Прагназуемы аб'ём даходаў павінен скласці звыш 20 млрд рублёў, бюджэт жа зацверджаны па расходах
у 19,7 млрд беларускіх рублёў. Чакаемы прафіцыт бюджэту — больш за 733 млн рублёў.
Галоўнай задачай развіцця краіны ў наступным годзе стане аднаўленчы рост эканомікі. Упор будзе зроблены таксама на павышэнне яе канкурэнтаздольнасці і стварэнне ўмоў для рэалізацыі мэт Праграмы сацыяльна-эканамічнага развіцця на 2016—2020 гады.
— У 2018 годзе падатковая нагрузка складзе не больш за 25,5% да ВУП, — паведаміў журналістам міністр фінансаў Уладзімір АМАРЫН. — Гэта значыць, што яна не перавысіць прадугледжанага ўзроўню ў 26% да ВУП, — дадаў ён. Прырост даходаў бюджэту будзе размеркаваны па такіх напрамках, як пенсіі ваеннаслужачых, выдаткі на абслугоўванне дзяржаўнага доўгу, а таксама на павелічэнне фонду аплаты працы.
Дарэчы, з чаго ж складаецца кансалідаваны бюджэт на 2018 год? 65% — гэта так званыя першачарговыя выдаткі: выплата заработнай платы і трансфертаў насельніцтву, абслугоўванне дзяржаўнага доўгу, набыццё лекаў, прадуктаў харчавання, аплата камунальных паслуг і міжбюджэтныя трансферты. Трэць, што застаецца, — гэта выдаткі на заработную плату ў памеры 10,6 млрд рублёў.
У параўнанні з гэтым годам фонд аплаты працы з налічэннямі павялічыцца на 1,2 млрд беларускіх рублёў, а гэта дазволіць павялічыць сярэднямесячную зарплату супрацоўнікам бюджэтнай сферы да 700 беларускіх рублёў. У выпадку атрымання дадатковых даходаў у бюджэт, яны будуць накіраваныя на дадатковае павышэнне аплаты працы для бюджэтнікаў — з гэтай мэтай будуць сфарміраваны спецыяльныя рэзервовыя фонды.
Акрамя таго, міністр працы і сацыяльнай абароны Ірына КАСЦЕВІЧ спрагназавала, якія сярэднія заробкі будуць у нас у наступным годзе. «Сярэднегадавая зарплата ў Беларусі ў наступным годзе ў залежнасці ад сцэнарыя развіцця эканомікі складзе 921—941 рубель», — адзначыла міністр.
Пры гэтым у рэальным сектары заработная плата перавысіць тысячу рублёў. Што датычыцца дапамогі па беспрацоўі, то яе павышаць у 2018 годзе не плануюць, дадала Ірына Касцевіч.
Калі казаць непасрэдна па артыкулах бюджэту, то сітуацыя наступная: на адукацыю выдзеляць 5,6 млрд, што на 9,6% больш, чым у 2017-м. На ахову здароўя выдзеляць 4,8 млрд — на 3,5% больш, чым цяпер. На спорт і фізкультуру пойдзе сума ў памеры 173,7 млн, на культуру — 100,3 млн, выдаткі на сацыяльную палітыку прырастуць на 3%.
Цікава, што ў 2018 годзе плануюць павышаць пенсіі, аднак толькі аднойчы — аб гэтым паведаміла член Пастаяннай камісіі па бюджэце і фінансах Палаты прадстаўнікоў Людміла НІЖЭВІЧ.
— У нас змянілася заканадаўства па пенсійным забеспячэнні, і ў адпаведнасці з ім на працягу года будуць адзін раз перагледжаны пенсіі. Калі — больш прадметна гэта будзе ўдакладнена на працягу года, — дадала дэпутат.
Уладзіслаў ЛУКАШЭВІЧ
«Абавязак кожнага беларуса — прагаласаваць за сваю будучыню».
Новая гісторыя гістарычнага факультэта.
Мы змаглі пераадолець наступствы заходняга санкцыйнага ціску.
Зрабіўшы якасць неад’емнай часткай іміджу Беларусі як краіны, займацца ёй неабходна пастаянна і ва ўсіх напрамках.
