Вы тут

Прэм’еру твораў кампазітара Галіны Гарэлавай рыхтуе Дзяржаўны камерны хор Беларусі


Яны прагучаць у канцэрце, прымеркаваным да 100-годдзя з дня нараджэння харавога дырыжора Ганны Зелянковай.


Адмысловую праграму In memoriam рыхтуе яе вучаніца Наталля Міхайлава, яка з’яўляецца мастацкім кіраўніком Дзяржаўнага камернага хора Рэспублікі Беларусь. Сустрэча памяці выдатнага дырыжора і выкладчыцы адбудзецца 19 сакавіка а 16-й гадзіне ў Белдзяржфілармоніі, у зале імя Рыгора Шырмы, яшчэ аднаго выдатнага хормайстра Беларусі. Вядома, ад такіх канцэртаў чакаеш перш за ўсё менавіта сустрэчы з беларускай музыкай — і слухачы змогуць ацаніць харавы цыкл «Начны пілігрым» Галіны Гарэлавай, які прагучыць упершыню. У гэты вечар будуць выкананы яшчэ творы айчынных кампазітараў, у прыватнасці, Аляксандра Літвіноўскага і Алены Атрашкевіч. А таксама руская харавая музыка — творы Сяргея Рахманінава, Георгія Свірыдава, Валерыя Гаўрыліна. Справа ў тым, што ў асобе Ганны Зелянковай спляліся дзве культурныя традыцыі.

Калісьці пасля вайны выпускніцу Ленінградскай кансерваторыі запрасіў на працу ў Мінск наш славуты кампазітар Анатоль Багатыроў, які ўзначальваў Беларускую кансерваторыю. Яна не пабаялася прыехаць у пасляваенны Мінск у 1949 годзе. Працы было шмат. Па-першае — выкладанне ў кансерваторыі (адпрацавала на кафедры харавога дырыжыравання 55 гадоў). Па-другое, непасрэдна дырыжыраванне: Ганна Паўлаўна на практыцы паказвала сваім выхаванцам, што значыць працаваць з калектывам. Яна больш дзесяці гадоў была мастацкім кіраўніком хору Беларускага радыё. Выбірала для выканання творы беларускіх кампазітараў. І паказвала прыклад сваім вучням, якія пасля працягвалі справу падтрымкі беларускай музыкі. Між іншым, у Зелянковай выпала вучыцца Міхаілу Дрынеўскаму, які шмат гадоў быў мастацкім кіраўніком і галоўным дырыжорам Народнага хору імя Генадзя Цітовіча. А многія вучні Ганны Паўлаўны і цяпер паспяхова працуюць на ніве беларускай культуры. Напрыклад, такія, як заслужаны дзеяч мастацтваў Беларусі Ларыса Іконнікава, якая з’яўляецца мастацкім кіраўніком Гродненскай капэлы, і мастацкі кіраўнік і галоўны дырыжор заслужанага калектыву Рэспублікі Беларусь Дзяржаўнага камернага хору Наталля Міхайлава. Ганна Зелянкова зрабіла значны ўнёсак у беларускую культуру, падрыхтавала шмат вучняў, якія і цяпер працуюць у розных рэгіёнах і самых розных калектывах. Некаторыя прымуць удзел у канцэрце разам з калектывамі, якімі кіруюць. Напрыклад, Святлана Кунцэвіч, кіраўнік узорнага хору Рэспубліканскай гімназіі-каледжа пры Беларускай дзяржаўнай акадэміі музыкі, Алена Лацапнёва, якая працуе з узорным хорам «Ліра» сярэдняй школы № 66 Мінска.

Памяць — праява ўдзячнасці людзей, якія імкнуцца годна ўшанаваць асобу настаўніцы. Яе вобраз будзе натхняць удзельнікаў канцэрта — праз фота і відэа, якія захоўваюцца ў сям’і Ганны Зелянковай.

Канцэрт — гэта доказ, што працягвае жыць справа Ганны Паўлаўны Зелянковай, якая стала лёсам для многіх. І калі мы кажам пра адмысловую школу харавой музыкі Беларусі, то павінны памятаць пра тых, хто яе ўзбагачаў і развіваў у розныя перыяды існавання. А гэта і музыканты, і дырыжоры, і кампазітары, якія паспяхова ствараюць харавую музыку ў нашы дні. Канцэрт — гэта таксама і нагода для таго, каб адкрыць яе для сябе.

Ларыса ЦІМОШЫК

Прэв’ю: pexels.com

Выбар рэдакцыі

Грамадства

Аднапакаёвыя кватэры імкліва даражэюць

Аднапакаёвыя кватэры імкліва даражэюць

Прычына — даступныя крэдыты і ажыятажны попыт.

Культура

Чым сёлета будзе адметны фестываль песні і паэзіі ў Маладзечне?

Чым сёлета будзе адметны фестываль песні і паэзіі ў Маладзечне?

Арганізатары і ўдзельнікі свята запэўніваюць — знайсці сабе адпачынак па душы зможа кожны.

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.