Вы тут

У сталіцы любяць аднапакаёўкі. А Брэст, Гомель і Гродна аддаюць перавагу двухпакаёваму жыллю


Сёлета больш за ўсё здзелак куплі-продажу адбылося ў Гродне, а найменш — у Магілёве. А вось па кошце жылля на першым месцы Брэст, на апошнім — Гомель і Магілёў. У трэцім квартале самае дарагое абласное жыллё (чатырохпакаёвая кватэра) прададзена ў Брэсце па вуліцы Інтэрнацыянальная за 218,8 тысячы долараў у эквіваленце. Пры гэтым кошт астатніх рэалізаваных у гэты перыяд кватэр не перавышае суму, якая адпавядае 180 тысячам долараў. А найдаражэйшы абласны жыллёвы квадратны метр у трэцім квартале належыць трохпакаёўцы па вуліцы Камісара Крылова ў Віцебску — 2600 долараў у эквіваленце. Аднак актыўнасць рынку кватэр у Мінску ў паўтара раза большая, чым ва ўсіх абласных цэнтрах, разам узятых. Самая дарагая кватэра плошчай каля 250 м2 па вул. Старажоўская ў трэцім квартале «пацягнула» на 580 тысяч долараў. А самы дарагі сталічны «квадрат» — 4400 долараў — знаходзіцца ў кватэры (невялікай па плошчы, але з добрым рамонтам) па вул. Францыска Скарыны, агучылі спецыялісты сталічныя рэкорды трэцяга квартала.


Жыллёвы рэкорд дзесяцігоддзя

Лета 2023-га ўстанавіла рэкорд за апошнія дзесяць гадоў па актыўнасці рынку нерухомасці (па колькасці здзелак). У Віцебску і Магілёве за трэці квартал сёлета набывалі аднапакаёвыя кватэры, а на рынку нерухомасці Брэста, Гомеля і Гродна перавага была за двухпакаёўкамі. Кожны месяц летам у сталіцы рэгістравался да 1,5 тысячы здзелак, а ў абласных цэнтрах гэты паказчык узрос на траціну. У Гродне ён увогуле павялічыўся практычна на 87% (тут было шмат дагавораў куплі-продажу ў новабудоўлях).

— Падмогай для такой актыўнасці сталі спрыяльныя ўмовы крэдытавання пакупнікоў на рынку нерухомасці. Аб’ём крэдытаў, выдадзеных на рэканструкцыю і пакупку жылля, за дзевяць месяцаў сёлета ўдвая перавысіў леташні паказчык. Колькасць здзелак у верасні ў Мінску і абласных цэнтрах ужо прыйшла ў норму, — расказала пра эканамічныя аспекты рынку нерухомасці Вераніка Салаўёва, начальнік упраўлення кадастравай ацэнкі Нацыянальнага кадастравага агенцтва. — У трэцім квартале 2023-га таксама назіраўся плаўны рост цэн на кватэры ў сталіцы і рэгіёнах у рамках 3%, які пачаўся з другога квартала 2022-га, то-бок цэны на нерухомасць досыць стабільныя, з невялікай тэндэнцыяй на павышэнне. Попыт на кватэры ў сталіцы застаецца даволі высокі.

Па інфармацыі рэестра цэн — дзяржаўнага інфармацыйнага рэсурсу, дзе ўтрымліваюцца звесткі аб дагаворах куплі-продажу ўсіх аб’ектаў нерухомасці ў краіне, у трэцім квартале ў сталіцы здзейснена 4375 такіх здзелак, што на 3% і на 32% больш, чым у першым і другім кварталах адпаведна. Самым выніковым стаў жнівень, калі было зарэгістравана 1637 здзелак. У абласных цэнтрах за трэці квартал адбылося каля трох тысяч здзелак куплі-продажу, што на 2% больш, чым у другім квартале, і на 4% больш, чым за аналагічны перыяд 2022-га.

Найбольшым попытам у Мінску карыстаюцца «аднапакаёўкі» (46% ад усіх здзелак). Часцей за ўсё набываюць кватэры коштам ад 50 да 75 тысяч долараў у рублёвым эквіваленце (42% ад усіх здзелак). А 4% сталічнага жылля не дацягвае да сумы, якая адпавядае 35 тысячам долараў.

Рынак новабудоўляў складае каля 10–20% ад агульнага аб’ёму рынку, але гэта абумоўліваецца ў тым ліку тым, што колькасць новых аб’ектаў не такая высокая, як агульны аб’ём прапаноў на рынку нерухомасці. Усяго ж за трэці квартал сёлета было прададзена 226 тысяч м2 кватэр агульным коштам 308 млн долараў у рублёвым эквіваленце — гэта на 10% больш, чым за аналагічны леташні перыяд, удакладніла спецыяліст.

Лідар па колькасці здзелак — Фрунзенскі раён сталіцы, а па кошце — Цэнтральны (сярэдняя цана аднаго м2 тут 1530 долараў). Самы танны сталічны раён — Заводскі: за метр квадратны тут просяць 1190 долараў.

— Нацыянальнае кадастравае агенцтва рэгулярна аналізуе інфармацыю і маніторыць рынак нерухомасці на падставе даных базавых інфармацыйных рэсурсаў. Любы ахвотны можа азнаёміцца з аналізам рынку кватэр бясплатна на сайце http://analytіcs. nca. by, дзе штоквартальна з’яўляюцца звесткі па актыўнасці рынку і змене сярэдніх цэн. Асабліва карысна гэта, калі вы збіраецеся прадаць ці купіць кватэру, каб разумець, якія тэндэнцыі існуюць на рынку нерухомасці, — заўважыла Вікторыя Салаўёва.

Офісны, складскі, гандлёвы…

Рынак нежылой нерухомасці (офісныя, гандлёвыя, вытворча-складскія памяшканні) на працягу паўтара года дэманструе стабільнасць, хоць за тры сёлетнія кварталы грашовы абарот у здзелках з гандлёвай і складской нерухомасцю перавысіў выніковы паказчык мінулага года. Такім чынам, намячаецца нейкая актывізацыя рынку, заўважыла спецыяліст:

— Складскі сегмент характарызуецца ўстойлівасцю цягам 3-4 гадоў. Колькасць здзелак, якія рэгіструюцца, і цэнавыя паказчыкі стабільныя. Аднак будаўніцтва гэтых аб’ектаў запаволілася, і далейшы вектар развіцця гэтага сегмента залежыць ад таго, як будуць мяняцца знешнія фактары ў галінах-драйверах (вытворчасці і гандлю).

Гандлёвая нерухомасць у стадыі завісання, попыт застаецца ўмераны, назіраецца нязначная зменлівасць цэнавых паказчыкаў, але ж існуючы ўзровень цэн на гэтым сегменце рынку захаваецца як мінімум да канца года, удакладніла начальнік упраўлення.

На рынку офіснай нерухомасці Мінска таксама заўважны станоўчыя тэндэнцыі па колькасці здзелак. А рынак рэгіёнаў апошні год можна назваць стабільным. Аб’ёмы ўводу нежылых аб’ектаў запавольваюцца. Найбольш развіты рынак нежылой нерухомасці ў абласных цэнтрах, а таксама ў гарадах побач з Мінскам (Заслаўе, Мачулішчы), да іх далучыўся таксама Салігорск.

— У абласных цэнтрах рынак офіснай нерухомасці развіваецца нераўнамерна. У Брэсце функцыянуе некалькі сучасных бізнес-цэнтраў, якія нічым не саступаюць сталічным. Пра іншыя абласныя цэнтры такога не скажаш, — заўважыла прадстаўніца кадастравага агенцтва. — У агульным аб’ёме грашовага абароту офіснай нерухомасці ў першым паўгоддзі 23-га на пералічаныя мной гарады прыходзіцца 77% ад агульнага аб’ёму здзелак (каля сямі мільёнаў долараў у эквіваленце).

Рынак вытворча-складскіх аб’ектаў рэгіёнаў і Мінска не адрозніваецца істотнымі зменамі. Актыўнасць ва ўсіх рэгіёнах (за выключэннем сталіцы і абласных цэнтраў) зніжаецца. А агульны грашовы абарот здзелак у рэгіёнах перавысіў 37 мільёнаў долараў у рублёвым эквіваленце. Амаль палова гэтага аб’ёму прыходзіцца на гандлёвы сегмент, нягледзячы на тое, што па плошчы ён складае крыху больш за 20%.

Вераніка Салаўёва рэзюмавала, што ў цэлым стан рынку нерухомасці характарызуецца як стабільны. А ў перспектыве — тэндэнцыі да плаўнага павышэння цэн і больш актыўнага росту здзелак ва ўсіх сегментах.

Ірына СІДАРОК

Фота аўтара

Выбар рэдакцыі

Фінансы

Як банкі абараняюць ад махляроў грашовыя пераводы

Як банкі абараняюць ад махляроў грашовыя пераводы

За чатыры месяцы 2024 года раскрывальнасць цяжкіх кіберзлачынстваў у параўнанні з аналагічным перыядам мінулага года павысілася на 19%. 

Спорт

Настасся Касцючкова: Чалавек у калясцы не павінен быць зачынены ў чатырох сценах

Настасся Касцючкова: Чалавек у калясцы не павінен быць зачынены ў чатырох сценах

Фехтаваць наша гераіня ўмее трыма відамі зброі: шабляй, шпагай і рапірай. 

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.