Вы тут

Бунцэвіч: Спектаклі Жугжды заўсёды адрозніваюцца высокім ўзроўнем


Упершыню пасля кавіднага перыяда на папулярным міжнародным маладзёжным тэатральным форуме аднавілася традыцыя абмеркавання спектакляў. І гэтыя круглыя сталы карыстаюцца ў аматараў тэатра не меншай цікавасцю, чым самі пастаноўкі, бо дзе яшчэ можна пачуць настолькі цікавыя і разнастайныя разважанні аб сучасных тэндэнцыях і плынах, як не падчас такіх бясед? У саставе сёлетніх экспертаў выступаюць музычна-тэатральны крытык Надзея Бунцэвіч, доктар мастацтвазнаўства Вераніка Ярмалінская, расійскі драматург і рэжысёр Мікалай Каляда, расійскі літаратурны і тэатральны крытык Капіталіна Какшанёва і іншыя. Па выніках форума журы назаве лепшы спектакль «М@rt.кантакта-23» , пакуль тэатразнаўцы ацэньваюць моцныя і слабыя бакі пастановак.


Сёння, напрыклад, гаворка ішла пра спектаклі другога дня форума — «Кароль Лір» тэатра-студыі «Невялікі драматычны тэатр» з Санкт-Пецярбурга і «Локіс» Гродзенскага абласнога тэатра лялек. 

Тэатр з Піцера ўжо не ўпершыню прыязджае на фестываль і заўсёды на яго спектаклях поўны аншлаг. «Кароль Лір» не стаў выключэннем. Пастаноўкі культавага рэжысёра Льва Эрэнбурга заўсёды выклікаюць шмат эмоцый і ўражваюць сваёй натуралістычнасцю. Жанр «Караля Ліра» рэжысёр наогул вызначае як «крывавая клаўнада». Яго пастаноўка працягвалася аж пяць гадоў. Як удакладняе стваральнік, ён наогул спектаклі меней года не ставіць. «Кароль Лір» — першая пастаноўка Шэкспіра ў рэпертуары НДТ і зроблена яна ў стылі першых спектакляў тэатра — у вострым жанры трагіфарса, гіньоля, гратэска. 

Меркаванні крытыкаў падзяліліся на поўнае адмаўленне да поўнага прызнання. Напрыклад, Капіталіна Какшанёва назвала пастаноўку «Шэкспірам па-за культурай» і станоўча ацаніла толькі ролю блазана (актрыса Таццяна Рабаконь). «Усё астатняе — балаган», — падсумавала яна. Балгарская актрыса Невена Міцева, якую гледачы ўбачаць у спектаклі балгарскага тэатра «Сляза і смех» — «Агнес, жонка Уіла» (пастаноўка пра Шэкспіра, прычым з пункту гледжання яго жонкі Агнес) наадварот у захапленні ад убачанага. «Вельмі цікавы спектакль, якраз пра тое, што зараз у свеце адбываецца, — падкрэсліла яна. — І кожны ў ім на сваім месцы».

Леў Эрэнбург прызнаўся, што яму было цікава пачуць заўвагі крытыкаў. «Я вельмі крануты, усё было вельмі шчыра, — сказаў ён. — Калі кажуць пра тое, што ў тэатры нельга, а што можна, мяне гэта толькі раздражняе. Галоўнае не гэта, а тое, для чаго гэта робіцца — матыў. Аднак сёння прагучалі вельмі тонкія заўвагі і я іх абавязкова ўлічу». 

Больш салідарнымі тэатразнаўцы былі наконт спектакля гродзенскага тэатра — «Локіс» вядомага беларускага рэжысёра Алега Жугжды. За аснову ўзятая ліцвінская легенда пра мядзведзяў-перакрутаў. 

Надзея Бунцэвіч заўважыла, што спектаклі гэтага рэжысёра заўсёды адрозніваюцца высокім ўзроўнем. Наогул, гродзенскі тэатр ляляк адзін з мацнейшых у плане рэжысёрскай работы, эстэтыкі. І «Локіс» не выключэнне. У ім закладзена глыбокая думка. Гледачу прапануецца разабрацца — містычны сюжэт або рацыянальны. На думку крытыка, спектакль пачынаецца з містыкі, а фінал яго — рацыянальны. Гераіню забілі, грошы падзялілі — у гэты момант і адбылося тое самае пераўтварэнне ў звера. 

Нэлі ЗІГУЛЯ

Фота аўтара

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Шалям засталося прыкласці зусім няшмат намаганняў, каб жаданая мэта была дасягнута.

Грамадства

Камандзір вядзе за сабой

Камандзір вядзе за сабой

Пяцікурснік Полацкага дзяржаўнага ўніверсітэта імя Е. Полацкай быў удастоены ганаровага звання «Чалавек года Віцебшчыны — 2023».

Моладзь

Вераніка Цубікава: Натхняюся жаданнем дзяліцца

Вераніка Цубікава: Натхняюся жаданнем дзяліцца

Яе песні займаюць першыя радкі ў музычных чартах краіны, пастаянна гучаць на радыё і тэлебачанні.