Вы тут

Промапраект «Выбіраем студатрад!» прайшоў у Мінску


Маштабнае інфармацыйнае мерапрыемства «Выбіраем студатрад!» было праведзена ў сталіцы на адкрытай пляцоўцы Студэнцкай вёскі 4 мая Рэспубліканскім штабам студэнцкіх атрадаў БРСМ.


Пасля абеду насупраць студэнцкіх інтэрнатаў разгарнулася інтэрактыўная выставачная экспазіцыя Беларускіх студэнцкіх атрадаў. Тут можна было і пазнаёміцца з іх дасягненнямі, і згуляць у камандныя гульні, і нават паўдзельнічаць у майстар-класе па роспісе будаўнічых касак. І галоўнае: тыя студэнты, якіх зацікавіла дзейнасць арганізацыі мелі магчымасць запоўніць анкеты і гарантавана атрымаць працу ў трэцім працоўным семестры 2023 года.

Другі сакратар цэнтральнага камітэта БРСМ Аляксандр Прохараў падкрэсліў, што галоўная задача — гэта аператыўна інфармаваць аб тых унікальных магчымасцях і ўмовах, якія ёсць у нашай Беларусі. Моладзі прапануецца круглагадовая занятасць у саставе студэнцкіх атрадаў, сярод якіх будаўнічыя, сельскагаспадарчыя, педагагічныя, сэрвісныя, вытворчыя, экалагічныя і медыцынскія. Таксама Аляксандр Прохараў дадаў, што ў арганізацыі вельмі добра наладжана праца з наймальнікамі:

— Мы ўпершыню падпісалі пагадненне з Гомсельмашам. Каля двухсот чалавек будзе працаваць у Гомелі. На новы ўзровень выйшла нашае супрацоўніцтва з Беларускай чыгункай. Сотні хлопчыкаў і дзяўчынак упершыню будуць працаваць на чыгунцы.

Другі сакратар цэнтральнага камітэта БРСМ Аляксандр Прохараў

Цікава тое, што ў моладзі ёсць унікальная магчымасць у вольны ад вучобы час атрымаць дадатковыя рабочыя спецыяльнасці: такія, як праваднік пасажырскага вагона, манцёр пуці і слесар рухомага саставу. Па словах Аляксандра Прохарава, пасля гэтага малады чалавек у перспектыве адчувае сябе больш упэўнена на рынку працы, таксама павялічваецца яго прафесійная кампетэнцыя і заработная плата ў саставе студатрада.

Паводле інфармацыі прэс-службы БРСМ, у год 60-годдзя Беларускіх студэнцкіх атрадаў падчас промапраекта «Выбіраем студатрад!», які стартаваў у лютым 2023 года, заяўкі на працу ў саставе студатрадаў ужо падало больш за 19 тысяч чалавек.

Лізавета ГОЛАД

Фота аўтара

Выбар рэдакцыі

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі. 

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.