Да дому». Гэта, дарэчы, ужо трэцяя мінская крама «Да дому» (ёсць яна таксама ў «Дана Мол» і «Сталіцы»).

Шмат у новым ГЦ крышталю і фарфору, ёсць шэраг студый кухні, а таксама крамы садовай мэблі. Можна знайсці і ўвогуле дызайнерскія рэчы — тыя, што «ў адзіным экзэмпляры».

— Мы працуем не толькі для людзей, у якіх ёсць загарадны дом, — распавялі ў «Краме кавання» (вытворчасць размешчана ў Магілёве). — Чаму ў кватэры, каля ўваходу, скажам, трэба ставіць палічку з фанеры? Можна ж паставіць прыгожую і надзейную этажэрку — спалучэнне кавання і дрэва. Гэта ўкладанне на доўгія гады. Памятаеце, у савецкія гады быў такі анекдот: маўляў, мэблю ў нас робяць з фанеры, а платы — з якаснага дрэва. Дык вось, сёння гэта не так: мы, напрыклад, ствараем надзейныя, даўгавечныя, прыгожыя і якасныя інтэр’ерныя рэчы.

Дарэчы, вытанчаны каваны падсвечнік, навобмацак цяжкі, а па выглядзе — бязважкія карункі, тут можна набыць усяго за 42 рублі, хоць, вядома, на большасць пазіцый цана вышэйшая.

Што здзівіла: Аказваецца, у нашай краіне ёсць вытворчасці, якія робяць не толькі якасную і прыгожую класічную мэблю (мяккую і карпусную), але і дызайнерскую, у самых розных стылях. Знаходкай асабіста для мяне стаў брэнд Savlukov-Mebel. Па-першае і галоўнае, у сувязі са сваёй прадукцыяй: сапраўды стыльнай мяккай мэбляй, а па-другое, у сувязі з афармленнем шоўрума. «Раптам захацелася купіць канапу» — пагадзіцеся, гэта гучыць... мабыць, дзіўна: гэта ж не сукенка або сумачка, такую куплю звычайна людзі абдумваюць. Але мэбля тут выглядае так, што купіць яе менавіта «хочацца», узнікае такі імгненны імпульс. На шматлікіх канапах і крэслах красуецца таблічка «Прабачце, мяне ўжо купілі».

— Наша фабрыка — сучасная вытворчасць, якая знаходзіцца ў Віцебску, — распавядае прадавец. — У Мінску, як і ў іншых рэгіёнах Беларусі, нас пакуль не надта ведаюць, але, спадзяюся, хутка пазнаёмімся.

Знаёмства, здаецца, адбылося паспяхова. Дарэчы, дыяпазон цэн тут, у прынцыпе, не непад’ёмны. Ёсць зусім вартыя варыянты ад 2000 рублёў, хоць у асартыменце прыгажуні канапы і за 7-8 тысяч.

Свой стыль

Па вопратцы і абутку, мабыць, варта было б зрабіць асобны агляд — іх тут таксама шмат, і калі вам цікавая мода, сумаваць у «Першым нацыянальным гандлёвым доме» не давядзецца. Як вядома, у Беларусі ёсць буйныя прадпрыемствы, якія забяспечваюць, скажам так, больш спакойны запыт (гэтае адзенне ў абсалютнай большасці, напрыклад, у ЦУМе і ГУМе) і лакальныя вытворчасці — дызайн-студыі, якія працуюць на стварэнне акцэнтных модных рэчаў. І тыя, і другія ў ГЦ прадстаўлены. Калі вас цікавіць другі варыянт, ідзіце ў тое крыло, дзе Брэсцкая і Гродзенская вобласць, там ёсць цікавыя корнеры — пакуль іх менш, чым хацелася б, але ж і цэнтр толькі адкрыўся. На сёння і тут пакуль пераважае той самы «спакойны запыт». Зрэшты, паказаць у новым ГЦ брэнды імкнуцца самае лепшае, так што і ў буйных вытворчасцяў тут можна знайсці нясумныя рэчы, якія захочацца купіць.

Што здзівіла: дызайнерскае адзенне для дзяцей і падлеткаў. Аказваецца, яно ў нас шыецца — і шыецца нядрэнна. Напрыклад, у корнеры брэсцкага брэнда Colіbrі пакупнік апране сваю юную модніцу і для фэшн-фотасесіі, і «на выхад», і на кожны дзень. Плюс аксесуары і ўпрыгожванні. Цэны тут, вядома, не сказаць каб бюджэтныя, але ж і рэчы дызайнерскія.

— Наша вытворчасць яшчэ маладая, ды і гандлёвы цэнтр новы, — распавядае прадавец. — Так што пакуль людзі прыходзяць больш «проста паглядзець», хоць ёсць ужо і продажы. Дарэчы, купляюць у нас не толькі для дзяцей, набываюць і дарослыя.

«Растоўка» ў брэнда да 170 см, так што вобразы могуць абраць сабе і дзяўчыны, і нават сталыя жанчыны (калі камплекцыя дазваляе).

І яшчэ аб плюсах. У шматлікіх корнерах дызайнерскага адзення ёсць разнапланавыя фотазоны (як і проста ў холах гандлёвага цэнтра), у шматлікіх крамах з прадуктамі — міні-кафэ. А ў цэлым мазаіка з розных айчынных вытворчасцяў сапраўды склалася ў прывабную і годную карціну, якую цікава разглядаць.

Аляксандра АНЦЭЛЕВІЧ

Выбар рэдакцыі

Культура

Чым сёлета будзе адметны фестываль песні і паэзіі ў Маладзечне?

Чым сёлета будзе адметны фестываль песні і паэзіі ў Маладзечне?

Арганізатары і ўдзельнікі свята запэўніваюць — знайсці сабе адпачынак па душы зможа кожны.

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў. 

Грамадства

Ірына Даўгала: Сям’я для беларусаў застаецца найвышэйшай каштоўнасцю

Ірына Даўгала: Сям’я для беларусаў застаецца найвышэйшай каштоўнасцю

«Сям’я закладвае ў чалавеку мараль, здольнасць спраўляцца з выпрабаваннямі, патэнцыял для развіцця, яна навучае любові, самаахвярнасці, культуры».