Вы тут

Надвор'е: Зноў моцны вецер, а ў сераду — да 18 марозу


На гэтым тыдні ў нас зноў будуць разгойдвацца «сінаптычныя арэлі», якія адрозніваюцца няўстойлівымі тэмпературнымі ваганнямі. А франтальныя раздзелы будуць прыносіць у краіну новыя порцыі ападкаў рознай фазы і інтэнсіўнасці, у асобныя дні дыскамфорту будзе дадаваць моцны парывісты вецер, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

У аўторак на большай частцы тэрыторыі краіны пройдзе снег, месцамі мяцеліца. На асобных участках дарог галалёдзіца. Ноччу па заходняй палове краіны, раніцай і днём на большай частцы тэрыторыі чакаецца ўзмацненне ветру парывамі да 15–20 м/с. Тэмпература паветра на працягу сутак будзе вагацца ад мінус 3 да мінус 8 градусаў.

Самым халодным днём на гэтым тыдні, будзе серада. У гэтыя суткі ноччу месцамі прагназуецца невялікі снег, днём — пераважна без ападкаў. На асобных участках дарог галалёдзіца. Уначы месцамі па паўночным усходзе краіны чакаецца ўзмацненне ветру да 15–18 м/с. Тэмпература паветра ўначы складзе 10–16 градусаў ніжэй за нуль, а пры праясненнях — да мінус 18 градусаў. Днём тэмпература будзе ў межах ад мінус 1 градуса па паўднёвым захадзе да мінус 10 градусаў па паўночным усходзе.

А ў чацвер чакаецца пагаршэнне ўмоў надвор’я. Тэрыторыя Беларусі апынецца ва ўладзе актыўных атмасферных франтоў, за якімі пачне паступаць цёплая марская паветраная маса.

Маразы будуць адступаць, а ападкі са снегу пяройдуць у мокры снег, раніцай і днём з дажджом, што можа стаць прычынай утварэння галалёдных з’яў. Разам з тым ападкі будуць суправаджацца моцным парывістым ветрам, што паспрыяе ўзнікненню завей. Тэмпература паветра ўначы будзе ад мінус 2 градусаў па паўднёвым захадзе да мінус 15 градусаў па паўночным усходзе, а днём — ад мінус 3 да плюс 4 градусаў.

У ноч на Вадохрышча (у пятніцу) вецер аслабее, а ападкі працягнуць ісці на значнай частцы тэрыторыі. У асобных раёнах слабыя туман і галалёд. На дарогах месцамі галалёдзіца. Пры гэтым моцных маразоў чакаць не варта. Тэмпература паветра на працягу сутак будзе ад мінус 5 градусаў па паўночным захадзе да плюс 1 градуса па паўднёвым усходзе, а ўначы ў паўночна-заходніх раёнах пры праясненнях да мінус 8 градусаў.

Згодна з папярэднім прагнозам айчынных сіноптыкаў, у выхадныя дні зноў чакаецца зімовае надвор’е, тэмпературны фон панізіцца, а ападкі — у выглядзе снегу. Асобныя ўчасткі дарог будуць слізкія. У суботу-нядзелю месцамі пройдзе невялікі снег. На асобных участках дарог галалёдзіца. Тэмпература паветра ўначы апусціцца да мінус 5–12 градусаў, а пры праясненнях — да 13–17 марозу. Днём сіноптыкі абяцаюць 1–8 градусаў ніжэй за нуль.

Сяргей КУРКАЧ

Выбар рэдакцыі

Навука

Наколькі эфектыўна працуе сістэма інтэлектуальнай уласнасці?

Наколькі эфектыўна працуе сістэма інтэлектуальнай уласнасці?

Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.

Здароўе

У Нацыянальны каляндар плануюць уключыць новыя прышчэпкі

У Нацыянальны каляндар плануюць уключыць новыя прышчэпкі

Як вакцыны выратоўваюць жыцці і чаго можа каштаваць іх ігнараванне?

Грамадства

Курс маладога байца для дэпутата

Курс маладога байца для дэпутата

Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.