Вы тут

На кніжнай выставе ўзнагародзілі пераможцаў конкурса «BOOKTRAILER»


Уладзімір Караткевіч, Якуб Колас, Ян Баршчэўскі, Мікола Гусоўскі... Сучасная беларуская моладзь адшуквае сваіх улюбёных герояў і аўтараў у беларускай літаратуры. А каб падштурхнуць юнакоў і дзяўчат да гэтых пошукаў, у мінулым годзе Рэспубліканскі моладзевы цэнтр і Саюз пісьменнікаў Беларусі пры падтрымцы Міністэрства адукацыі абвесцілі Рэспубліканскі конкурс «BOOKTRAILER». Двуххвілінныя ролікі пра беларускія кнігі, знятыя школьнікамі і студэнтамі, дасылаліся з усіх рэгіёнаў Беларусі. І вось падчас ХХХ Мінскай міжнароднай кніжнай выставы-кірмаша былі падведзеныя вынікі. Удзельнікаў аказалася столькі, што давялося перагледзець умовы конкурса: напачатку арганізатары збіраліся абраць пераможцу з першых пяцідзесяці прэтэндэнтаў, але ўжо да канца лістапада колькасць заявак перавысіла сотню, а ўсяго было пададзена больш за шэсць з паловай соцень заявак. Конкурс праводзіўся ў трох намінацыях: «Старажытная беларуская літаратура», «Новая беларуская літаратура» і «Найноўшая беларуская літаратура». Былі вызначаны таксама ўладальнікі Гран-пры і прыза глядацкіх сімпатый. 


Прысутныя на цырымоніі ўзнагароджання мелі магчымасць паглядзець відэаролікі, прызнаныя журы лепшымі. У намінацыі «Старажытная літаратура» лепшым быў прызнаны буктрэйлер пра паэму Міколы Гусоўскага «Песня пра зубра». Лацінамоўная эпічная паэма часоў Адраджэння, у якой з любоўю і гонарам паказваецца беларуская зямля і яе народ, натхніла аўтарскі калектыў з СШ № 5 горада Смаргонь — Цімафея Забрамскага, Ангеліну Патанейка і Валерыю Садоўскую. І гэта не адзіная перамога конкурса, калі прагучала назва той навучальнай установы. У намінацыі «Новая беларуская літаратура» перамог ролік па кнізе Яна Баршчэўскага «Шляхціц Завальня», які знялі таксама навучэнцы СШ № 5 горада Смаргонь — Маргарыта Дудко, Караліна Кавяка, Антон Шалік, Віялета Чартовіч і Данііл Карасевіч. Атрымалася сапраўдная мініэкранізацыя: на ўроку беларускай літаратуры адзін з вучняў засынае і бачыць сон па матывах апавядання Яна Баршчэўскага «Пра чарнакніжніка і цмока». А каб даведацца, чым закончыцца інтрыгоўны сюжэт, глядачу прапануюць звярнуцца да кнігі. 

Пераможца ў намінацыі «Найноўшая літаратура» Ілля Братачкін з СШ № 2 горада Слаўгарада паказаў сваё бачанне паэмы Якуба Коласа «Новая зямля». Прыз глядацкіх сімпатый заваяваў буктрэйлер па кнізе Уладзіміра Караткевіча «Дзікае паляванне караля Стаха». Яго зрабіў Мікіта Гарбачоў з Мінскага дзяржаўнага лінгвістычнага ўніверсітэту, перанесшы падзеі аповесці Караткевіча ў наш час. Гран-пры экспертнае журы прысудзіла буктрэйлеру па кнізе Яўгена Хвалея «Прынцэса з тусоўкі», які зняла Марыя Бондарава з СШ № 16 г. Мозыра. Аповесць пра сучасных падлеткаў з дэтэктыўным сюжэтам нязменна карыстаецца папулярнасцю ў школьнікаў.

Прызы лаўрэатам уручалі начальнік упраўлення па справах моладзі — намеснік начальніка Галоўнага ўпраўлення выхаваўчай работы і маладзёжнай палітыкі Міністэрства адукацыі Таццяна Сіманоўская і дырэктар-галоўны рэдактар Выдавецкага дома «Звязда», старшыня Саюза пісьменнікаў Беларусі Алесь Карлюкевіч.

Лепшыя буктрэйлеры конкурса будуць перададзеныя бібліятэчнай сістэме Беларусі — бо што лепей для падлеткаў і моладзі прарэкламуе кнігу, чым крэатыўна аформленае меркаванне іх равеснікаў?

Людміла ІВАНОВА

Выбар рэдакцыі

Грамадства

Аднапакаёвыя кватэры імкліва даражэюць

Аднапакаёвыя кватэры імкліва даражэюць

Прычына — даступныя крэдыты і ажыятажны попыт.

Культура

Чым сёлета будзе адметны фестываль песні і паэзіі ў Маладзечне?

Чым сёлета будзе адметны фестываль песні і паэзіі ў Маладзечне?

Арганізатары і ўдзельнікі свята запэўніваюць — знайсці сабе адпачынак па душы зможа кожны.

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.