Пакідаць раслінныя рэшткі ў агародзе або лепш прыбраць?

Падчас праполкі градак і збору ўраджаю назапашваецца вялікая колькасць бацвіння, пустазелля, скошанай травы, а таксама падгнілай гародніны і ападкаў садавіны. Разбіраемся, як правільна гэта ўсё ўтылізаваць, ці варта выносіць за межы ўчастка альбо пакінуць, каб прымяніць з карысцю.

Агародніннае бацвінне

Бацвінне агародніны часам кідаюць наўпрост на градках, асабліва пры выкопванні бульбы. Гэтага рабіць нельга, бо ў кучах бацвіння вельмі хутка пасяляюцца капусныя смаўжы, мядзведка, каларадскі жук, самкі тлі і нават мышы.

З агародніным бацвіннем трэба паступаць наступным чынам:

• Падчас уборкі ўраджаю збіраць яго ў ёмістасць.
• Здаровую лістоту ад буракоў, радыскі і морквы адносіць у кампосную яму. 
• Бацвінне ад памідораў, бульбы і іншых бахчавых культур закопваць за ўчасткам або спальваць, бо яно звычайна заражанае фітафтарозам.

Фітафтора здольная жыць у бацвінні да 4 гадоў і пры перагніванні не знікае, а вось шкодным насякомым кампосная куча недаспадобы.

Пустазелле

Вырванае пустазелле нельга пакідаць у міжраддзях, бо замест перагнівання яно будзе ўтрамбоўваецца дажджамі і створыць такі ж прытулак для насякомых, як і бацвінне.

Найлепшае рашэнне для пустазелля — пакласці яго ў кампосную яму для перагнівання. Да наступнага сезона з яго атрымаецца добрае арганічнае ўгнаенне.

Ападкі

Пакідаць ападкі побач з дрэвам нельга, бо:

• на гнілыя плады будуць злятацца восы, якія могуць звіць непадалёк з багаццем ежы новае гняздо;

• у садавіне ёсць костачкі, якія будуць прыцягваць на ўчастак розных грызуноў;

• плады, якія апалі, хутчэй за ўсё, заражаныя шкоднікамі або хваробамі, якія могуць перайсці на дрэва.

Каб пазбегнуць магчымых праблем, ападкі трэба скласці ў закрытую ёмістасць з астатняй расліннасцю для далейшага гніення.

Муміфікаваныя плады

Ад муміфікаваных пладоў варта пазбаўляцца адразу пасля іх з'яўлення, пазбягаючы падзення на зямлю.

Складаць іх пажадана за межамі ўчастка, а пасля спаліць альбо закапаць. Такія плады з вялікай верагоднасцю пашкоджаны заразнай хваробай, якая можа перайсці на здаровую садавіну.

Гнілая гародніна

Часам агароднікі збіраюць спачатку здаровую гародніну, а падгнілую пакідаюць ляжаць побач з градкамі, пераносячы ўборку на пазнейшы час. Гэта няправільна, бо гародніна гніе пад уздзеяннем бактэрый, хвароб або пранікнення шкоднікаў.

Пакідаючы гніллё, вы рызыкуеце ў наступным сезоне заразіць гэтымі адходамі новыя пасадкі. Гнілую гародніну трэба адразу складаць у бочку або падобную ёмістасць, а пасля ўборкі ўраджаю закапаць пад дрэвамі або прыгатаваць з яе анаэробны кампост.

Абрэзаныя галінкі

Пасля вясновай і восеньскай абрэзкі пладовых дрэў застаецца шмат галінак. Калі яны акуратныя і здаровыя, можна скласці іх у кучу ў зручным месцы і выкарыстоўваць для распальвання вогнішча ці для прапальвання печы. Але пры бачных паразах грыбком, лішаём або гнілатой абавязкова адразу гэтыя галіны спаліць.

Скошаная трава

Калі ў вас вялікі газон, то травы пасля пакосу застаецца шмат. Яе можна зграбаць і скідаць у кампосную яму або даць ёй прасохнуць, а потым раскласці ў якасці мульчы пад кусты або ў прыствольныя кругі дрэў.

Але калі газон пастрыгаецца часта, а даўжыня скошанай травы не перавышае некалькі сантыметраў, то можна яе ўвогуле не прыбіраць. Праз нейкі час яна перагніе на месцы і стане харчаваннем для новага газона вясной.

Уборка раслінных адходаў у восеньскі перыяд абавязковая, бо гнілая гародніна або заражанае фітафторай бацвінне стануць рассаднікам хвароб на градках. Гэта адаб'ецца на вясновых пасадках, і, хутчэй за ўсё, ураджай будзе бедны.

Ірына ТАМКОВІЧ