Вы тут

Найстарэйшая міліцэйская альма-матар у Магілёве адзначыла юбілей


Установа адлічвае гісторыю ад 2 красавіка 1948 года, калі па загадзе міністра дзяржбяспекі СССР у Магілёве была заснавана школа перападрыхтоўкі сяржанцкага складу корпуса галоўнага ўпраўлення аховы на чыгуначным і водным транспарце. Афіцэры і курсанты школы былі задзейнічаны ў шматлікіх знакавых мерапрыемствах, у тым ліку з удзелам першых асоб савецкай дзяржавы.


Яны неаднойчы рызыкавалі жыццём, калі абаранялі ў пасляваенныя гады грамадства ад бандфарміраванняў, прымалі ўдзел у выкананні спецзаданняў СССР, забяспечвалі ахову правапарадку на ўсесаюзна значных мерапрыемствах. З падачы і пры непасрэдным удзеле супрацоўнікаў і курсантаў школы ў 1952 годзе пад Магілёвам быў закладзены мемарыял у гонар батальёна міліцыі пад камандаваннем легендарнага Канстанціна Уладзімірава. Капітан і амаль усе яго байцы загінулі, стрымліваючы на подступах да горада націск нямецкіх войскаў у першыя дні вайны.

Інстытутам школа стала 9 гадоў таму, і яе выпускнікі ўжо не раз пацвярджалі сваю высокую кваліфікацыю і прафесіяналізм. Ва ўрачыстасцях, прысвечаных знамянальнай даце, прынялі ўдзел міністр унутраных спраў Беларусі Іван Кубракоў, намеснік дзяржсакратара Савета Бяспекі Аляксандр Невяроўскі, старшыня Магілёўскага гарвыканкама Аляксандр Студнеў. У сваім віншаванні міністр адзначыў, што са сцен установы выйшла шмат прафесіяналаў, якія якасна і на высокім узроўні забяспечваюць грамадскі парадак і бяспеку грамадзян. Ён нагадаў, што сённяшні час выпрабоўвае краіну на трываласць, і вельмі важна з гонарам несці званне супрацоўніка органаў унутраных спраў.

— Грамадзяне краіны могуць быць спакойныя: бяспека ім гарантавана, — падкрэсліў ён. —Для гэтага ў нас ёсць усе неабходныя сілы і сродкі, а галоўнае — падрыхтаваныя кадры, сярод якіх нямала выпускнікоў магілёўскага інстытута міліцыі МУС.

Міністр паведаміў, што ў найбліжэйшай будучыні будзе працягнута рэканструкцыя помніка байцам батальёна Канстанціна Уладзімірава. Подзвіг мужных міліцыянераў з'яўляецца прыкладам для кожнага супрацоўніка органаў унутраных спраў, у тым ліку для курсантаў, якія робяць першыя крокі ў прафесіі.

У святочны дзень шэраг супрацоўнікаў інстытута атрымалі ўзнагароды. Ганаровай граматай Дзяржсакратарыята Савета Бяспекі ўшанаваны начальнік ВНУ Валерый Палішчук, Падзяка дзяржсакратара Савета Бяспекі аб'яўлена начальнікам кафедры прыкладной фізічнай і тактыка-спецыяльнай падрыхтоўкі і крымінальнага працэсу і крыміналістыкі Аляксею Скачынскаму і Дзмітрыю Свірыдаву. Першаму намесніку начальніка інстытута Юрыю Шкаплераву, намесніку начальніка па ідэалагічнай рабоце і кадравым забеспячэнні Дзмітрыю Пануждаеву і старшыні ветэранскай арганізацыі Мікалаю Жалезняку міністр МУС уручыў корцікі.

Супрацоўнікі, курсанты і ветэраны інстытута ўшанавалі памяць выпускнікоў, якія загінулі пры выкананні службовых абавязкаў.

У гэты ж дзень у інстытуце МУС адбылася XІ Міжнародная навукова-практычная канферэнцыя, у якой прынялі ўдзел прадстаўнікі ўстаноў адукацыі праваахоўнага і грамадзянскага блокаў, практычных падраздзяленняў органаў унутраных спраў Беларусі, Расіі і Казахстана. Гэтым разам мерапрыемства было прысвечана тэме «Барацьба са злачыннасцю: тэорыя і практыка».

— Абмен вопытам з калегамі з дружалюбных краін садзейнічае ўдасканаленню форм барацьбы са злачыннасцю, — падкрэсліў начальнік Магілёўскага інстытута МУС генерал-маёр міліцыі Валерый Палішчук. — Немалаважную ролю ў падрыхтоўцы будучага афіцэра адыгрывае навукова-даследчая дзейнасць выкладчыкаў і курсантаў. Будні нашых супрацоўнікаў — ад маладога спецыяліста да прафесара — напоўнены пошукам і рэалізацыяй новых форм і метадаў работы.

Для гасцей свята быў падрыхтаваны вялікі святочны канцэрт, у якім прымалі ўдзел як прафесійныя калектывы і салісты, так і самі курсанты. Ад выпускнікоў інстытута розных гадоў прагучала кранальная песня «Не паўтараецца такое ніколі». Скончыўся вечар гімнам, які тут спявалі яшчэ ў тыя гады, калі інстытут быў школай транспартнай міліцыі, і песняй «Беларусь, наперад!».

Нэлі ЗІГУЛЯ

Фота Варвары СЯРОВАЙ

Выбар рэдакцыі

Грамадства

 Для чаго Аляксей Хомчык стаў урачом?

Для чаго Аляксей Хомчык стаў урачом?

«Дзядзька Васіль загінуў, ты павінен працягнуць яго справу. Ты добра вучышся, павінен стаць доктарам».

Грамадства

Буякі, суніцы і лісічкі — прыцэньваемся да падарункаў чэрвеня

Буякі, суніцы і лісічкі — прыцэньваемся да падарункаў чэрвеня

«Ёсць і імпартныя, іспанскія — яны па-ранейшаму ў раёне 70 рублёў за кіло, 30 рублёў — кантэйнер».

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.