Вы тут

Лекі ад восені: як супрацьстаяць сезоннай хандры


Хандра — вечная спадарожніца восені. Але пазбавіцца ад яе не так і складана. Дастаткова выконваць некаторыя правілы. Пра іх расказаў загадчык аддзела грамадскага здароўя Мінскага абласнога цэнтра гігіены, эпідэміялогіі і грамадскага здароўя Віктар Даніловіч.


— Стрэс можа выклікаць любы фактар: ад званка будзільніка (грубасці мужа, крыку суседкі і непрыемнасці на працы) да выпадковага выйгрышу ў латарэю і нечаканага павышэння па службе. Такіх «фактаў» назапашваецца нават за дзень. А калі на вуліцы цёмна, холадна і сыра, маркоціцца пачынаюць нават закаранелыя аптымісты. Пад каўпак сябе не схаваеш, таму выйсце адно: навучыцца жыць са стрэсам і правільна рэагаваць на яго, кажа ўрач.

Як мінімізаваць негатыў:

  • Не спрачайцеся без патрэбы, пазбягайце канфліктных сітуацый.
  • Не пераацэньвайце ступень важнасці праблемы, магчыма, затрачаныя эмоцыі не вартыя чаканага выніку.
  • Пакідайце невялікую долю сумневу ў поспеху справы. Прадугледжвайце і адмоўны вынік, каб няўдача не ашаламіла вас. Майце запасны варыянт і падрыхтуйце «шляхі адступлення».
  • Не дайце адмоўным думкам авалодаць вамі, не канцэнтруйцеся толькі на іх.
  • Імкніцеся кожнае выпрабаванне, якое выпала на вашу долю, успрымаць як чарговы ўрок мужнасці, прабачэння і цярпення.
  • Будзьце аптымістамі, верце, што вашы непрыемнасці не самыя страшныя. Успомніце, што вакол многа людзей, якім нашмат цяжэй, чым вам цяпер.
  • Не займайцеся самакапаннем, проста перад сном спакойна прааналізуйце мінулы дзень, паглядзіце на факты ва ўпор.
  • Не паддавайцеся пачуццю схавацца ад навакольнага свету і адысці ад праблем. Гэта спараджэнне дэпрэсіі і шлях у нікуды. Найлепшым варыянтам выхаду з такой сітуацыі з’яўляецца абмеркаванне назапашаных праблем з сябрамі і членамі сваёй сям’і: вы атрымаеце неабходную падтрымку і не будзеце адчуваць сябе самотным.
  • Усе вашы непрыемнасці выкладзіце падрабязна на паперы. Скамячце гэты ліст і выкіньце.
  • Дазвольце сабе (калі няма сведак) выкрычацца, даць поўную волю эмоцыям, выплюхнуць іх вонкі.
  • Зляпіце вашу «крыўду» з пластыліну, сцісніце яе, камячце, лайце, біце.
  • Часцей усміхайцеся, імкніцеся сканцэнтравацца на станоўчых эмоцыях, вучыцеся радавацца малому.
  • Навучыцеся замяшчаць непрыемныя думкі прыемнымі. Не спрабуйце змяніць тое, што не ў вашых сілах, і паспрабуйце гэта прыняць.
  • Запомніце: усе праблемы рана ці позна вырашаюцца.

Фізічная нагрузка і смех у дапамогу

Зняць стрэс дапамагаюць і заняткі фізкультурай. Гэта цудоўны спосаб зняць напружанне і падтрымліваць сябе ў добрай фізічнай форме.

Не забывайце адпачываць, расслабляцца, бегайце трушком. Расслабце плечы, зніміце напружанне з плечавога пояса, вам стане лягчэй. Прымайце кантрасны душ, аблівайцеся халоднай вадой. Кожную раніцу пачынайце ўсміхацца, а потым смяяцца хоць бы тры хвіліны. Медытацыя смехам паляпшае настрой на цэлы дзень.

Час надышоў

Вось прыкметы, якія падкажуць, што час рабіць пэўныя крокі для паляпшэння самаадчування:

  • пастаянны непакой;
  • пачуццё стомленасці, якое не праходзіць;
  • немагчымасць засяродзіцца;
  • болі ў сэрцы;
  • расстройствы стрававання, алергія;
  • болі ў мышцах спіны, шыі і плячэй.

Экспрэс-дапамога

  • Займіцеся фізічнымі практыкаваннямі, пагуляйце на свежым паветры, зрабіце прабежку, пакатайцеся на веласіпедзе, роліках.
  • Засяродзьцеся на дыханні. Канцэнтрацыя на працэсе дыхання прымушае на час забыцца пра крыніцу стрэсу. Павольна ўдыхніце носам, затрымайце дыханне на некалькі секундаў, выдыхніце павольна праз нос.
  • Цалкам расслабцеся.
  • Майце зносіны з людзьмі.
  • Змяніце абстаноўку, схадзіце ў кіно, музей, тэатр.

Алена КРАВЕЦ

Выбар рэдакцыі

Жыллё

Аднапакаёвыя кватэры імкліва даражэюць

Аднапакаёвыя кватэры імкліва даражэюць

Прычына — даступныя крэдыты і ажыятажны попыт.

Культура

Чым сёлета будзе адметны фестываль песні і паэзіі ў Маладзечне?

Чым сёлета будзе адметны фестываль песні і паэзіі ў Маладзечне?

Арганізатары і ўдзельнікі свята запэўніваюць — знайсці сабе адпачынак па душы зможа кожны.

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.