Вы тут

Да чаго прыводзіць непатушаная цыгарэта?


Практычна кожны дзень, а то і па некалькі разоў у суткі ў розных куточках краіны чуваць гук пажарнай сірэны. Гэта ратавальнікі спяшаюцца на чарговае паведамленне аб узгаранні. У пошуку пацярпелых яны адважна заходзяць у ахопленыя полымем хаты і кватэры — і нярэдка выносяць на руках нежывое цела...


Пік пажараў з гібеллю людзей у жыллёвым фондзе прыходзіцца на кастрычнік — красавік. Гэта звязана з больш актыўнай эксплуатацыяй пячнога абсталявання і электрасетак. Многіх надзвычайных сітуацый можна было б пазбегнуць, калі б людзі загадзя рыхтаваліся да пахаладання: праверылі і пры неабходнасці адрамантавалі печ, упэўніліся ў надзейнасці электраправодкі і абагравальных прыбораў. Праўда, мала толькі праверыць. Да трагічных наступстваў нярэдка прыводзіць і грэбаванне правіламі пажарнай бяспекі пры эксплуатацыі печы і электрапрыбораў. Што датычыцца печы, гаспадары дапускаюць яе перагрэў, рана зачыняюць засланку, не клапоцяцца аб перадтопачным лісце, які ўратуе ад раптоўнай іскры.

Аднак большасці пажараў можна было б пазбегнуць, калі б людзі вялі здаровы лад жыцця: не курылі ў памяшканні, не выпівалі пры гэтым.

Статыстыка несуцяшальная: сёлета практычна кожны другі загінулы на пажары знаходзіўся ў стане алкагольнага ап’янення. Усяго па прычыне неасцярожнага абыходжання з агнём падчас курэння загінула 245 чалавек. Пры гэтым 169 ахвяр агню на момант трагедыі знаходзілася «пад мухай».

Другі шанц на жыццё

Праўда, некаторым аматарам пакурыць дома, а потым заснуць шанцуе. Днямі ратавальнікам паступіла паведамленне аб узгаранні жылога дома ў аграгарадку Шашкі Стаўбцоўскага раёна. Першыя падраздзяленні МНС, якія прыбылі да месца выкліку, устанавілі, што жылы дом гарыць адкрытым полымем.

«Першапачаткова ў нас была інфармацыя, што ў хаце знаходзяцца людзі: гаспадыня і яе сын, — расказаў старшы інструктар-ратавальнік Юрый Янушэвіч. — Калі мы прыбылі да месца пажару, то ад суседзяў даведаліся, што гаспадыня самастойна змагла пакінуць дом. Унутры заставаўся яе сын. Мы правялі разведку, пасля чаго адразу ж стварылі звяно і ўвайшлі ўнутр».

У кухні на падлозе у беспрытомным стане быў знойдзены мужчына. Выкарыстоўваючы спецыяльную маску, супрацоўнікі МНС вынеслі пацярпелага на свежае паветра і перадалі брыгадзе хуткай медыцынскай дапамогі. Выратаваны быў дастаўлены ў прыёмнае аддзяленне Стаўбцоўскай цэнтральнай раённай бальніцы. У прамым сэнсе людзі засталіся без даху над галавой. Таксама быў пашкоджаны легкавы аўтамабіль, які знаходзіўся побач з хатай. Як пасля ўстанавілі следчыя, да пажару прывяло неасцярожнае абыходжанне з агнём пры курэнні.

Па гэтай жа прычыне ўзгаранне адбылося ў Радашковічах. Калі падраздзяленні МНС прыбылі да месца выкліку, то выявілі шчыльнае задымленне ўнутры жылога дома.

«Суседзі на вуліцы паведамілі, што ў доме знаходзяцца людзі, — распавёў начальнік дзяжурнай змены Уладзіслаў Паўловіч. — Утварыўшы звяно газадымаабаронцаў, мы ўвайшлі ў дом і ў адным з пакояў на падлозе знайшлі мужчыну. Ён знаходзіўся ў прытомнасці, але не разумеў, што адбываецца, бо быў вельмі п’яны. Мы вывелі яго на вуліцу. Потым зноў вярнуліся ў дом. Па словах мужчыны, там яшчэ знаходзілася яго жонка». У шпіталізацыі пацярпелыя не мелі патрэбы. А вось аб рамонце ў найбліжэйшы час гаспадарам варта паклапаціцца.

Ад згубнай звычкі аднаго нядобрасумленнага грамадзяніна пацярпелі жыхары шматпавярховага дома ў Мачулішчах, што пад Мінскам. Паведамленне аб узгаранні кватэры на першым паверсе двухпавярховага шматкватэрнага жылога дома ратавальнікам паступіла ноччу. Прыбыўшы да месца выкліку, супрацоўнікі МНС убачылі, што з кватэры, размешчанай на першым паверсе, ідзе дым.

Наступствы пажараў, якія адбыліся па віне курцоў

«Пры пад’ездзе да дома ў акне кватэры ўбачылі мужчыну, які спрабаваў выбрацца, — згадалі ратавальнікі. — Праз акно яго дасталі. Нашы калегі адначасова вывелі з вышэй размешчаных кватэр шэсць чалавек, траіх з іх — па трохкаленнай лесвіцы». На шчасце, абышлося без пацярпелых.

Як канстатуе афіцыйны прадстаўнік Мінскага абласнога ўпраўлення МНС Анастасія Швайбовіч, практычна ўсе курцы мяркуюць, што сітуацыя знаходзіцца ў іх пад кантролем і што з імі бяда дакладна не здарыцца. «Як правіла, менавіта саманадзейнасць і становіцца прычынай пажару, — заўважае яна. — Тэмпература недакуркаў, якія тлеюць, дастатковая для ўзгарання гаручых матэрыялаў: выклікаўшы тленне, сам недакурак праз некаторы час згасае. Але ачаг тлення пры спрыяльных умовах ператвараецца ў пажар».

Прадстаўнікі ратавальнага ведамства рэкамендуюць выконваць правілы пажарнай бяспекі ў побыце, не дапускаць курэння ў жылых памяшканнях, сачыць за тым, каб запалкі і цыгарэты пасля выкарыстання былі патушаны. «Усталюйце ў жылых пакоях аўтаномныя пажарныя апавяшчальнікі, якія ў выпадку ўзнікнення пажару своечасова папярэдзяць вас аб небяспецы, — раіць Анастасія Швайбовіч. — І памятайце: адна непатушаная цыгарэта можа загубіць жыццё. І не адно! Агонь бязлітасны, беражыце сябе і сваіх блізкіх!»

Дайсці да кожнага

На жаль, па трагічныя прыклады далёка хадзіць не трэба. 20 кастрычніка пажар адбыўся ў адной са сталічных кватэр. Загінуў гаспадар 1963 года нараджэння. Праз пяць дзён няшчасны выпадак быў зафіксаваны ў Віцебску: агонь забраў жыццё мужчыны 1960 года нараджэння. Адразу да дзвюх смерцяў 18 кастрычніка прывяло ўзгаранне ў жылым доме ў Свіслачы: заўчасна з жыцця пайшлі мужчыны 1979 і 1982 гадоў нараджэння. 1 лістапада пажар успыхнуў у аграгарадку Валеўка Навагрудскага раёна, у выніку чаго загінуў мужчына 1964 года нараджэння. Усе гэтыя трагічныя выпадкі аб’ядноўвае адна прычына, па якой загінулі людзі, — неасцярожнасць пры курэнні.

З мэтай папярэджання пажараў і гібелі людзей ад іх па прычыне неасцярожнага абыходжання з агнём падчас курэння стартавала рэспубліканская інфармацыйна-прапагандысцкая кампанія «Не прапальвай сваё жыццё!». Акцыя пройдзе ў два этапы і завершыцца 28 лістапада.

Як адзначае афіцыйны прадстаўнік Міністэрства па надзвычайных сітуацыях Яўген Бараноўскі, ратавальнае ведамства пастаянна сочыць за аператыўнай абстаноўкай з пажарамі, аналізуе асноўныя рызыкі іх узнікнення. «Адпаведна праводзіцца комплекс мерапрыемстваў, накіраваных на папярэджанне пажараў у жылым фондзе, — патлумачыў ён. — З улікам высокага ўзроўню небяспекі ўзнікнення пажараў, звязаных з неасцярожным абыходжаннем з агнём падчас курэння, праводзіцца акцыя „Не прапальвай сваё жыццё!“. Прафілактычныя мерапрыемствы пройдуць на прамысловых прадпрыемствах, у пунктах прыёму другаснай сыравіны, інтэрнатах, месцах размяшчэння аўтакрам, а таксама ў месцах масавага знаходжання людзей. Супрацоўнікі Міністэрства па надзвычайных сітуацыях правядуць інтэрактыўную гутарку з удзельнікамі акцыі і прадэманструюць фільм „Ахвяры згубнай звычкі“, а таксама відэаролікі, у якіх расказваецца пра наступствы неасцярожнага абыходжання з агнём пры курэнні».

Аб гэтым ратавальнікі нагадаюць і ў ВНУ, каледжах, ліцэях, цэнтрах бяспекі, іншых месцах з масавым знаходжаннем людзей. Для ўдзельнікаў акцыі будуць падрыхтаваны віктарыны, конкурсы мініяцюр, адкрытыя дыялогі, тэматычныя дыскатэкі, дзе кожны зможа замацаваць свае веды ў галіне бяспекі жыццядзейнасці.

У месцах з масавым знаходжаннем людзей і на адкрытых пляцоўках прапагандысты МНС правядуць «Парк бяспечных атракцыёнаў», «Шоу без цыгарэт». У гэты час усе ахвотныя змогуць адмовіцца ад курэння і памяняць цыгарэты на каштоўныя прызы і падарункі, а таксама зрабіць яркія фатаграфіі з роставай лялькай і на фоне тэматычных стэндаў. Будзе аб’яўлены конкурс на размяшчэнне ў інтэрнэце найлепшага відэароліка па тэме «Я не куру ў ложку і табе не раю», у якім зможа прыняць удзел кожны.

Ратавальнікі прапануюць далучацца да мерапрыемстваў, каб перамагчы ў барацьбе са згубнай звычкай і зрабіць жыццё больш бяспечным.

Вераніка КАНЮТА

Фота прэс-службы МНС

Выбар рэдакцыі

Грамадства

24 лютага 1944 Рагачоўшчына была вызвалена ад нямецка-фашысцкіх захопнікаў

24 лютага 1944 Рагачоўшчына была вызвалена ад нямецка-фашысцкіх захопнікаў

Подзвіг байцоў Рагачоўска-Жлобінскай наступальнай аперацыі.

Здароўе

Падхапіць гепатыт А нескладана. Як засцерагчыся?

Падхапіць гепатыт А нескладана. Як засцерагчыся?

Паразмаўлялі з урачом-эпідэміёлагам Мінскага абласнога цэнтра гігіены, эпідэміялогіі і грамадскага здароўя Алінай Емашовай.