У сталiцы пачнецца будаўнiцтва метро на Паўднёвы Захад
Iна АРЭХАВА
У вераснi ў Мiнску пачнецца падрыхтоўка да будаўнiцтва чацвёртага ўчастка першай лiнii сталiчнага метрапалiтэна ад станцыi «Iнстытут культуры» да станцыi «Пятроўшчына», якi злучыць мiкрараёны Малiнаўка i Паўднёвы Захад з цэнтрам. Як паведамiў нашаму журналiсту начальнiк унiтарнага прадпрыемства «Дырэкцыя па будаўнiцтву Мiнскага метрапалiтэна Сяргей Мярцалаў, да канца восенi плануецца зацвердзiць у кiраўнiцтве архiтэктурны праект участка. Асноўныя ж работы па будаўнiцтву будуць разгорнуты ў 2005 годзе i завершаны ў 2010-м.Новы ўчастак працягласцю 5,7 кiламетра будзе мець тры станцыi: «Грушаўка» (на перакрыжаваннi праспекта Дзяржынскага i вулiцы Шчорса), «Мiхалова» (перакрыжаванне праспекта Дзяржынскага i вулiцы Гурскага) i «Пятроўшчына» (праспект Дзяржынскага i вулiца Голубева). Сярэднi кошт аднаго кiламетра гатовага сталiчнага метро — 23 мiльёны долараў, аднак памер выдаткаў на канкрэтны ўчастак будзе дакладна вядомы восенню, пасля падрыхтоўкi каштарысу. У 2005 годзе запланавана здача ў эксплуатацыю ўчастка працягу другой лiнii ад станцыi «Пушкiнская» да «Каменнай Горкi» (працягласцю 3,8 кiламетра з трыма станцыямi). На генеральным плане развiцця горада пазначана трэцяя лiнiя метро з канцавымi станцыямi ў раёне плошчы Бангалор i мiкрараёне Серабранка. Яна павiнна прайсцi па вулiцы Багдановiча i перасекчы другую лiнiю на станцыi «Фрунзенская», а першую — на станцыi «Плошча Ленiна». Яе адкрыццё аднесена на 2030 год. |
08/08/2007
