Вы тут

Найлепшы каваль Беларусі жыве ў Мсціславе і ашчадна захоўвае і развівае старажытныя кавальскія тэхналогіі


У старажытным Мсціславе да нашага часу не захаваўся замак, тым не менш жыве легенда пра яго і гарадзішча, што ў народзе называецца Замкавай гарой. На гэтай гары кожны год адбываюцца знакамітыя рыцарскія фэсты. Адзін з удзельнікаў гістарычных рыцарскіх рэканструкцый жыве ў гэтым сярэднявечным горадзе і падчас свята надзявае жалезныя латы, кальчугу, шлем, бярэ меч і шчыт, падымаецца на гару і далучаецца да іншых ваяроў. Гэта мясцовы саракадвухгадовы каваль Сяргей Кудзікаў, адзіны на ўсё наваколле рамеснік па традыцыйнай коўцы, які ашчадна захоўвае і развівае старажытныя кавальскія тэхналогіі. Член Саюза майстроў народнай творчасці Беларусі, кіраўнік дзіцячага аб'яднання «Майстар і метал» пры раёным Доме рамёстваў і кіраўнік клуба гістарычнай рэканструкцыі «Мсціслаўская харугва», ён стварае рыцарскія даспехі і гістарычную зброю, робіць мастацкія эксклюзіўныя ўпрыгажэнні для інтэр'еру і побыту. Мне выпаў гонар прысутнічаць у самым сэрцы працы Замкавага (так яго цяпер называюць) каваля — яго кузні, паглядзець, як лёгка і спорна ён спраўляецца з нагрэтым да чырвані металам, адчуць творчую атмасферу і той непараўнальны водар, які ўтварае металічная акаліна, агонь і вада, куды апускаецца гарачы метал.


— Калі ў старажытнасці ў Мсціславе быў замак, значыць былі і кавалі, — упэўнена сцвярджае Сяргей, адкладваючы ўбок молат і выціраючы са скроняў кроплі поту. — Мясцовая кавальская традыцыя не павінна знікнуць. Але я хачу, каб мае землякі не цураліся сваёй слаўнай мінуўшчыны, займаліся рамёствамі, удзельнічалі ў нашым брэндавым свяце.

Сяргей Кудзікаў у кавальстве амаль дзесяць гадоў. Перад гэтым працаваў майстрам вытворчага навучання па інфарматыцы і ЭВМ у мясцовым будаўнічым каледжы. Калі пачалася эра рыцарскіх фэстаў, яго моцна «прыкавала» гэтая нязведаная дагэтуль стыхія.

Пачынаў як «кравец» рыцарскага абмундзіравання, пазней у кавальскіх справах спакваля дасягаў досведу і сапраўдных вышынь. «Каваль — усім рамёствам бацька», — часта гаворыць Кудзікаў. За сваё ўмельства і ўдзел у грамадскім жыцці Сяргей быў уганараваны званнем «Чалавек года» горада Мсціслава.

Ён часта прымае ўдзел у святах самадзейных майстроў, двойчы перамагаў на фестывалях «Вясновы букет» у Мінску, летась у Бялынічах на Дні беларускага пісьменства атрымаў Гран-пры, а сёлета на фестывалі «Славянскі базар» у наміцыі «Захаванне старажытных тэхналогій» стаў найлепшым кавалём Беларусі.

Калі прыходзіць час чарговага рыцарскага фэсту, Сяргей закрывае кузню і на некалькі дзён жыве ў іншым — гістарычным — вымярэнні. А гэты год у мсціслаўскага каваля ўвогуле асаблівы: ён стаў студэнтам-першакурснікам завочнага аддзялення факультэта Беларускай акадэміі культуры і мастацтваў.

Анатоль КЛЯШЧУК

Фота аўтара

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.