Вы тут

Гомель адзначае 80-годдзе вызвалення ад нямецка-фашысцкіх захопнікаў


Фотапраекты, выставы ўзбраення, рэканструкцыі бітваў восені 1943 года, аўтапрабегі па месцах баявой славы... У першым вызваленым ад нямецка-фашысцкіх захопнікаў абласным цэнтры Беларусі да знакавай даты падрыхтавалі мноства маштабных мерапрыемстваў, патрыятычных акцый, прымеркавалі адкрыцці муралаў у гонар Герояў Савецкага Саюза.


80 гадоў мірнага, свабоднага жыцця Гомель адсвяткаваў урачыстым мітынгам каля Вечнага агню. Традыцыйна да знакавага месца памяці Гомельшчыны прыйшлі кіраўнікі абласных і гарадскіх улад, члены Савета Рэспублікі, дэпутаты, а таксама прадстаўнікі гарадоў-пабрацімаў з Расійскай Федэрацыі. Падчас мітынгу быў урачыста перададзены Сцяг Перамогі. Так Гомель далучыўся да рэспубліканскай акцыі «На шляху да Перамогі», якая стартавала 23 верасня ў Камарыне — першым вызваленым ад нямецка-фашысцкіх захопнікаў населеным пункце Беларусі.

— Дзень 26-га лістапада, калі войскі 11-й арміі Беларускага фронту пад камандаваннем Ракасоўскага ўвайшлі ў Гомель, стаў яго другім днём нараджэння. Праз 80 гадоў гісторыя даказвае, што мала перамагчы ворага ў адкрытым баі, трэба і ў мірным жыцці не разгубіць плён Вялікай Перамогі. Гомель свята шануе памяць аб героях вайны, аб загінулых воінах і гісторыі нашага народа. Мы зробім усё магчымае, каб наша краіна заставалася моцнай і незалежнай, а жыццё будучых пакаленняў — мірным і шчаслівым, — падкрэсліў падчас мітынгу ў гонар 80-годдзя вызвалення Гомеля ад нямецка-фашысцкіх захопнікаў старшыня Гомельскага гарвыканкама Уладзімір Прывалаў. 

Між тым гамяльчане ўсіх пакаленняў, працаўнікі прадпрыемстваў і арганізацый Гомеля сабраліся каля плошчы Працы, каб прывітаць удзельнікаў урачыстага парада. Калонай рарытэтныя машыны, сучасная ваенная тэхніка, разлікі вайскоўцаў і супрацоўнікаў сілавых структур прайшлі па цэнтральнай вуліцы Гомеля. 

Некалькі сотняў жыхароў і гасцей абласнога цэнтра сабраліся на цэнтральнай гомельскай набярэжнай. Тут прайшла самая маштабная рэканструкцыя, якую калі-небудзь правадзілі ў Гомелі. Увогуле ў дні святкавання 80-й гадавіны вызвалення ад нямецка-фашысцкіх захопнікаў у горадзе над Сожам правялі пяць рэканструкцый. Як развіваліся падзеі восені 1943 года на свае вочы пабачыць прапанавалі ўдзельнікі ваенна-гістарычных клубаў Беларусі. Яны падрыхтавалі ўнікальную тэхніку часоў Вялікай Айчыннай вайны з прыватных калекцый і фондаў Абласнога музея ваеннай славы, у тым ліку знакамітую «Кацюшу», джып ГАЗ-67Б і савецкі лёгкі бронеаўтамабіль.

Маштабная выстава ваеннай тэхнікі разгарнулася ў цэнтры Гомеля на плошчы Паўстання. Тут можна пабачыць як сучасныя адзінкі ўзбраення, так і стралковыя рарытэты. Экспанаты выставы перададзены з розных гарнізонаў. Характэрна, што ўзоры тэхнікі часоў Вялікай Айчыннай і сучаснага ўзбраення на экспазіцыі размясціліся вакол адной з візітных картак Гомеля — «танка Перамогі» — знакамітага Т-34, які быў устаноўлены на гомельскай плошчы Паўстання ў гонар вызваліцеляў ад нямецка-фашысцкіх захопнікаў у 1968 годзе.

Падарункам для гамяльчан да 80-годдзя вызвалення горада ад нямецка-фашысцкіх захопнікаў стаў унікальны фотадакументальны выставачны праект «80 гадоў міру і стварэння. Гомель — горад з XX стагоддзя па цяперашні час». Экспазіцыя пад адкрытым небам размясцілася на агароджы гомельскага цэнтральнага парку. Тут прадстаўлена сорак вялізных банэраў, якія запрашаюць паглыбіцца ў гісторыю горада. На выставе прадстаўлены як шырока вядомыя, так і ўнікальныя фота і дакументы. Падрыхтавала маштабную акспазіцыю каманда спецыялістаў Музея гісторыі Гомеля, Абласнога музея ваеннай славы, Гомельскага палацава-паркавага ансамбля і архіваў.

Да 80-годдзя вызвалення Гомеля ад нямецка-фашысцкіх захопнікаў маштабную акцыю «Захаваем гісторыю» падрыхтавалі Гомельская абласная арганізацыя грамадскага аб’яднання «Патрыёты Беларусі» і Федэрацыя прафсаюзаў Беларусі. Быў дадзены старт аўтапрабегу, у якім прынялі ўдзел больш за 80 актывістаў. Удзельнікі ўшанавалі памяць загінулых савецкіх войнаў каля брацкіх магіл на вуліцы Тралейбусная ў Гомелі, ва ўрочышчы Сямень у аграгарадку Пакалюбічы Гомельскага раёна, а таксама каля мемарыяла савецкім воінам у мікрараёне Касцюкоўка. Падчас наведвання месцаў памяці ўдзельнікі аўтапрапарбегу ўстанавілі інфармацыйныя таблічкі з QR кодамі.

— Беларусы заўсёды адрозніваліся сваёй гістарычнай памяццю. Вельмі прыемна, што ў акцыі разам прымаюць удзел моладзь, прадстаўнікі працоўных калектываў, актывісты грамадскіх арганізацый, палітычных партый, бо наша задача — захоўваць і перадаваць гістарычную памяць праз пакаленні, — падзяліўся старшыня Гомельскай абласной арганізацыі Беларускага прафсаюза работнікаў будаўніцтва і вытворчасці будаўнічых матэрыялаў, першы сакратар Гомельскага абласнога камітэта Камуністычнай партыі Беларусі Дзмітрый Мурашка, які паўдзельнічаў у аўтапрабегу разам са сваёй сям’ёй.

 Наталля КАПРЫЛЕНКА

Фота аўтара і belkagomel.by

Выбар рэдакцыі

Грамадства

Для непаседаў і іх бацькоў

Для непаседаў і іх бацькоў

Пабывалі ў першай дзіцячай мультыбрэндавай краме «Світанак Непаседа» і даведаліся, што пачым.