Засталося ўбраць 22 працэнты збожжавых

Па стану на ранiцу 7 жнiўня ў Беларусi скошана 1 млн 778 тыс. га збожжавых, што складае 78 працэнтаў да агульнай плошчы.

У Брэсцкай вобласцi засталося ўбраць амаль 15 працэнтаў, у Гомельскай — 16,5 працэнта, у Гродзенскай — 15,7 працэнта, у Мiнскай — 19 працэнтаў. Паводле разлiкаў аблсельгасхарчаў, паўднёвыя i цэнтральныя рэгiёны справяцца з уборкай да 12—15 жнiўня. Пiк уборачнай перамясцiўся ў Магiлёўскую i Вiцебскую вобласцi, дзе ўбрана толькi 68,5 працэнта i 61,5 працэнта адпаведна. Штодзень у гэтых рэгiёнах скошваецца амаль 3 працэнты плошчы.

Валавы збор збожжа ў Беларусi складае 5 млн 411 тыс.тон. На аналагiчную дату мiнулага года было сабрана крыху больш як 3 млн тон. Самы высокi ўраджай у гэтым годзе атрыманы ў Мiнскай вобласцi — 1 млн 534 тыс. тон. У сталiчнай вобласцi маюць намер сабраць 1,8 млн тон. Пераадолелi мiльённы рубеж па намалоту збожжа гаспадаркi Гродзенскай вобласцi — 1 млн 22 тыс. тон. У гэтым годзе на Гродзеншчыне плануецца сабраць амаль 1,4 млн тон збожжа. У Брэсцкай вобласцi намалочана 829,2 тыс. тон, у Магiлёўскай — 720 тыс. тон, у Гомельскай — 686 тыс. тон, у Вiцебскай — 625 тыс. тон. Акрамя таго, амаль 600 тыс. тон збожжа плануецца сабраць з асабiстых прысядзiбных участкаў насельнiцтва i ў сялянскiх фермерскiх гаспадарках, тым больш што ўраджайнасць тут амаль на ўзроўнi агульнарэспублiканскай — 30,5 ц/га.

Разлiкi паказваюць, што ў цэлым у Беларусi будзе намалочана 7 млн тон збожжа. Гэта дасць магчымасць выканаць дзяржзаказ па продажы харчовага збожжа ў аб’ёме 1 млн 10 тыс. тон, закласцi ў дастатковай колькасцi насенне, забяспечыць фуражом жывёлагадоўчыя комплексы i птушкафабрыкi.

Намеснiк мiнiстра адзначыў, што цяпер убiраюць познiя пасевы, найбольш ураджайныя. Так сярэдняя ўраджайнасць збожжавых у Гродзенскай вобласцi перасягнула 36,4 ц/га, у Магiлёўскай — 33,2 ц/га, у Мiнскай — 31,4 ц/га.

Гаспадаркi паўднёвых i цэнтральных рэгiёнаў Беларусi, якiя завяршылi ўборку, накiруюць 350 камбайнаў на дапамогу паўночным раёнам.