Вы тут

У прасторы Палаца мастацтва прадставілі «RAVE» маладога мастака Андрэя Пічушкіна


Як вы ставіцеся да рэйваў? Ці ўдзельнічалі калі-небудзь у іх? Ці знаёма вам гэтая з’ява? Адказы будуць залежаць ад вашых музычных пераваг, а таксама магчымасцей баўлення часу, натуральна, узросту, месца жыхарства і немаведама чаго яшчэ... Між тым рэйвы як праява пэўнай субкультуры і ўжо звыклая частка жыцця людзей, як правіла, пэўнага ўзросту не пужаюць грамадства, тых, хто з асцярогай глядзеў у бок не зусім зразумелых, месцамі нічым не абмежаваных і, што зноў жа трэба ўлічваць, нетыповых для краіны працэсаў. І сёння рэйвам нават прысвячаюцца мастацкія выстаўкі ў розных, у тым ліку рэспубліканскіх, галерэях. На мінулым тыдні ў прасторы ZAL#2 Палаца мастацтва прадставілі «RAVE» маладога мастака Андрэя Пічушкіна. Куратарамі сталі Андрэй Баль і Кацярына Янкоўская. 


«Rave body», 2023 г.

Рэйвы, падабаецца гэта каму ці не, ужо некалькі дзесяцігоддзяў вабяць аматараў электроннай музыкі. Аднак справа, вядома, не толькі ў ёй. Папулярнасці падобных вечарын спрыяюць цікавыя дыджэі, месцы правядзення (а гэта начныя клубы, фестывалі на адкрытым паветры ці іншыя публічныя прасторы; часта, у Беларусі таксама, яны праводзіцца на тэрыторыях былых заводаў, ангараў, складоў і іншых прамысловых аб’ектаў), наяўнасць разняволеных аднадумцаў. Адным словам, атмасфера — адсутнасць праяўленняў фармалізму і магчымасць уцёкаў у свет ілюзій... 

Таму зварот Андрэя Пічушкіна да тэмы як мінімум цікавы. У нечым нават смелы — усё ж аўтар пакШыцуль малавядомы, і выступіць на шырокую аўдыторыю з нечаканай серыяй здаецца рызыкоўным крокам. Адна справа — увага аднадумцаў, равеснікаў, іншая — ацэнка масавага гледача і экспертаў. Аднак з’явіўся шанс здзівіць. 

Андрэй Пічушкін нарадзіўся ў 1998 годзе ў Гомелі. У 2014-м скончыў школу № 19 абласнога цэнтра. 2014–2018 гады — перыяд вучобы ў Гомельскім дзяржаўным мастацкім каледжы. Удзельнік выставак з 2018 года. Апошнім часам малады жывапісец прэзентуе праекты ў Мінску. 

«Tefal», 2022 г.

Выстаўка «RAVE» прызначана адлюстраваць успрыманне аўтарам постсавецкай рэчаіснасці і трансфармацыю гэтай эпохі сёння. Мастак, дарэчы, ледзь не абышоў саму падзею — большасць яго работ паказвае вуліцы, хатнія памяшканні, недзе больш-менш рэалістычны фон адсутнічае. Гледача прымушаюць засяродзіцца на кожным складніку кампазіцыі (іх на карцінах выстаўкі няшмат), паразважаць пра сімволіку тых ці іншых прадметаў. Разам з тым героі нібыта трапляюць у аб’ектыў фатографа — дакучлівага, настырнага, але ўважлівага. Гэта нечакана, але сама вечарына паўстае перад гледачом не так часта. Андрэем Пічушкіным рэйв разглядаецца хутчэй як прыемны хаос — у процівагу надакучліваму парадку. Аўтар разглядае з’яву як пазбаўленне ад усеагульнага напружання. Прапаноўваюцца параўнанні 
і з першабытнымі танцамі... 

«The Watcher», 2021 г.

Пра што хочацца гаварыць пасля прагляду серыі, дык пра святло, колер, рытм. З іх дапамогай усё несвяточнае, непараднае, нефармальнае перамяшчаецца на першы план, адлюстроўваючы энергію маладосці, якая помніць і марыць. Камусьці серыя Андрэя Пічушкіна можа здацца важным выказваннем, для кагосьці не знойдзецца нават нагоды для сузірання. Магчыма, падобныя выстаўкі маюць патрэбу ў каментарыі. А гэтым разам ён даволі разгорнуты. Так, персанальная выстаўка Андрэя Пічушкіна працягнецца да 26 лістапада, і ў дапаўненне да яе Палац мастацтва і сам аўтар склалі даволі аб’ёмную і разнастайную праграму. Так, сёння павінна адбыцца лекцыя Мар’яны Карповіч «Прырода танца — дакрананне да боскага». Паслязаўтра пройдзе майстар-клас пакадравай анімацыі ад Сяргея Галушкіна. 23 лістапада запланавана куратарская экскурсія Кацярыны Янкоўскай. 24-га ў праграме мерапрыемстваў значыцца майстар-клас ад лідара лабараторыі руху Сяргея Паяркова. Лекцыя Алега Абносава «Танец як ключ да разумення чалавецтва» пройдзе 25 лістапада. Нарэшце, сустрэча з мастаком Андрэем Пічушкіным анансавана на 26 лістапада. Арганізатары абяцаюць: аўтар правядзе экскурсію па выстаўцы, падрабязна раскажа пра сэнс ці сэнсы работ, распавядзе пра крыніцы натхнення і, натуральна, адкажа на пытанні гледачоў. 

Яўгенія ШЫЦЬКА

Выбар рэдакцыі

Экалогія

Які інтарэс ў Беларусі ля Паўднёвага полюса

Які інтарэс ў Беларусі ля Паўднёвага полюса

Антарктыка, далёкая і блізкая.

Грамадства

Да купальнага сезона падрыхтуюць 459 пляжаў

Да купальнага сезона падрыхтуюць 459 пляжаў

Існуюць строгія патрабаванні да месцаў для купання.

Моладзь

Вераніка Цубікава: Натхняюся жаданнем дзяліцца

Вераніка Цубікава: Натхняюся жаданнем дзяліцца

Яе песні займаюць першыя радкі ў музычных чартах краіны, пастаянна гучаць на радыё і тэлебачанні.