Вы тут

У суботу ў Мінску прайшлі спаборніцтвы па кіналагічным спорце


6 мая на трэніровачнай пляцоўцы Jump city прайшлі спаборніцтвы па аджыліці. 


Аджыліці — гэта від кіналагічнага спорту, у якім сабака пераадольвае трасу з розных перашкод. Гаспадар у гэты час бяжыць побач і падае каманды, накіроўваючы свайго чацвераногага сябра. 

Галоўны трэнер Jump city agility club Наталля Лабчэўская тлумачыць: «Аджыліці — цікавы захапляльны спорт, у якім чалавек і сабака становяцца сапраўднай камандай! Наогул гэта выдатны спосаб правесці час цікава, весела, і актыўна. У аснове гэтага віду спорту ляжыць якасна наладжаны кантакт паміж чалавекам і сабакам. Кіраванне жывёлай здзяйсняецца толькі голасам, жэстамі і целам падчас руху. На трасе чалавеку забаронена выкарыстоўваць прысмакі, цацкі, дакранацца да сабакі або перашкод. Толькі голас, толькі жэсты, толькі цела чалавека — па сутнасці, гэта тая мова, якой мы размаўляем са сваім гадаванцам у звычайным жыцці. Сабаку трэба пераадолець трасу з розных снарадаў у пэўнай паслядоўнасці за максімальна кароткі час. Маршруты ніколі не паўтараюцца, паслядоўнасць іспытаў кожны раз розная, і ведае яе толькі суддзя, які рыхтуе трасу перад спаборніцтвамі».

Удзельнікам дазваляецца азнаёміцца з месцам толькі перад пачаткам забегаў, калі траса ўжо падрыхтавана. Пры гэтым даецца ўсяго 5-7 хвілін на вывучэнне трасы. За гэты час удзельнікі праходзяць па ўсёй лакацыі, запамінаючы паслядоўнасць перашкод і выбіраючы найлепшыя траекторыі, па якіх павядуць сабаку. І ўжо затым пачынаюцца забегі.

— Прычына росту папулярнасці аджыліці заключаецца ў яго дэмакратычнасці. Ім займаюцца аматары спорту ад падлеткавага да пенсійнага ўзросту, прычым з сабакамі самых розных парод і памераў, — распавядае ўдзельнік спаборніцтваў Анатоль Мацвіенка. — У адрозненне ад выстаў тут можна заваяваць прызавое месца і з метысам-дварняком, калі ён добра навучаны. Галоўны сакрэт поспеху крыецца ў кантакце чалавека (яго прынята называць хэндлерам) з яго чацвераногім напарнікам. Сам трэніровачны працэс арганізуецца ў гульнявой форме, на пазітыве. Ён дастаўляе задавальненне і чалавеку, і жывёле. Сабакі, заражаючыся жаданнем прайсці дыстанцыю як мага чысцей і хутчэй, шчыра радуюцца поспеху. Прысмакі за старанні – важны, але далёка не адзіны стымул. Я ўвесь час чую, што чацвераногі спартсмен, згледзеўшы зборы на трэніроўку, залівіста брэша, віляе хвастом і любымі даступнымі яму спосабамі выказвае гатоўнасць ехаць на пляцоўку. Роўна гэтак жа паводзіць сябе Картэс, мой баявы напарнік пароды Шэлці. 

Учора спаборнічалі больш за сорак пар удзельнікаў. Пераможцы атрымалі дыпломы, а іх чацвераногія сябры — смачны корм, прадстаўлены спонсарамі турніру.

Дарэчы, Анатоль Мацвіенка і яго напарнік Картэс занялі першае месца пры праходжанні трасы А1 у катэгорыі М.

Віктар ІВАНЧЫКАЎ

Фота аўтара

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі?