Вы тут

Чатыры простыя спосабы сяўбы дробнага насення


Дробнае насенне складана раўнамерна размеркаваць у грунце пры сяўбе. У некаторых месцах яно ўзыходзіць рэдка, у іншых, наадварот, занадта часта. Можна звярнуцца да прарэджвання ўсходаў, але не ўсе культуры добра пераносяць такую працэдуру. Радыска пойдзе ў стрэлку, а морква і зусім спыніцца ў росце. Лепш выкарыстоўваць такія метады, якія забяспечаць раўнамернае размеркаванне насення на градцы.


Фота: pixabay.com

У сяўбе дробнага насення ёсць некаторыя нюансы, і яны вельмі важныя.

Першае — глыбіня сяўбы.

Не сейце яго глыбока! Больш за тое, у выпадку з дробным насеннем любая глыбіня будзе «глыбока». Таму вылажыце насенне на паверхню і злёгку прысыпце тонкім пластом глебы, або акуратна ўцісніце насенне ў паверхню. Гэта дазволіць парастку пачаць фотасінтэз адразу ж пасля выхаду з семечка, што будзе выдатным стартам.

Другое — склад глебы.

Вельмі важна падабраць правільны субстрат для сяўбы дробнанасенных раслін. Грунтасумесь можна прыгатаваць сваімі рукамі, а таксама набыць у садовых цэнтрах і крамах. Найлепшы варыянт для дробнанасенных раслін — субстраты на аснове торфу. Яны лёгкія, досыць рыхлыя, не ўсыхаюць пры недахопе паліву і не ўтвараюць на паверхні цвёрдую скарынку, якую мініяцюрным парасткам прабіць вельмі складана. Выбіраючы грунт для такіх культур, варта пазбягаць грунтасумесяў з перлітам. Ён можа значна запаволіць з'яўленне ўсходаў.

Разгледзім самыя папулярныя спосабы сяўбы дробнага насення:

Пры дапамозе зубачысткі

Каб правільна размясціць дробныя семечкі на субстраце і вытрымаць паміж ім дыстанцыю, можна сеяць з дапамогай зубачысткі. Такі спосаб сяўбы дробнага пасяўнога матэрыялу актуальны як для дражыраванага насення, так і для звычайнага. Для сяўбы варта намачыць зубачыстку у вадзе, а насенне вылажыць на далонь. Па адным семечку варта прымацоўваць на вільготную зубачыстку, прыўзнімаючы яго кончыкам прылады. Далей насенне адпраўляецца на пасадку. З дапамогай зубачысткі можна злёгку заглыбіць насенне ў глебу на некалькі міліметраў.

«Вадкая» сяўба

Растварыце 30 г крухмалу ў 100 мл халоднай вады. Тонкім струменьчыкам, пастаянна памешваючы, уліце разведзены крухмал у 900 мл кіпеню.

Ёмістасць з клейстарам пастаўце ў каструлю з кіпенем і прагрэйце масу да 95 °С. Гатовы клейстар астудзіце і прапусціце праз сіта, каб прыбраць плёнкі і камячкі, якія ўтварыліся.

У астуджаны клейстар асцярожна ўсыпце дробнае насенне з разліку 1,5-2 г насення на шклянку вадкасці. Пераліце клейстар з насеннем у імбрычак і праверце «густату» будучай сяўбы на паперы. Калі насенне лягло занадта шчыльна, дадайце яшчэ трохі клейстару. Калі ж адлегласць паміж семечкамі даволі вялікая, падсыпце яшчэ. Каб не панізілася ўсходжасць, пасеяць насенне ў клейстары неабходна на працягу дня прыгатавання.

Стужачны спосаб

Насыпце ў шклянку 3 ст. л. мукі і заліце яе 100 г халоднай вады, старанна перамяшайце. Затым заліце мучную масу шклянкай кіпеню і вымешайце. З туалетнай паперы ці сурвэтак нарэжце стужкі шырынёй 1-1,5 см. Шпрыцам нанясіце на падрыхтаваныя папяровыя палоскі маленькія кропелькі сумесі на абранай для сяўбы той ці іншай культуры адлегласці, прыклейце насенне. Зручней за ўсё падхопліваць дробныя семечкі з дапамогай драўлянай палачкі з намочаным кончыкам. Пакіньце стужкі да поўнага высыхання, а пасля скруціце іх у рулончыкі.

Дражыраванне

Адбярыце якаснае насенне і апрацуйце яго малочнай сыроваткай. Торф, перагной і дзярновую зямлю добра прасушыце, прасейце і насыпце ў шкляны слоік.

Асцярожна ўсыпце ў сухую сумесь яшчэ вільготнае пасля апрацоўкі насенне і лёгенька патрасіце ёмістасць. Затым прасейце змесціва слоіка скрозь сіта або марлю.

«Вылаўленае» дражыраванае насенне вылажыце на сухую паперу і дайце яму падсохнуць.

У такой абалонцы насенне зручней высяваць, бо яно большае па памерах. Да таго ж для пачатку росту, пакуль яшчэ не ўмацавалася каранёвая сістэма, расліне будзе дастаткова неабходных пажыўных рэчываў.

Ірына ТАМКОВІЧ

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі?