Вы тут

«Полымя». Лістападаўскі нумар


Адкрываючы штораз вокладку «тоўстага» літаратурна-мастацкага часопіса, чакаеш, што ж выданне прапануе з буйных жанраў прозы — якая аповесць, які раман стануць падзеяй у тваім чытацкім жыцці. І заўсёды, калі гэтага не бачыш, прысутнічае пэўнае расчараванне: а дзе новы раман?.. 


У лістападаўскім нумары часопіса «Полымя» нас чакае сустрэча з першай часткай рамана-версіі «Непераможны злом» вядомага беларускага празаіка Віктара ПРАЎДЗІНА. Цікавым падаецца эпіграф да першага раздзела «Час ракавы»: «Воля мая свабодная амаль толькі ў адным абранні дабра і зла; у іншых адносінах яна адгароджана адусюль». Словы належаць свяціцелю Ігнацію Бранчанінаву. Раман — пра чалавека, пра людзей на зломе сацыяльна-палітычным. Відавочна, што пісьменнік спрабуе адказаць на складаныя пытанні, звязаныя з непераможнасцю духа чалавечага, пра асобу, маральны выбар у розных абставінах. 

Лістапад у чытача «Полымя» атрымліваецца паэтычным — у адным нумары выступаюць паэты Таццяна Яцук, Віктар Кунцэвіч, Алена Басікірская, Серафіма Бестава, Алена Гінько, Андрэй Дарожкін, Яўген Гучок, Тамара Лазнюха, Генрых Тарасевіч, Марыя Ючкавіч. Сапраўдны атрад творцаў з розных мясцін нашай краіны!.. 

У раздзеле «Навуковыя публікацыі» — артыкулы Тамары Тарасавай «З жыццём спрачацца няможна...», прысвечаны 130-годдзю з дня нараджэння Максіма Гарэцкага, і Наталлі Кузьміч «Колер як катэгорыя паэтыкі: мадэль і функцыянаванне ў структуры апавядання». Міхал Бараноўскі ў артыкуле «Эпісталярый Максіма Багдановіча» робіць спробу сістэматызаваць лісты паэта, якія зберагліся да нашых дзён. Пра акадэміка І. Змоціна ў сваім нарысе «Яго называлі «літаратуразнаўцам ад Бога» распавядае Эмануіл Іофе. 

Зіновій Прыгодзіч прапануе свой погляд на творчасць і месца ў літаратуры добра вядомага чытачу празаіка Алеся Жука («На чым трымаецца жыццё»). Ёсць у нарысе і такія словы: «...Выходжу з дома і па звычцы шукаю вачыма знаёмую постаць на лаўцы суседняга пад’езда. А яе — няма. І скрушна, і самотна становіцца на душы: яшчэ адным сябрам паменела. Сцяшае іншае, больш істотнае. Тое, што постаць Алеся Жука засталася ў нашай літаратуры. І, думаецца, застанецца назаўсёды. Бо яго творы — пра тыя вечныя (духоўныя, маральныя) каштоўнасці, на якіх трымаецца наша жыццё». 

На літаратурна-крытычных старонках нумара — размова пра краязнаўчыя кнігі Святланы Кошур, манаграфію Наталлі Бахановіч «Абліччы іншага ў шматмоўнай літаратуры Беларусі XIX стагоддзя», кнігу ўспамінаў Уладзіміра Васько «Зігзагі лёсу».

Мікола БЕРЛЕЖ

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Шалям засталося прыкласці зусім няшмат намаганняў, каб жаданая мэта была дасягнута.

Грамадства

Камандзір вядзе за сабой

Камандзір вядзе за сабой

Пяцікурснік Полацкага дзяржаўнага ўніверсітэта імя Е. Полацкай быў удастоены ганаровага звання «Чалавек года Віцебшчыны — 2023».

Моладзь

Вераніка Цубікава: Натхняюся жаданнем дзяліцца

Вераніка Цубікава: Натхняюся жаданнем дзяліцца

Яе песні займаюць першыя радкі ў музычных чартах краіны, пастаянна гучаць на радыё і тэлебачанні.