Дажджы, навальніцы і зноў дажджы

Здавалася б, за ўвесь чэрвень дажджы былі рэдкімі гасцямі ў нашай краіне. У той жа час на апошнім тыдні першага летняга месяца, дзякуючы магутным цыкланічным віхрам, колькасць ападкаў прыкметна павялічылася. І ў апошні дзень чэрвеня будуць ісці дажджы, але чакаюцца яны ў асноўным па ўсходняй палове краіны, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

Такім чынам, у пятніцу пераважна па ўсходняй частцы Беларусі чакаюцца кароткачасовыя дажджы, месцамі навальніцы. Днём пры навальніцах месцамі ўзмацненне ветру парывамі да 15—20 м/с. Максімальная тэмпература паветра будзе ў межах ад плюс 20 градусаў па ўсходзе да плюс 27 градусаў у заходніх раёнах краіны.

Паводле слоў сіноптыкаў, ліпень прыме эстафету ў свайго папярэдніка разам з дажджлівым надвор'ем. У суботу ўначы месцамі па захадзе, раніцай і днём — на большай частцы тэрыторыі краіны пройдуць кароткачасовыя дажджы, у асобных раёнах навальніцы. Ноччу і раніцай месцамі слабы туман. Тэмпература паветра ўначы будзе вагацца ад плюс 10 градусаў да 16 цяпла, а ўдзень — ад плюс 19 градусаў на паўночным захадзе да плюс 28 градусаў на паўднёвым усходзе.

У нядзелю ноччу месцамі, а днём на большай частцы нашай тэрыторыі прагназуюцца кароткачасовыя дажджы, у асобных раёнах навальніцы. Уначы тэмпература дасягне 8—15 градусаў цяпла, а па паўднёвым усходзе — да 17 цяпла. Удзень чакаецца 19—26 градусаў вышэй за нуль.

Паводле папярэдніх прагнозаў айчынных сіноптыкаў, у панядзелак месцамі па краіне пройдуць кароткачасовыя дажджы, прагрымяць навальніцы. Уначы прагназуецца плюс 9—16 градусаў, а ўдзень — 21—28 градусаў цяпла. У аўторак месцамі па краіне чакаюцца кароткачасовыя дажджы, магчымыя навальніцы. Уначы слупок тэрмометра дасягне плюс 9—16 градусаў, а ўдзень — плюс 22—29 градусаў.

А ў сераду сіноптыкі чакаюць выключна гарачае сонечнае надвор'е. У гэты дзень будзе пераважна без ападкаў. Уначы чакаецца 10—17 цяпла. Днём паветра прагрэецца да 23—30 градусаў.

Сяргей КУРКАЧ