Вы тут

Адміралам-суайчыннікам прысвячаецца


Барыс ДАЛГАТОВІЧ — адзін з нямногіх даследчыкаў, гістарычных публіцыстаў, хто займаецца ваенна-гістарычнай статыстыкай. Член Саюза пісьменнікаў Беларусі, кандыдат гістарычных навук, ён выдаў не адзін дзясятак кніг. Шэраг з іх — у серыі «Гісторыя для школьнікаў».


Новае выданне — «Адміралы-франтавікі — нашы землякі». Аўтар даволі лаканічна расказвае пра 38 адміралаў, якія ўдзельнічалі ў Вялікай Айчыннай вайне 1941 — 1945, і якія сваімі лёсамі цесна злучаны з Беларуссю. Дарэчы, на самым пачатку кнігі Б. Далгатовіч сцвярджае, што сярод нашых землякоў — беларусаў і ўраджэнцаў Беларусі высокім званнем адмірала адзначана каля 100 чалавек. Уражлівая, пагадзіцеся, лічба! Асабліва, калі ўлічыць, што Беларусь усё ж не марская дзяржава. Да гісторыі пытання пра адміралаў: упершыню адміралы згадваюцца ў Італіі ў XII стагоддзі.  

Яшчэ да Вялікай Айчыннай вайны званні адміралаў — у 1940 годзе — сярод іншых былі прысвоены: Мікалаю Зайцу, Георгію Міхалькову, Уладзіміру Рыбалтоўскаму, Максіму Скрыганаву, Паўлу Трайніну — контр-адмірала; Аляксандру Арлову — віцэ-адмірала; Пятру Папковічу — інжынер-контр-адмірала. На старонках кнігі «Адміралы-франтавікі — нашы землякі» — расповяд пра многія цікавыя лёсы, пра ваеначальнікаў, якія пакінулі прыкметны след у гісторыі Савецкай краіны. У горадзе Баранавічы нарадзіўся віцэ-адмірал Георгій Халасцякоў (1902 — 1983). Пра яго баявыя справы гавораць узнагароды — званне Героя Савецкага Саюза, тры ордэны Леніна, тры ордэны Чырвонага Сцяга, ордэн Суворава I ступені, два ордэны Ушакова I ступені, ордэны Айчыннай вайны I ступені і Чырвонай Зоркі. Са снежня 1944 года наш суайчыннік — камандуючы Дунайскай флатыліяй, на чале якой вызваляў ад фашыстаў Югаславію, Венгрыю, Аўстрыю, Славакію. Унікальная ваенна-марская біяграфія — у беларуса адмірала Мікалая Амелькі (1914 — 2007), які ўжо ў пасляваенны час быў камандуючым Ціхаакіянскім флотам, намеснікам Галоўнакамандуючага ВМФ СССР, начальнікам Генштаба Узброеных сіл СССР.

У Дзяржынскім раёне нарадзіўся Герой Савецкага Саюза контр-адмірал Антон Гурын, у Оршы — інжынер-віцэ-адмірал Абрам Генкін, у Пухавіцкім раёне — віцэ-адмірал Іван Хурс, які быў узнагароджаны чатырма ардэнамі Чырвонай Зоркі (займаў пасаду намесніка начальніка Галоўнага штаба ВМФ па разведцы).   

Кніга Барыса Далгатовіча пабачыла свет у выдавецтве «Беларусь» накладам 1200 экзэмпляраў. Набыць яе можна ў кнігарнях ААТ «Белкніга» па ўсёй краіне, а таксама ў краме «Акадэмкніга» у Мінску па адрасе: прапсект Незалежнасці, 72.

Сяргей ШЫЧКО

Выбар рэдакцыі

Грамадства

24 лютага 1944 Рагачоўшчына была вызвалена ад нямецка-фашысцкіх захопнікаў

24 лютага 1944 Рагачоўшчына была вызвалена ад нямецка-фашысцкіх захопнікаў

Подзвіг байцоў Рагачоўска-Жлобінскай наступальнай аперацыі.

Здароўе

Падхапіць гепатыт А нескладана. Як засцерагчыся?

Падхапіць гепатыт А нескладана. Як засцерагчыся?

Паразмаўлялі з урачом-эпідэміёлагам Мінскага абласнога цэнтра гігіены, эпідэміялогіі і грамадскага здароўя Алінай Емашовай.