Вы тут

Гомельшчына прапаноўвае супрацоўніцтва не толькі ў бізнесе, але і ў культурнай сферы


Прадстаўнікі дзесяці краін свету і больш чым двух дзясяткаў рэгіёнаў Расійскай Федэрацыі ў вочным і анлайн-фармаце сталі ўдзельнікамі «Бізнес-дзён у Гомелі». Міжнародны форум у горадзе над Сожам арганізаваны дзявяты раз. У гэтым годзе яго галоўнымі тэмамі заяўлены пытанні трансфармацыі бізнес-магчымасцяў у новых умовах і турызму як фактару эканамічнага развіцця тэрыторый. Для ўдзельнікаў маштабнага мерапрыемства арганізатары падрыхтавалі насычаную двухдзённую праграму.


Да правядзення «Бізнес-дзён у Гомелі» традыцыйна далучылася кіраўніцтва Гомельскай вобласці і горада Гомеля. Удзельнікамі форуму сталі прадстаўнікі дыпламатычных місій, гандлёва-прамысловых палат, асацыяцый бізнесу, турыстычнай індустрыі і прафсаюзных арганізацый. Афіцыйнае адкрыццё міжнароднага дзелавога мерапрыемства прайшло ў бізнес-цэнтры Гомельскага хімічнага завода. На пленарнай частцы гасцей прывітаў першы намеснік старшыні Гомельскага аблвыканкама Дзмітрый Петражыцкі.

Ён звярнуў увагу на тое, што Гомельскі рэгіён дынамічна развіваецца як індустрыяльны, транспартна-лагістычны цэнтр, адкрыты для дзелавога ўзаемавыгаднага супрацоўніцтва ў сферы машынабудавання, металаапрацоўкі, хіміі і нафтахіміі, вытворчасці будматэрыялаў, харчовай, лёгкай прамысловасці і аграпрамысловага комплексу.

— У існуючых эканамічных умовах адна з найбольш эфектыўных форм, якія даюць магчымасць гібка і аператыўна ўзаемадзейнічаць па самым шырокім коле пытанняў, — міжрэгіянальнае супрацоўніцтва, — нагадаў Дзмітрый Петражыцкі.

Гомельшчына, як і заўсёды, зацікаўленна ў паглыбленні міжрэгіянальных адносін.

— Патэнцыял развіцця ўзаемавыгаднага супрацоўніцтва ў Гомельскай вобласці ёсць практычна ва ўсіх напрамках. Мы маем намер узмацняць яго і пашыраць геаграфію ўзаемадзеяння, — зазначыў першы намеснік старшыні аблвыканкама.

Пленарная частка «Бізнес-дзён у Гомелі» арганізавана на прасторах дзвюх тэматычных сесій. Сёлета прапанавана разгледзіць эфектыўныя формы гандлёва-эканамічнага супрацоўніцтва рэгіёнаў, развіцця сферы аграпрамысловага комплексу, забеспячэння харчовай бяспекі, лагістыкі і транспартных шляхоў. Значная ўвага і пытанням імпартазамяшчэння, стварэння кааперацыйных ланцужкоў, узмацнення міжрэгіянальнага ўзаемадзеяння.

Між тым у праграме «Бізнес-дзён у Гомелі» сёлета шэраг сустрэч прысвяцілі менавіта пытанням развіцця міжрэгіянальнага турызму, актуальным задачам турыстычнай сферы ў цэлым. У Гомельскім аддзяленні Беларускай гандлёва-прамысловай палаты прайшоў круглы стол з удзелам прадстаўнікоў Гомельскага і Кармянскага раёнаў Гомельшчыны, Слаўгарадскага раёна Магілёўскай вобласці, Бранскай і Смаленскай абласцей, а таксама Санкт-Пецярбурга. Удзельнікі сустрэчы разгледзелі заяўленыя пытанні на прыкладзе ўнікальнага для Гомельшчыны праекта «Дарогамі Кацярыны». Яго сутнасць — распрацоўка канцэпцый новых турыстычных аб’ектаў, лакальных і міжнародных турыстычных маршрутаў, у змест якіх уключаны рэальныя факты, звязаныя з расійскай імператрыцай Кацярынай ІІ. Сёлета ўнікальны турыстычны праект «Дарогамі Кацярыны», які на Гомельшчыне ажыццяўляецца пры падтрымцы Гомельскага і Кармянскага раённых Саветаў дэпутатаў, быў прадстаўлены на ХХІV Міжнароднай выстаўцы «Вясна ў Гомелі». Днямі праект адзначаны спецыяльным дыпломам «За захаванне адзінай саюзнай культурнай спадчыны» ў намінацыі «Найлепшая ідэя турыстычнай падзеі» ў фінале Міжнароднай прэміі ў галіне падзейнага турызму «RussіanEventAwards», які прайшоў у Ніжнім Ноўгарадзе. У намінацыі «Найлепшая турыстычная падзея ў галіне культуры і мастацтва сярод гарадоў з насельніцтвам да 100 000 чалавек» дыплом першай ступені заваяваў праект «Фестываль «Ільняная карусель» Кармянскага раённага выканаўчага камітэта, дзе былі арганізаваны тэматычная пляцоўка, прысвечаная імператрыцы Кацярыне ІІ, майстар-класы па рукадзеллі і дэгустацыяй страў на аснове лёну.

Другі год працягваецца сумесная работа спецыялістаў турыстычнай сферы Гомельшчыны з калегамі з Бранскай, Смаленскай абласцей, Санкт-Пецярбурга над «Дарогамі Кацярыны», нагадала ініцыятар вялікага праекта, кіраўнік гомельскай прыватнай установы «Тэрыторыя развіцця — XXІ стагоддзе» Ірына Багданец. Так, у Санкт-Пецярбургу таксама плануюць праводзіць «Кацярынінскія гульні» з народнымі гуляннямі, катаннем з ледзяных горак, снежнымі бітвамі. Падобныя турыстычныя праекты ўжо рэалізоўваюць у Бранску, Смаленску, Карэліі і Татарстане.

— Ад «Бізнес-дзён у Гомелі» чакаем інтэнсіфікацыі расійска-беларускага супрацоўніцтва ў сферы прамысловасці, турызму, у цэлым малога і сярэдняга бізнесу. Асноўны праект, які мы сёння абмяркоўваем і які падтрымаў «Рускі дом», — «Дарогамі Кацярыны» — сапраўды цікавы для абедзвюх краін. Ёсць нямала знаёмых пунктаў на ім, асабліва ў Гомельскай вобласці. Ведаю, што многія рэгіёны Расіі далучыліся да праекта, яго цікава пашыраць, — адзначыла першы сакратар Пасольства Расійскай Федэрацыі ў Рэспубліцы Беларусь, кіраўнік «Рускага дома» ў Гомелі Вольга Бараненка.

У межах форуму ў Гомельскім дзяржаўным каледжы кулінарыі прайшоў майстар-клас «Як упрыгожыць турыстычны маршрут. Гастранамічныя прыхільнасці Кацярыны ІІ». Удзельнікам прапанавалі ацаніць стравы стылізаванага царскага абеду. Яго меню прапрацаваў су-шэф-кухар аднаго з рэстаранаў абласнога цэнтра Іван Крашаніннікаў.

— На жаль, на сёння дакладных рэцэптаў прыгатавання страў той эпохі не захавалася. Але мы ведаем, што ў той перыяд была мода на французскую кухню. Па некаторых крыніцах вядома аб любімых прадуктах Кацярыны ІІ. Адзін з іх — ананас. Ён настолькі спадабаўся царскай асобе, што яго спрабавалі вырошчваць. Тады ананас запякалі ў печы з мёдам, — расказаў су-шэф-кухар.

Між тым у межах міжнароднага форуму для прадстаўнікоў расійскай турыстычнай індустрыі арганізавалі рэкламна-інфармацыйны тур па Гомелі і Гомельскім раёне. Для дзелавых колаў — удзельнікаў «Бізнес-дзён у Гомелі» — былі распрацаваны індывідуальныя праграмы з наведваннем прадпрыемстваў Гомельскай вобласці.

— «Бізнес-дні ў Гомелі» ў першую чаргу задумвалі як мерапрыемства для дыялогу дзелавых колаў, — падкрэсліла генеральны дырэктар Гомельскага аддзялення Беларускай гандлёва-прамысловай палаты Марына Філонава. — Міжнароднае мерапрыемства праводзіцца з 2015 года. Сёння ў «Бізнес-днях» два напрамкі: бізнес, у прыватнасці гандлёва-эканамічнае супрацоўніцтва, і турызм, а таксама тое, што звязана з захаваннем культурнай спадчыны, ваенна-патрыятычным турызмам. Гэта актуальна для нас. Удзел у мерапрыемстве ў вочным і анлайн-фармаце пажадалі прыняць 10 краін, у тым ліку прадстаўнікі Індыі, сярод якіх супрацоўнікі кінакампаній, фотарэпарцёры. Будзем запрашаць іх здымаць Гомельскую вобласць, расказваць пра Беларусь у сваёй краіне. Прадстаўнікі турыстычнай кампаніі прыехалі да нас па лініі Міжнароднай палаты бізнесу, з якой у нас падпісаны дагаворы, — адзначыла Марына Філонава.

Наталля КАПРЫЛЕНКА

Фота ТК «Гомельшчына афіцыйна»

Выбар рэдакцыі

Навука

Наколькі эфектыўна працуе сістэма інтэлектуальнай уласнасці?

Наколькі эфектыўна працуе сістэма інтэлектуальнай уласнасці?

Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.

Здароўе

У Нацыянальны каляндар плануюць уключыць новыя прышчэпкі

У Нацыянальны каляндар плануюць уключыць новыя прышчэпкі

Як вакцыны выратоўваюць жыцці і чаго можа каштаваць іх ігнараванне?

Грамадства

Курс маладога байца для дэпутата

Курс маладога байца для дэпутата

Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.