Вы тут

У сям'і гродзенскай паштальёнкі — курс на лідарства


Нядаўна Таццяна Савук стала фіналісткай рэспубліканскага конкурсу «Жанчына года — 2022» у намінацыі «Мацярынская слава», а яе дачка выйграла алімпіяду ў ГрДУ імя Я. Купалы.


Каб пазнаёміцца з носьбітам пачэснага тытула, накіравалася ў аддзяленне № 11 Гродзенскага філіяла РУП «Белпошта». Насустрач мне выйшла стройная, невысокая маладая жанчына з адкрытым тварам і прыемнай усмешкай. Гаворка пачалася з удзелу ў конкурсе, на які Таццяну рэкамендаваў прафсаюз прадпрыемства. На адрас конкурснай камісіі было выслана рэзюмэ. І вось неўзабаве яе з іншымі пераможцамі-гродзенкамі запрасілі на ўрачысты прыём для ўручэння дыпломаў і падарункаў. Таццяна прыйшла разам з дзецьмі.

— У мяне тры дачкі, — распавядае суразмоўніца. — Старэйшай Марце 16 гадоў, яна перайшла ў 11 клас. Нядаўна ўдзельнічала ў алімпіядзе Гродзенскага дзяржаўнага ўніверсітэта імя Янкі Купалы і атрымала перамогу ў намінацыі «Найлепшая інтэлектуальная работа з прававой інфармацыяй». Зараз вызначаецца з будучай прафесіяй. Магчыма, юрыдычны напрамак. Сярэдняя дачка Анастасія, якой 15 гадоў, захапляецца замежнымі мовамі і марыць стаць перакладчыцай. Малодшай Дар'і 6 гадоў. Цікавіцца спартыўнай гімнастыкай і рыхтуецца пайсці ў першы клас.

Таццяна лічыць, што вельмі важна, каб дзеці былі арганізаваныя, адчувалі адказнасць за свае справы. Менавіта такімі выраслі старэйшыя дочкі. Яны і дома дапамогуць, і малодшую сястру дагледзяць.

— Яны дысцыплінаваныя, самі ўрокі рыхтуюць, без напаміну, добра разумеюць слова «трэба». Мабыць, таму, што гэтыя прынцыпы былі закладзены і маімі бацькамі, якія выхавалі пяцёра дзяцей. А цяпер прыклад сваіх бацькоў стараюся перанесці на дзяцей. І бачу, што ў гэтым ёсць сэнс, — дзеліцца вопытам Таццяна.

Яна, як многія маці, цікавіцца рознымі метадамі выхавання, чытае парады псіхолагаў, раіцца з іншымі маці. З некаторымі пастулатамі не пагаджаецца. Напрыклад, лічыць, што не варта патураць усім капрызам дзіцяці. Разам з тым трэба захоўваць павагу да дзяцей, тады яны растуць больш адказнымі і самастойнымі. Гэта важна не толькі для шматдзетнай сям'і, кажа мая суразмоўніца. На яе думку, вялікае шчасце для маці — калі ўсе дзеці дружныя, гатовыя падтрымаць адно аднаго.

Не застаецца ўбаку ад выхавання і муж Аляксей. Ён ініцыятар і арганізатар сямейнага адпачынку. І гэта, трэба сказаць, не такая простая справа. Бо адпачынак у сям'і, як правіла, на прыродзе. Яны аматары турыстычных паходаў, жыцця ў палатках і рыбнай лоўлі. Часам выязджаюць у вёску да сястры Таццяны. Калі дзяўчынкі былі меншыя, іх адпраўлялі ў аздараўленчыя летнікі па лініі прафсаюзаў. Аплата складала 10 % ад кошту пуцёўкі. Падрасце малодшая, і яна будзе ездзіць, упэўнена Таццяна. А вось сумесны адпачынак — толькі на прыродзе.

— Дзеці прывыклі да турыстычнага быту, для іх гэта цікава. Мы выязджаем з сябрамі на вадаёмы, бяром палаткі, варым юшку, запякаем бульбу на вогнішчы. Каля Гродна вельмі шмат прыгожых мясцін, нямала маляўнічых азёр, куды нескладана дабрацца і размясціцца.

Звяртаю ўвагу на стройную фігуру суразмоўніцы. Ці цяжка трымаць сябе ў спартыўнай форме? Аказалася, ніякіх дыет жанчына не трымаецца. Галоўнае, што «здымае» кілаграмы, — гэта рух.

— Я выйшла пасля дэкрэта «калабком», — усміхаецца яна. — Але на працягу трох месяцаў лішніх кілаграмаў як не было. Скінула не менш чым дзесяць. І ўсё гэта дзякуючы руху. У мяне ўчастак — амаль 10 кіламетраў. Кожны дзень яго даводзіцца абхадзіць: людзям трэба дастаўляць карэспандэнцыю — пісьмы, часопісы, газеты. Не езджу на транспарце — толькі пешшу. Гэта вельмі спрыяе на здароўі — адразу перасталі балець ногі.

Работа на пошце жанчыну задавальняе. Калектыў малады, дружны. І графік работы зручны для шматдзетнай маці. Ёсць магчымасць выправіць дзяцей у школу, завесці ў садок малодшую, а потым забраць. Вечары таксама ў сямейным коле.

Зараз сям'я рыхтуецца да чарговага адпачынку. І планы ўжо ёсць. Упершыню за некалькі гадоў яны адправяцца з Карэлію — на радзіму мужа. Прырода там, усклікае жанчына, вельмі ўражвае. «Мы любім адпачываць з дзецьмі, — кажа напрыканцы нашай размовы Таццяна. — Прыемна бачыць, як яны радуюцца ўсяму новаму, і быць у такія моманты побач з імі».

Маргарыта УШКЕВІЧ

Фота з архіва гераіні

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.