Вы тут

Загадчыца аддзялення інфекцыйнай бальніцы: Расслабляцца не варта


Да прыходу якіх інфекцый медыкі рыхтуюцца гэтай зімой? Якая сітуацыя з Covid-19? Чаму спецыялісты рэкамендуюць зрабіць прышчэпку супраць грыпу? Як, апроч вакцынацыі, кожны можа паклапаціцца пра ўласнае здароўе? Пагаварылі пра гэта з загадчыцай дыягнастычнага аддзялення Гарадской клінічнай інфекцыйнай бальніцы Вікторыяй Шалухай.


— Вікторыя Уладзіміраўна, што можна сказаць пра захворванне на Covid-19 на бягучы момант?

— Восеньскі перыяд адзначаны ўздымам каранавіруснай інфекцыі. Да нас у стацыянар, трапляюць у асноўным узроставыя пацыенты, якія маюць спадарожную паталогію: інфаркты, інсульты, анкалогію. Covid-19 у іх працякае не ў цяжкай форме; асноўныя сімптомы — тэмпература, кашаль, катар, слабасць.

— Якое лячэнне прымяняецца цяпер пры каранавірусе?

— Пры лёгкіх формах галоўная рэкамендацыя па-ранейшаму — багатае пітво, перш за ўсё — кіпячонай і негазаванай мінеральнай вады, травяных настояў, гарбаты. Сімптаматычнае лячэнне: зніжэнне тэмпературы, паласканне горла, устараненне закладзенасці носа. У стацыянарах прымяняецца антыкаагулянтная і антыагрэгантная тэрапія, а таксама сімптаматычная падтрымка спадарожнай паталогіі і, па паказаннях, супрацьвірусны прэпарат «Рэмдэсівір». Дзейнічаем строга па пратаколах лячэння. Звычайна пасля дзвюх кропельніц тэмпература ў пацыентаў падае, а праз 5 дзён у стацыянары ў 99% пацыентаў атрымліваем адмоўныя мазкі.

— Ці значыць гэта, што каранавірус перайшоў у разрад сезонных захворванняў і не ўяўляе сур’ёзнай небяспекі?

— Covid-19 нельга аднесці да сезонных захворванняў: пацыенты з такім дыягназам трапляюць да нас на працягу ўсяго года, хоць у халодную пару іх, вядома, больш, чым улетку. Сёння гэтая інфекцыя, безумоўна, значна менш агрэсіўная, чым у пачатку пандэміі. Аднак падступства каранавіруса ў тым, што ён знаходзіць і «падрывае» слабыя месцы ў арганізме. Так ён пагаршае, напрыклад, праблемы ў гіпертонікаў: многім з іх ранейшыя прэпараты ўжо не дапамагаюць справіцца з высокім ціскам.

Мы назіраем ўскладненні ў дыябетыкаў як падчас Covid-19, так і пасля яго. У людзей з паталогіямі дыхальнай сістэмы зніжаецца базавая сатурацыя (паказчык насычэння крыві кіслародам — заўв. аўтара), у іх развіваецца пнеўмафіброз. У многіх значна павялічваецца рызыка трамбозаў. На пачатковым этапе пандэміі ў людзей старэчага ўзросту мы назіралі сасудзістыя змены ў галаўным мозгу, якія выяўляліся ў неадэкватных паводзінах. У маладых нярэдка адзначалі пагаршэнне памяці, здольнасці засвойваць новую інфармацыю, канцэнтравацца. Як у перспектыве адаб’юцца наступствы Covid-19 на здароўі, думаю, ніхто сёння не вырашыцца прадказаць.

— У тых, перахварэў, па вашых назіраннях, з кожным разам каранавірус працякае лягчэй?

— Пра нейкія заканамернасці казаць не стала б. Вірус мутыраваў, яго клініка мянялася. Былі прыклады, калі пацыент двойчы хварэў лёгка, а на трэці раз, пры новым штаме — цяжка. Ці наадварот — першы раз чалавек трапіў у рэанімацыю, а другі перанёс лёгка, дома. Успамінаю жанчыну, якая ўпарта не хацела прышчапляцца, апыналася ў нас чатыры разы, і ў апошні — з найболей цяжкай формай. Думаю, шмат што залежыць ад індывідуальных асаблівасцяў арганізма.

— Прыход якіх інфекцый чакаецца гэтай зімой?

— Цяпер усе пацыенты з сімптомамі ВРВІ, якія паступаюць да нас, тэстуюцца на ковід, грып А і В, рэспіраторна-сінцыціальны вірус. Пакуль ніводнага выпадку іншых захворванняў, акрамя Covid-19, у нас не было. Але прадказаць, што наперадзе, немагчыма. У мінулым годзе ў гэты ж прыкладна час мы мелі справу з адэнавірусам, і ў некаторых пацыентаў ён працякаў цяжка. Трэба рыхтавацца і да ўспышкі грыпу. Папярэднія гады Covid-19 выцесніў грып, насельніцтва менш звычайнага прывівалася супраць яго, і на мой погляд, верагоднасць яго актывізацыі, дастаткова высокая.

— Вакцынацыя, на ваш погляд, — асноўная абарона ад грыпу і каранавіруса? Вы раілі б прышчапіцца супраць абодвух «пагроз»?

— Супраць грыпу раіла б прышчапіцца ўсім, у каго няма відавочных супрацьпаказанняў. Калі адбудзецца чарговая мутацыя штамаў, то існуючыя прэпараты могуць аказацца малаэфектыўнымі. Тым, хто раней ні разу не прышчапляўся супраць Covid-19, рэкамендавала б зрабіць і гэта. Калі ж вы вакцынаваліся, а то і не раз, лепш пракансультавацца на ўсялякі выпадак са сваім лекарам. Штам жа бесперапынна змяняецца.

— Пра што яшчэ варта памятаць у перыяд уздыму рэспіраторных захворванняў, каб мінімізаваць рызыкі заражэння?

— Трэба пазбягаць масавага збору людзей. Крамы, асабліва аптэкі, паліклінікі, бальніцы, трэба наведваць у масках і толькі па неабходнасці. Важна выконваць элементарную гігіену (мыць рукі, пазбягаць дакрананняў бруднымі рукамі да твару, не есці на вуліцы), рацыянальна і  паўнавартасна сілкавацца, не забываючыся пра гародніну і садавіну, шпацыраваць на свежым паветры, знаходзіць час для фізічнай актыўнасці і добра высыпацца. Пандэмія свінога грыпу (H1N1) у 2009 годзе, каранавірус у 2020 пераконваюць нас, што расслабляцца нельга. Дбаць пра здароўе, падтрымліваць свой імунітэт трэба рэгулярна.

Вольга ПАКЛОНСКАЯ

Фота прадастаўлена гераіняй

Выбар рэдакцыі

Грамадства

 Для чаго Аляксей Хомчык стаў урачом?

Для чаго Аляксей Хомчык стаў урачом?

«Дзядзька Васіль загінуў, ты павінен працягнуць яго справу. Ты добра вучышся, павінен стаць доктарам».

Грамадства

Буякі, суніцы і лісічкі — прыцэньваемся да падарункаў чэрвеня

Буякі, суніцы і лісічкі — прыцэньваемся да падарункаў чэрвеня

«Ёсць і імпартныя, іспанскія — яны па-ранейшаму ў раёне 70 рублёў за кіло, 30 рублёў — кантэйнер».

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.