Вы тут

Куды рухаюцца карцінкі або Што паглядзець у кінатэатрах у чэрвені?


Класіка — гэта, канешне, добра, але што нам, у рэшце рэшт, прапануе дзень сённяшні? Вырашылі разабрацца, як рэспубліканскі кінапракат адгукаецца на падзеі апошніх тыдняў, сярод якіх галоўныя, безумоўна, — Міжнародны дзень абароны дзяцей і засведчаны ім пачатак летніх канікул, і што для заўзятых сінефілаў рыхтуе найбліжэйшы месяц. Забягаючы наперад, скажам, што відовішча знойдзецца для гледачоў як дасведчаных, так і не вельмі. Вашай увазе — гід па кіна- (і не зусім) маршрутах чэрвеня.


Кадр з мультфільма «Падарожжа на Месяц», 2020 г.

Праект «Вясёлае лета»

Вядома, летняя пара цалкам і без астатку належыць дзецям, а юны глядач — заўсёды жаданы госць у любой кіназале, асабліва ў суправаджэнні плацежаздольных дарослых. Бо малеча разумее: дзе кіно, там абавязкова і вядро папкорну, а яшчэ салодкія напоі — па бутэльцы на падлакотнік, якая-небудзь вабная цацка і напаследак — духмяны «дыжэстыў». Словам, кінатэатры сардэчна сустракаюць такіх гасцей.

Адной з нагод вярнуць дзяцей з бацькамі ў кіназалы з’яўляюцца, вядома, школьныя канікулы і іх прадвеснік — Міжнародны дзень абароны дзяцей. Традыцыйна да гэтай даты пракатныя арганізацыі па ўсёй краіне рыхтуюць адмысловыя кінаактыўнасці, на якія цягам першага летняга месяца ў рамках забаўляльна-асветніцкай праграмы школьных лагераў прыходзяць вялікія групы навучэнцаў. Задаваць трэнды ў гэтым напрамку выпала сталічнаму «Кінавідэапракату», што сёлета прываблівае публіку праектам «Вясёлае лета».

«Якія планы на летнія вакацыі ў нашых юных гледачоў? Здаецца, мы ведаем — правесці лета ярка і незабыўна! А наша сетка кінатэатраў вам у гэтым дапаможа!» — абяцаюць у прэс-службе прадпрыемства. Распачалося анімацыйнае лета паказам мультфільма «Дарога дадому», створанага рэжысёрамі Гары Крыпсам і Клэр Найт у 2021 годзе ў капрадукцыі ЗША, Аўстраліі і Канады. Сюжэт немудрагелістай карціны, знаёмы па мультыплікацыйных хітах мінулых гадоў «Мадагаскар» і «Рыа», апавядае пра жывёл, якія збеглі з тэматычнага парку, каб знайсці свой сапраўдны дом. 

Працягваецца праграма сёлетнім расійскім мультфільмам «Каты Эрмітажа» рэжысёра Васіля Равенскага пра ката Вінсента, які ўліваецца ў высакародны эрмітажны «прайд», хаваючы ад астатніх сябра — мыш. У сваю чаргу звярок кінкажу (сямейства янотавых), герой пазалеташняй амерыканскай мультыплікацыі «Віва» рэжысёраў Кіка дэ Мікі і Брэндана Джэфардса, выпраўляецца ў незабыўнае музычнае падарожжа да сваёй каханай. Гэтаксама ў пошуках дарагога чалавека — маці — у музычнае падарожжа выпраўляецца і дзяўчынка Фэй Фэй у кітайска-амерыканскай стужцы «Падарожжа на Месяц» 2020 года рэжысёраў Глена Кіна і Джона Карса. Шмат музыкі і ў мінулагодняй рэжысёрскай рабоце Фарзада і Кіянуша Далвандаў «Звералэнд» кітайска-венгерскага паходжання, якая апавядае пра аднаўленне вайны хвастатых. 

На салодкае стваральнікі праекта «Вясёлае лета» прызапасілі некалькі шматбюджэтных хітоў сусветнага пракату. Першым з іх стане геройскі мультфільм «Супергадаванцы» 2022 года пастаноўшчыкаў Джарэда Штэрна і Сэма Лівайна. Паводле сюжэта, каманда хатніх гадаванцаў на чале з сабакам Крыптам вырашаюць дапамагчы гаспадарам-супергероям у нялёгкай справе абароны жыхароў Зямлі. У другім з іх — леташніх «Монстрах на канікулах: Трансфарманія» — «манстрыфікавальны прамень», загадкавае вынаходства Ван Хельсінга, выходзіць са строю і ператварае Дракулу і іншых монстраў у людзей, а людзей, наадварот, — у монстраў. Увенчвае кінапраграму камедыйны мультфільм «Кот у ботах 2: Апошняе жаданне» Джоэля Кроўфарда і Хануэля Мяркады — працяг знакамітай франшызы, які ўварваўся ў пракат летась.

Анімацыйная гармата

Эстафету з рук мінскага «Кінавідэапракату» прыняў Магілёў. З нагоды Міжнароднага дня абароны дзяцей экраны ўсходняй сталіцы атакавалі мультфільмы, а ў кіназалах ладзіліся адмысловыя імпрэзы. Так, прэм’ерны паказ расійскай стужкі «Маша і Мядзведзь у кіно: Скажыце „Ой!“» (рэж. Арцём Навумаў) суправаджаўся творчымі нумарамі, конкурсамі і розыгрышам падарункаў. Акрамя таго, у першы дзень лета юныя магілёўскія кінаманы змаглі бясплатна паглядзець расійскія мультфільмы «Каты Эрмітажа» і «Царства супраць разбойнікаў» (рэж. Марына Ляскова-Гакі; 2022), а таксама вынік капрадукцыі Бельгіі, Францыі і Германіі «Літл Гром» (рэж. Ксав’е Джакамеці, Тобі Генкель; 2020) пра спробы маленькага хлопчыка Якары заарканіць няўлоўнага мустанга Літла Грома. Апошні дэманстраваўся ў спецыяльным кінатэатры для гледачоў з абмежаванымі здольнасцямі па слыху і зроку.

Кадр з мультфільма «Тры разбойнікі і леў», 2023 г.

З крыху слабейшым імпэтам да справы падышлі ў іншых абласцях. Зрэшты, многія з ужо названых карцін увайшлі і ў рэгіянальныя кінаафішы. Да таго ж, у першыя чэрвеньскія дзянькі пракат у рэгіёнах прапануе гледачу свежыя анімацыйныя работы «Яга і кніга заклінанняў» (рэж. Уладзімір Сакаў; Расія), «Трыа ў пер’і 2» (рэж. Бенжамін Квобек, Метэ Танге; Германія, Бельгія, Нарвегія) і «Тры разбойнікі і леў» (рэж. Расмус А. Сівертсен; Нарвегія), а таксама ігравыя карціны «Гадаванец Юрскага перыяду. Страчаная тайна» (рэж. Раян Белгарт, Крыс Хойт; ЗША) і леташнюю «Каляндар Ма(й)я» (рэж. Вікторыя Фанасюціна; Расія) пра небяспечныя гульні падлеткаў з часам.

Мельпамена на службе кіно

Безумоўна, не дадуць засумаваць у чэрвені і даросламу гледачу — дасведчанаму і патрабавальнаму. Усе асноўныя мерапрыемствы для такой аўдыторыі канцэнтруюцца ў сталіцы. Бадай, кожны сінефіл, роўна як і тэатрал, хаця б аднойчы сутыкаўся з праектам Th eatreHD, які за некалькі гадоў свайго існавання ў кінатэатры «Цэнтральны» (у асноўным) стаў сапраўднай традыцыяй і ўжо ўспрымаецца як неад’емная частка айчыннага кіналандшафту. Асаблівым выратаваннем паўстае праект летняй парой — у час сцэнічнай засухі, калі большасць тэатральных устаноў па ўсёй краіне сыходзіць на адпачынак.

Кадр з дакументальнага фільма «Сальвадор Далі: У пошуках бяссмерця», 2018 г.

Чэрвеньская афіша Th eatreHD радуе разнастайнасцю. Ад канцэртных фільмаў да опер, ад драматычных спектакляў да балетаў — арганізатары праекта ўводзяць гледачоў у свет выканальніцкіх мастацтваў. У рэпертуары: першая пастаноўка «Ганны Балейн» Гаэтана Даніцэці ў Венскай оперы 2011 года з Ганнай Нятрэбкай на галоўнай партыі; канцэрт аркестра musicAeterna пад кіраўніцтвам грэка-расійскага дырыжора Тэадора Курэнтзіса «Курэнтзіс: Моцарт» 2021 года; складанае механіка-піратэхнічнае відовішча 2011 года «Доктар Фаўст» наўпрост са сцэны Шэкспіраўскага тэатра «Глобус» у Вялікабрытаніі; балет «Рамэа і Джульета» (2017), які стаў візітоўкай Тэатра оперы і балета Екацярынбурга; дакументальны фільм «Сальвадор Далі: У пошуках бяссмерця», створаны пяць гадоў таму, а таксама многае іншае.

Безумоўная класіка

Прывычнае для слыху айчынных аматараў рухомых карцінак і замежнае слова Cinemascope. Так называецца адзін з найбольш паважаных і вядомых кінапраектаў у Беларусі, чыя дзейнасць не абмяжоўваецца аднымі фільмапаказамі, а ўключае таксама і правядзенне канцэртаў, лекцый. У найбліжэйшым месяцы Cinemascope падрыхтаваў для сваёй аўдыторыі адразу некалькі цікавых імпрэз. Перш за ўсё звяртаем вашу ўвагу на штотыднёвы кінаклуб «Анталогія», у рамках якога сёння ў Скульптурнай зале Музея-майстэрні Заіра Азгура ў Мінску з выкарыстаннем бесправадных навушнікаў пройдзе паказ класічнага фільма «Уладар мух», пастаўленага брытанцам Пітэрам Брукам у 1963-м паводле нашумелага рамана Уільяма Голдынга.

Кадр з фільма «Берлін. Сімфонія вялікага горада», 1927 г.

Акрамя таго, ужо заўтра паказам стужкі «Той, хто бяжыць па лязе» 1982 года выпуску ў арт-прасторы «Манахром», што размясцілася ў былых заводскіх памяшканнях па вуліцы Кастрычніцкай у Мінску, завершыцца рэтраспектыва фільмаў Новага Галівуда. Думаецца, легендарны фільм Рыдлі Скота ў прадстаўленнях патрэбы не мае. Як не мае такой патрэбы карціна 1986 года «Ханна і яе сёстры» рэжысёра Вудзі Алена, якую можна будзе ўбачыць там жа ў сераду 7 чэрвеня ў рамках вялікай рэтраспектывы жывога класіка. Наперадзе гледачоў чакаюць 14 чэрвеня «Злачынствы і праступкі» (1989) і 21 чэрвеня — «Кулі над Брадвеем» (1994) — яскравыя ўзоры інтэлектуальнай камедыі.

Найбольшай жа ўвагі вартая новая сінтэтычная праграма «Сімфонія вялікага горада» ў прасторы «Манахром» — рэтраспектыва фільмаў пра Берлін, горад з трагічным лёсам, чым і прываблівае да сябе ўвагу кінематаграфістаў з усяго свету. Яна адкрыецца ў нядзелю, 4 чэрвеня, нямым фільмам 1927 года «Берлін. Сімфонія вялікага горада» (рэж. Вальтэр Рутман) з жывым музычным суправаджэннем ад Аляксандра Музыкантава (фартэпіяна) і Аляксандра Ганькова (марымба) і пасля чатырох паказаў завершыцца 1 ліпеня дэбютнай карцінай Яна Оле Герштэра «Простыя цяжкасці Ніка Фішэра» (2012).

Каміла НАВІНКІНА

Выбар рэдакцыі

Фінансы

Як банкі абараняюць ад махляроў грашовыя пераводы

Як банкі абараняюць ад махляроў грашовыя пераводы

За чатыры месяцы 2024 года раскрывальнасць цяжкіх кіберзлачынстваў у параўнанні з аналагічным перыядам мінулага года павысілася на 19%. 

Спорт

Настасся Касцючкова: Чалавек у калясцы не павінен быць зачынены ў чатырох сценах

Настасся Касцючкова: Чалавек у калясцы не павінен быць зачынены ў чатырох сценах

Фехтаваць наша гераіня ўмее трыма відамі зброі: шабляй, шпагай і рапірай. 

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.