Вы тут

Якіх спецыялістаў шукаюць сталічныя прадпрыемствы і што прапануюць?


На мінулым тыдні ў Культурна-спартыўным цэнтры Мінскага аддзялення Беларускай чыгункі прайшоў сталічны кірмаш вакансій. У ёй узялі ўдзел каля 70 мінскіх прадпрыемстваў і арганізацый. Якія прафесіі запатрабаваныя на сталічным рынку працы, каго хочуць бачыць наймальнікі, якую абяцаюць зарплату і што шукаюць ахвотныя працаўладкавацца, даведаліся карэспандэнты «Звязды».


Арганізатарам кірмашу традыцыйна выступіў Камітэт па працы, занятасці і сацыяльнай абароне Мінгарвыканкама. Наведвальнікі маглі не толькі непасрэдна даведацца пра вакансіі таго ці іншага прадпрыемства і паразмаўляць з работадаўцамі, але атрымаць інфармацыю аб парадку атрымання беспрацоўнымі грамадзянамі субсідый на арганізацыю прадпрымальніцкай дзейнасці, азнаёміцца з праграмамі дадатковай адукацыі для дарослых. Школьнікаў і студэнтаў кансультавалі па выбары будучай прафесіі, а таксама расказвалі пра вакансіі, на якія можна адгукнуцца з 14 гадоў.

Кірмаш размясціўся на двух паверхах культурна-спартыўнага цэнтра. І недахопу наведвальнікаў, нягледзячы на тое, што сталіцу ў той дзень шчодра засыпала снегам, не адчувалася.

— Мы шукаем кандыдатаў на вакансіі вадзіцеля пагрузчыка, кладаўшчыка, укладчыка-ўпакоўшчыка і грузчыка. Заработная плата — ад тысячы рублёў плюс пашыраны сацыяльны пакет. У нас пастаянна пашыраюцца склады, таму патрэбны работнікі. Сёння было шмат кандыдатаў, якія гатовы разгледзець працаўладкаванне ў нас, — расказвае намеснік начальніка аддзела развіцця персаналу і адміністрыравання Мінскага філіяла РУП «Белмытсервіс» Крысціна Раманькова.

За асобным сталом размясціліся прадстаўнікі аховы здароўя. РНПЦ траўматалогіі і артапедыі, сталічныя бальніцы і паліклінікі шукаюць як спецыялістаў з вышэйшай і сярэдняй медыцынскай адукацыяй, так і санітарак і іншы персанал.

— Нам патрабуецца ўрач рэнтген-лабарант, медыцынскія сёстры, у тым ліку агульнай практыкі, рэнтген-лабаранты, на перспектыву патрэбны юрыст, заўсёды ёсць неабходнасць у санітарках. Зарплата медыцынскай сястры — каля 800-900 рублёў, медыцынскай сястры агульнай практыкі — больш, бо яны працуюць на ўчастку, прыкладна 1200 рублёў. У асноўным падыходзяць людзі без спецыяльнай адукацыі, цікавяцца вакансіямі санітарак, прыборшчыкаў тэрыторый, — расказвае спецыяліст па кадрах 19-й Цэнтральнай раённай паліклінікі Першамайскага раёна Мінска Вольга Сацук.

Шырока прадстаўлены на кірмашы і ўстановы сацыяльнай сферы. 

Напрыклад, псіханеўралагічны домінтэртнат для састарэлых і інвалідаў № 2 шукае медсясцёр, падсобнага рабочага, дворніка, санітарку, повара, урача-тэрапеўта, інструктара па працоўнай тэрапіі, афіцыянта, рабочага па мыцці і рамонту спецадзення, трактарыста, рабочага па комплекснаму абслугоўванню і рамонту будынкаў і збудаванняў, фельчара, прыборшчыка памяшканняў. Урачу-тэрапеўту, напрыклад, прапануюць заработную плату ў 2100 рублёў.

Горрэмаўтадоры ўсіх раёнаў сталіцы таксама запрашаюць на працу.

— Набіраем і спецыялістаў, і рабочых. У цяперашні час нам патрабуецца дыспетчар, майстар, лінейны дзяжурны майстар, з рабочых — прыборшчык тэрыторый, грузчык, кіроўца, слесар па рамонту аўтамабіляў. Прапануем дастойную заработную плату і поўны сацпакет. Заработная плата ва ўборшчыкаў, грузчыкаў — каля 1200 рублёў, кіроўцаў — каля дзвюх тысяч. Сёння знайшлі кандыдатаў, будзем запрашаць іх на сумоўе, — расказвае начальнік аддзела кадраў УП «Рэмаўтадор Фрунзенскага раёна г. Мінска» Вольга Азябчыкава.

Кваліфікаваных кадраў — токараў, шліфоўшчыкаў, фрэзероўшчыкаў — шукае ААТ «Амкадор» — кіруючая кампанія холдынга».

— Заработная плата — ад 1500 «чыстымі» на рукі. Добры сацпакет, маецца медыцынскае страхаванне, калектыўны дагавор прафсаюза. Афіцыйнае афармленне, аплата бальнічных, працоўныя водпускі, — кажа намеснік начальніка ўпраўлення па рабоце з персаналам ААТ «Амкадор» — кіруючая кампанія холдынга» Кацярына Капуста.

І рабочыя, і інжэнерна-тэхнічны персанал патрэбны на розныя вытворчасці машынабудаўнічага гіганта — МАЗа.

— Ёсць вакансіі слесара механа-зборачных работ, штрапаўшчыка, фрэзероўшчыка, токара, аператара ЧПУ, КІПаўцаў. Заработная плата — ад 1300 да 3000 рублёў. На вытворчасці кожны атрымлівае ад здзелкі. Да таго ж, працаваць можна звышурочна, у выхадныя дні за гэта двайная аплата. Калі няма адукацыі, мы навучаем самі. Запрашаем не толькі мужчын. 

Цяпер у нас дзяўчына працуе аператарам ЧПУ, прыйшла са студэнцкага атрада. Яе работай задаволены, ды і хлопцы ёй заўсёды гатовы дапамагчы, — усміхаецца начальнік аддзела кадраў, быта і гаспадарскага абслугоўвання ААТ «Мінскі аўтамабільны завод» — кіруючая кампанія холдынга «БЕЛАЎТАМАЗ» Яўген Шарапаў.

Цікавяцца ў прадстаўнікоў МАЗа вакансіямі студэнткі факультэта сацыялогіі БДУ. Дзяўчаты шукаюць працу ў службе маркетынгу.

— Мы студэнткі 4-га курса, шукаем адпрацоўку пасля ўніверсітэта. Вывучаем маркетынг, эканоміку, сацыялогію, піяр. Ці могуць нас узяць на адпрацоўку? — пытаюцца яны.

— Вам трэба патэлефанаваць у нашу службу маркетынгу і ўдакладніць. Могуць працаўладкаваць, спадабаецца, і застанецеся не толькі на адпрацоўку, бо няма нічога больш пастаяннага, чым часовае, — кажуць кадравікі і дыктуюць неабходны нумар тэлефона.

— А інжэнерныя спецыяльнасці ў вас якія? — цікавіцца адзін з наведвальнікаў, прадстаўнічы мужчына сярэдняга ўзросту.

— Інжэнер-тэхнолаг. Патрэбен спецыяліст і на аўтазборачную вытворчасць, і на «тэрмічку». Заработная плата — 1500 рублёў на прэсава-кузаўным заводзе, — расказваюць пра вакансію. — А па якіх кірунках вы працавалі?

— Я шмат дзе працаваў. Апошняе месца — намеснік галоўнага інжэнера МАПІДа, да гэтага — генеральны дырэктар аднаго з заводаў.
Яшчэ адзін буйны вытворца, прадстаўлены на кірмашы, — холдынг «Гарызонт».

— Мы — вытворчае прадпрыемства «Завод бытавой тэхнікі «Гарызонт». Вытворчасць вырасла ў тры разы, таму нам патрэбны персанал — рабочыя на канвеер, слесары-зборшчыкі на зборку тэлевізараў, грузчыкі. Заработная плата — ад 1500, — кажа кіраўнік сектара па падборы персаналу прадпрыемства Ларыса Гардзейман.

Зацікаўлены ў кадрах і транспартнікі, сярод іх «Мінсктранс».

— Самыя запатрабаваныя на сёння вакансіі — вадзіцель тралейбуса, аўтобуса, слесар па рамонту аўтамабіляў, слесар па рамонту рухомага саставу. Таксама патрэбны электраманцёры і слесары-электрыкі. Па прафесіі «вадзіцель тралейбуса» для тых, хто не мае прафесіі, мы праводзім навучанне. Яно доўжыцца чатыры месяцы. Ёсць два варыянты. Першы — праз службу занятасці сумесна з намі і каледжам. Навучэнец атрымлівае дапамогу, пасля адпрацоўвае на прадпрыемстве адзін год. Другі спосаб — са жніўня бягучага года мы самі набіраем ахвотных, навучаем праз той жа каледж машынабудавання і аплочваем заработную плату — 9 рублёў за гадзіну, атрымліваецца каля тысячы рублёў у месяц. У такім выпадку ў нас адпрацаваць трэба тры гады, — тлумачыць начальнік аддзела кадраў ДП «Мінсктранс» Галіна Кучарэнка. — Ахвотныя падыходзяць, цікавяцца ўмовамі, мы накіроўваем іх у філіялы для сумоўя. Запрасілі школьнікаў — дзевяцікласнікаў, расказваем, на якіх умовах яны могуць да нас звярнуцца, у якіх ліцэях вядзецца мэтавы набор. Яны атрымліваюць прафесію «слесар па рамонту аўтамабіля».

Паводле слоў кіраўніка аддзела кадраў, вадзіцель аўтобуса атрымлівае сярэднюю зарплату ў памеры 2 980 рублёў, пачатковец без стажу і вопыту можа разлічваць на дзве тысячы.

Алена КРАВЕЦ

Фота Лізаветы ГОЛАД

Выбар рэдакцыі

Здароўе

Падхапіць гепатыт А нескладана. Як засцерагчыся?

Падхапіць гепатыт А нескладана. Як засцерагчыся?

Паразмаўлялі з урачом-эпідэміёлагам Мінскага абласнога цэнтра гігіены, эпідэміялогіі і грамадскага здароўя Алінай Емашовай.