Вы тут

Выстава «Творцы» — роздум пра глыбінныя сімвалы беларускага народа


Роздум пра глыбінныя сімвалы беларускага народа — аснова натхнення многіх мастакоў, якія стваралі ў мінулым стагоддзі і працягваюць свае пошукі сёння. Плённа ў гэтым кірунку шмат гадоў працуе творчы дуэт — Тамара і Уладзімір Васюкі. Сёлета пара адзначае 50-годдзе шлюбу. Юбілейная выстаўка «Творцы» ў Нацыянальным мастацкім музеі — частка аўтарскага праекта майстроў «Лінія і формы», які паплечнікі ствараюць на працягу чвэрці стагоддзя.


Уладзімір Васюк «Саюз зямлі і неба», 2013 г.

Для не знаёмых з творчасцю мастакоў куратары выстаўкі падрыхтавалі элегантнае прадстаўленне: «Шматгадовае ўзаемапранікненне і сувязь разнастайных форм, прыёмаў і тэхнік аднаго з найстаражытнейшых відаў мастацтва — керамікі, якім валодае Тамара Іванаўна, і па па-філасофску вытанчанай духоўнасці сюжэтаў аркушаў арыгінальнай графікі Уладзіміра Уладзіміравіча спрыялі з’яўленню ўнікальных твораў, якія знаёмяць гледача з адзіным гарманічным асяроддзем, напоўненым пачуццём цеплыні і кахання творчага і сямейнага саюза стваральнікаў». Трэба заўважыць, што муж і жонка выступаюць і як настаўнікі некалькіх пакаленняў маладых беларускіх аўтараў, якія атрымлівалі адукацыю ў Беларускай дзяржаўнай акадэміі мастацтваў і Беларускім дзяржаўным універсітэце культуры і мастацтваў. Да таго ж Тамара Васюк з 1990 года займаецца праектам па адраджэнні традыцыйнай беларускай керамікі: рэстаўрацыяй, рэканструкцыяй і рэтрансляцыяй яе асноўных відаў, форм і тэхналогіі. Уладзімір Васюк — аўтар больш як 10 фірменных стыляў, якія складаюцца з комплексу распрацовак: знак, лагатып, герб, сцяг, харугва і гэтак далей.

Абодва творцы натхняюцца гісторыяй і традыцыямі, аднак подых даўніны ў іх эксперыментах выказаны па-рознаму. Кампазіцыі Тамары Васюк расказваюць аб моцы прыроды, аб унікальнасці ўсяго жывога: гэта падкрэсліваюць выбраныя колеры, збольшага стрыманыя, формы, знарок недасканалыя, тэкстура… У сюжэтах Уладзіміра Васюка адчуваецца магутнасць надзвычайнага, нязведанага. Ён па-майстэрску стварае ілюзію аб’ёму, віртуозна кіруе чорным і белым колерамі, арганізоўваючы асаблівую прастору, дзе хапае месца недагаворанасці, паўтонам. Аднак у абодвух выпадках адлюстравана гармонія з навакольным светам, суладдзе ў задуме і рэалізацыі. Усё робіцца з пяшчотай.

Тамара Васюк «Татэм К», 2017 г.

Тамара і Уладзімір Васюкі працягваюць эксперыментаваць і шукаць разнастайныя повязі з сучаснасцю, аднак спадчына, гістарычная, культурная і мастацкая, для іх мае першараднае значэнне. На прыкладзе графікі Уладзіміра Уладзіміравіча відаць, на што скіраваны думкі аўтара. Тут і тэма асветніцтва (трыпціх «Космас Скарыны», 2017), і нацыянальныя сімвалы, блізкія многім жывапісцам, графікам і скульптарам мінулага стагоддзя (трыпціх «Гісторыя нівы», 2018), і біблейскія матывы (трыпціх «Крыж на небе, суладдзе на зямлі», 2019). Некаторыя сюжэты аб’яднаны своеасаблівай касмічнай скіраванасцю, нібыта пра зямное сказана болей чым дастаткова, а наконт загадак сусвету ў айчынным мастацтве яшчэ мала хто адважваецца разважаць і тым больш нейкім чынам выяўляць свае адносіны. Боязна, рызыкоўна, сумніўна. Аднак смеласць і рашучасць вельмі часта ўзнагароджваюцца.

Работа выстаўкі «Творцы» ў НММ працягнецца да 12 лютага.

Яўгенія ШЫЦЬКА

Фота аўтара

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Шалям засталося прыкласці зусім няшмат намаганняў, каб жаданая мэта была дасягнута.

Грамадства

Камандзір вядзе за сабой

Камандзір вядзе за сабой

Пяцікурснік Полацкага дзяржаўнага ўніверсітэта імя Е. Полацкай быў удастоены ганаровага звання «Чалавек года Віцебшчыны — 2023».

Моладзь

Вераніка Цубікава: Натхняюся жаданнем дзяліцца

Вераніка Цубікава: Натхняюся жаданнем дзяліцца

Яе песні займаюць першыя радкі ў музычных чартах краіны, пастаянна гучаць на радыё і тэлебачанні.