Крэдыты суб’ектам аграэкатурызму на льготных умовах

Праграмай прадугледжана аказанне крэдытнай падтрымкi сялянскiм (фермерскiм) гаспадаркам i фiзiчным асобам, якiя ажыццяўляюць дзейнасць па аказанню паслуг у сферы аграэкатурызму.

Крэдыты будуць прадастаўляцца ў беларускiх рублях. Працэнтная стаўка па iх складзе 5 працэнтаў гадавых. Пры гэтым сума крэдыту не павiнна перавышаць 90 працэнтаў ад кошту праекта.

У банку ўдакладнiлi, што максiмальная велiчыня крэдыту для фiзiчных асобаў пры прадастаўленнi яго наяўнымi грашовымi сродкамi складзе не больш як 750 базавых велiчынь, пры прадастаўленнi крэдыту ў безнаяўным парадку — не больш як 2000 базавых велiчынь.

Для сялянскiх (фермерскiх) гаспадарак максiмальная велiчыня крэдыту вызначаецца зыходзячы з фiнансавага стану крэдытаатрымальнiка, абаротаў па бягучаму (разлiковаму) банкаўскаму рахунку, але не будзе перавышаць 2000 базавых велiчынь, устаноўленых заканадаўствам на дату звароту за атрыманнем крэдыту, пры ўмове, што агульная сума раней прадастаўленых яму банкам крэдытаў i запытваемага крэдыту не перавышае 7500 базавых велiчынь.

Крэдыт можа быць прадастаўлены аднаразова або часткамi (траншамi) у межах максiмальнага памеру (лiмiту) агульнай сумы грашовых сродкаў (крэдыту), што прадастаўляюцца пры адкрыццi крэдытнай лiнii.

Пры гэтым фiзiчным асобам такi крэдыт будзе выдавацца тэрмiнам да 7 гадоў з прадастаўленнем адтэрмiноўкi пагашэння асноўнага доўгу па крэдыту на 12 месяцаў, сялянскiм (фермерскiм) гаспадаркам — зыходзячы з тэрмiнаў акупнасцi праекта, але не больш як на 5 гадоў з прадастаўленнем адтэрмiноўкi пагашэння асноўнага доўгу па крэдыту таксама на 12 месяцаў.

«РАЧНЫ АЎТОБУС»

Па Вiцебскай вобласцi пачаў курсiраваць «Рачны аўтобус» — выставачная зала на колах. Перасовачная экспазiцыя падрыхтавана шведскiмi тураператарамi — удзельнiкамi шведска-латвiйска-беларускага турыстычнага праекта «Панарама Дзвiна/Даўгава», расказаў начальнiк аддзела ўпраўлення фiзiчнай культуры, спорту i турызму Вiцебскага аблвыканкама Пётр Аляксееў.

Выстаўка, што пабывала ўжо ў Латвii, расказвае аб гiсторыi славянскiх, балцкiх i нармандскiх плямёнаў, некалi звязаных адным гандлёвым шляхам «з варагаў у грэкi», якi пралягаў у тым лiку i па Заходняй Дзвiне. Акрамя таго, наведвальнiкi могуць пазнаёмiцца з самой «Панарамай Дзвiна/Даўгава», а таксама з экскурсiйнымi маршрутамi па Прыдзвiннi.

Першымi незвычайную экспазiцыю ўбачаць жыхары Шаркаўшчыны, Глыбокага, Браслава i Дзiсны. Затым «Рачны аўтобус» спынiцца ў Вiцебску, а потым адправiцца ў iншыя раёны вобласцi. У снежнi ён вернецца ў Швецыю, каб у наступным годзе ажыццявiць такое ж вялiкае падарожжа па гэтай краiне. Выставачную экспазiцыю на гэты раз будуць рыхтаваць вiцебскiя тураператары.

Пётр Аляксееў нагадаў, што iдэя праекта «Панарама Дзвiна/Даўгава» належыць шведскiм тураператарам, якiя зацiкаўлены ў арганiзацыi тураў па Беларусi. Экскурсiйны маршрут па Заходняй Дзвiне выклiкае цiкавасць у шведскiх турыстаў. Ужо да наступнага года прагназуецца павелiчэнне iх колькасцi на Вiцебшчыне на 10 працэнтаў.