Вы тут

Арэхавы перакус: чаму б і не?


Вафельныя батончыкі з кубкам кавы не дададуць вам здароўя, затое забяспечаць «пустымі» калорыямі. Варта замяніць некарысныя дэсерты на арэхі. Гэта не толькі смачны ласунак, але і здаровы перакус. Да таго ж арэхі валодаюць унікальнымі ўласцівасцямі, якія дазваляюць ставіцца да іх як да сапраўднага суперфуду. Расказваем пра пяць смачных і карысных відаў арэхаў, якія дыетолагі раяць ужываць у перапынках паміж асноўнымі прыёмамі ежы. Калі, вядома, у вас няма на гэтыя прадукты алергіі ды іншых супрацьпаказанняў.


Фота: pixabay.com

«Царскі жолуд» — скарбніца ёду

Навагоднія святы, мандарынкі ды арэхі, загорнутыя ў фольгу, — такія ўспаміны аб грэцкім арэху (яшчэ яго называюць «царскім жолудам») захаваліся ў многіх, хто вырас у СССР. Але не ўсе ведаюць, што грэцкі арэх —скарбніца карысных рэчываў, у тым ліку жалеза, таму вельмі добра ўжываць яго пры анеміі. Таксама ў ім ёсць поліфенолы, вітаміны С, Е, магній, цынк. І, вядома, ёд, таму ўжыванне грэцкіх арэхаў спрыяе здароўю шчытападобнай залозы. Гэты дарунак прыроды багаты і «Амега-3» тлустай кіслатой.

Сакрэты землянога арэха

Звыклы нам арахіс, ці земляны арэх (ён названы так таму, што расце пад зямлёй) належыць да бабовых культур і валодае ўнікальнымі ўласцівасцямі, за якія яго любяць прыхільнікі здаровага сілкавання. У арахісе шмат бялку, ёсць вітаміны групы В, важныя для добрага функцыянавання нервовай сістэмы і мозга, утрымоўваюцца магній і фосфар. Варта толькі мець на ўвазе, што карысць прынясе несалёны арахіс, а лішак солі ў арганізме можа выклікаць ацёкі.

Селен умацуе імунітэт, лютэін — зрок

Фісташкі — скарбніца неабходнай нашаму арганізму клятчаткі. У фісташках мала калорый, затое ёсць вітаміны групы В, вітамін Е, фенолы, ненасычаныя тлустыя кіслоты, цынк, фосфар. Селен, што змяшчаецца ў фісташках, карысны для падтрымкі імунітэту, а лютэін умацоўвае зрок. Калій і магній, якія таксама ёсць у гэтым дарунку прыроды, вядомыя сваёй карысцю для здароўя сэрца.

Фундук: не ў лесе, а на плантацыі

З гэтым арэхам часта блытаюць лясны (ляшчыну). Менавіта з апошнім у многіх звязаны ўспаміны аб летніх паходах у піянерскім лагеры. Фундук, які з’яўляецца акультуранай формай дзікарослага ляснога арэха, — выдатны перакус. Ён узбагаціць арганізм вітамінамі А, Е, С, мікраэлементамі магніем, марганцам, жалезам, а таксама бялком, біяцінам, ненасычанымі тлушчамі і харчовымі валокнамі. Жуйце на здароўе і ўспамінайце сонечнае лета.

Калі адцвіў міндаль

У плодзе міндальнага дрэва змяшчаецца багата вітаміну Е, які паляпшае стан скуры. Міндаль спрыяе прафілактыцы сардэчных захворванняў дзякуючы высокаму ўтрыманню ў ім магнію і калію, а таксама за кошт зніжэння «дрэннага» халестэрыну. Вітаміны групы В дабратворна адаб’юцца на працы нервовай сістэмы. Як і іншыя арэхі, гэты прадукт багаты бялком, антыаксідантамі, ненасычанымі тлушчамі, харчовымі валокнамі — усё па спісе.

Суперфуд з тысячалетнай гісторыяй

Такім чынам, арэхі з’яўляюцца ідэальным перакусам таму, што дзякуючы карысным тлушчам, якія ўтрымліваюць, добра спаталяюць пачуццё голаду, павольна пераварваюцца. І узбагачаюць арганізм рознымі неабходнымі для здароўя рэчывамі. Нездарма на працягу тысячагоддзяў чалавек збіраў і ўжываў у ежу гэтыя цудоўныя плады. Клятчатка, што змяшчаецца ў арэхах, спрыяе зніжэнню вагі, аднак варта памятаць: арэхі каларыйныя. Але лішнія калорыі такі перакус здольны дадаць вам толькі ў тым выпадку, калі вы празмерна налягаеце на гэтыя раслінныя прадукты. Калі перакусваеце арэхамі штодня, нутрыцыёлагі рэкамендуюць прытрымлівацца дозы ў 30-35 грамаў, а таксама разнастаіць рацыён: сёння — грэцкія арэхі, заўтра — фундук і г. д. Смачна есці!

Агата СЛАВІНА

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Шалям засталося прыкласці зусім няшмат намаганняў, каб жаданая мэта была дасягнута.

Грамадства

Камандзір вядзе за сабой

Камандзір вядзе за сабой

Пяцікурснік Полацкага дзяржаўнага ўніверсітэта імя Е. Полацкай быў удастоены ганаровага звання «Чалавек года Віцебшчыны — 2023».

Моладзь

Вераніка Цубікава: Натхняюся жаданнем дзяліцца

Вераніка Цубікава: Натхняюся жаданнем дзяліцца

Яе песні займаюць першыя радкі ў музычных чартах краіны, пастаянна гучаць на радыё і тэлебачанні.