Вы тут

Чыстую ваду – у кожны дом


Як у нашай краіне вядзецца маніторынг водных аб’ектаў і што плануецца зрабіць для забеспячэння насельніцтва якаснай пітной вадой, расказалі спецыялісты ў гэтай галіне.

Фота Анатоля Дрыбаса

У мінулым годзе завяршыўся першы этап інвентарызацыі паверхневых водных аб’ектаў, якая праводзілася ў рамках Дзяржаўнай праграмы аховы навакольнага асяроддзя і ўстойлівага выкарыстання прыродных рэсурсаў.

– Даследаваны 8000 буйных водных аб’ектаў: 2298 рэк, 2313 азёр (прычым 1360 з іх – у Віцебскай вобласці), 85 вадасховішчаў, 1931 сажалка, 1183 крыніцы і шэраг вадатокаў, – паведаміла Алена Грамадская, начальнік аддзела паверхневых вод РУП “Цэнтральны НДІ комплекснага выкарыстання водных рэсурсаў”. – У 2021–2025 гадах плануецца другі этап інвентарызацыі, які ахопіць малыя рэкі, ручаі, азёры і сажалкі, у тым ліку з плошчай, меншай за 0,5 км2.

Крыніцы трапілі пад такую пільную ўвагу навукоўцаў упершыню. Высветлілася, што каля 40 % з іх можна выкарыстоўваць для пітнога водазабеспячэння з умовай, што якасць вады ў іх будзе адпавядаць гігіенічным нарматывам. Большасць улічаных крыніц належыць басейну Дняпра.

– Мы актыўна ўзаемадзейнічалі з грамадскімі арганізацыямі, – расказала Алена Іванаўна. – Правялі конкурс на лепшыя працы па інвентарызацыі крыніц малой радзімы. Галоўны вынік сумесных намаганняў – кніга “Крыніцы Беларусі”, падрыхтаваная пры садзейнічанні праекту міжнароднай тэхнічнай дапамогі. У яе ўвайшлі матэрыялы, дасланыя ўдзельнікамі конкурсу, і 10 прызёраў атрымаюць гэтую кнігу ў падарунак. Далей распрацуем канцэпцыю захавання крыніц, акрэслім іх водаахоўныя зоны.

Пастаянна сочыць за станам паверхневых вод Рэспубліканскі цэнтр па гідраметэаралогіі, кантролі радыеактыўнага забруджвання і маніторынгу навакольнага асяроддзя. Як адзначыла кіраўнік службы экалагічнай інфармацыі Белгідрамету Алена Багадзяж, маніторынгам ахоплены 160 паверхневых водных аб’ектаў, назіранні вядуцца ў 297 пунктах. Найбольшай антрапагеннай нагрузцы падлягаюць вадаёмы басейнаў Заходняга Буга, Прыпяці і Дняпра. Асноўныя забруджвальныя рэчывы – злучэнні азоту і фосфару, якія трапляюць у ваду са сцёкавымі водамі прадпрыемстваў, у тым ліку ЖКГ. Аднак цягам апошніх гадоў аб’ёмы недастаткова ачышчаных сцёкавых вод змяншаюцца. Большасць водных аб’ектаў, пераважна ў басейнах Нёмана і Заходняй Дзвіны, маюць добры і выдатны статусы.

Цэнтралізаванае водазабеспячэнне гарадоў, гарадскіх і сельскіх пасёлкаў, прамысловых прадпрыемстваў базіруецца на выкарыстанні прэсных падземных вод. Да яго падключаны 94,7 % спажыўцоў краіны. Кіраўнік дзяржавы і ўрад пазначылі мэту: да 2025 года забяспечыць якаснай пітной вадой 100 % спажыўцоў. Генеральны дырэктар ДВА «Белвадаканал» Алег Конан нагадаў, што Пастановай Савета Міністраў № 50 ад 28 студзеня гэтага года зацверджана новая дзяржаўная праграма “Камфортнае жыллё і спрыяльнае асяроддзе”. Паводле яе падпраграмы “Чыстая вада”, плануецца пабудаваць больш за 860 станцый абезжалезьвання, падключыць да цэнтралізаваных сістэм водазабеспячэння 109 населеных пунктаў, рэканструяваць 70 збудаванняў біялагічнай ачысткі.

Святлана ІШЧАНКА

Выбар рэдакцыі

Адукацыя

Ірына Старавойтава: За гады суверэнітэту ў Беларусі сфарміравалася свая школа стварэння падручнікаў

Ірына Старавойтава: За гады суверэнітэту ў Беларусі сфарміравалася свая школа стварэння падручнікаў

«Для таго, каб стаць падручнікам, матэрыялы, падрыхтаваныя аўтарамі, праходзяць шмат этапаў экспертызы, абмеркаванняў на дыялогавых пляцоўках з педагогамі, узгадненняў, апрабацыю ва ўстановах адукацыі». 

Рэгіёны

З чым едзе Брэстчына на сёлетні Форум рэгіёнаў

З чым едзе Брэстчына на сёлетні Форум рэгіёнаў

Вобласць падрыхтавала ладны пакет прапаноў удзельнікам форуму.

Памяць

Партызанскі ўнёсак у «Баграціён»

Партызанскі ўнёсак у «Баграціён»

Беларуская наступальная аперацыя пачалася 23 чэрвеня 1944 года.