Вы тут

Сябры і калегі Янкі Брыля ўспамінамі адзначылі стагоддзе пісьменніка


Стагоддзе народнага пісьменніка Янкі Брыля адзначылі адмысловай вечарынай у мастацкай галерэі “Універсітэт культуры”, дзе 3 жніўня сабраліся сябры, калегі, даследчыкі і аматары яго творчасці, а таксама дочкі Наталля, Галіна і сын Андрэй. У атачэнні эксклюзіўных дакументаў з Беларускага дзяржаўнага архіва-музея літаратуры і мастацтва, прадстаўленых у выстаўцы, агучваліся ўспаміны і водгукі, прысвячаліся вершы, выказвалася падзяка пісьменніку як творцу і як чалавеку. Суарганізатар вечарыны газета "Літаратура і мастацтва" прысвяціла юбілею Янкі Брыля палову спецыяльнага нумара (юбілей пісьменніка раздзяліў выпуск з юбілеем выдання "Псалтыра" Францыскам Скарынам) - уласна з яго падрыхтоўкі ўсё і пачалося.


Дзеці Янкі Брыля: дочкі Галіна, Наталля і сын Андрэй.

Стагоддзе з дня нараджэння Янкі Брыля, які пайшоў з жыцця ў 2006 годзе, прыйшлося на 4 жніўня. На шчасце, умовы дазволілі да гэтай даты сур’ёзна падрыхтавацца: ёсць шмат людзей, якія ведалі і камунікавалі з пісьменнікам асабіста, да таго ж Беларускі дзяржаўны архіў-музей літаратуры і мастацтва захоўвае даволі важкі асобны фонд пісьменніка, які налічвае каля 12750 дакументаў – рукапісаў апавяданняў, перапісак, дзённікаў (аўтар вёў іх з 1932 года і да канца жыцця), фотаздымкаў і публікацый пра пісьменніка ў СМІ. Брыль сам перадаў сваю спадчыну архіву-музею, з якім пачаў супрацоўнічаць у 1963 годзе, яшчэ калі гэта быў Цэнтральны дзяржаўны архіў літаратуры і мастацтва БССР. Выстаўка, прымеркаваная да юбілею, застанецца ў галерэі да 7 жніўня, а пасля пераедзе ў архіў-музей літаратуры і мастацтва.

На вечарыне дырэктар інстытута літаратуразнаўства імя Янкі Купалы Акадэміі навук Іван Саверчанка расказаў пра збор твораў Янкі Брыля, над падрыхтоўкай якога зараз працуе цэлая каманда: “Гэты збор пакажа, наколькі манументальная і шматзначная постаць Янкі Брыля ў славянскай літаратуры”. Першы том збору павінен выйсці цягам году і спасылаючыся на традыцыю Іван Саверчанка прапанаваў стварыць таксама збор успамінаў пра пісьменніка, пакуль магчыма знайсці шмат людзей, якія добра яго ведалі.

“Янке Брылю была ўласціва як ні ў кога пільная ўвага да чалавека, да субяседніка, да таго, хто быў побач, – успамінае літаратар, дзяржаўны і грамадскі дзеяч Анатоль Бутэвіч. – Фактычна гэта ён, заўважыўшы мае пераклады, прапанаваў мне стаць членам Саюза пісьменнікаў, а Брыль быў адным з трох, хто павінен даць рэкамендацыю. Для мяне гэта з аднаго боку было найвышэйшай ацэнкай, а з другога боку – авансам, які трэба адпрацоўваць. У сваім ацэнках Янка Брыль быў справядлівы, але ашчадны: не заўсёды ён мог агучыць тое крытычнае, што было ў яго ў душы. Мне помніцца, на пытанне пра яго меркаванне аб адной кніге ён сказаў “Вельмі харошыя ілюстрацыі”.

Вечарына да стагоддзя народнага пісьменніка Янкі Брыля была арганізавана рэдакцыяй газеты “Літаратура і мастацтва”, Беларускім дзяржаўным архівам-музеем літаратуры і мастацтва і мастацкай галерэяй “Універсітэт культуры” Беларускага дзяржаўнага ўніверсітэта культуры і мастацтваў.

Соф’я КІСЯЛЁВА

Фота Надзеі Бужан

Загаловак у газеце: “Ён сказаў “Вельмі харошыя ілюстрацыі”

Выбар рэдакцыі

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі. 

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.