Праз год спартсмены збяруцца ў «Птушыным гняздзе»

— Алiмпiйскiя гульнi пройдуць у нашай краiне ўпершыню, таму для ўсiх жыхароў Кiтая — гэта вялiкае свята, самая важная справа, вялiкi фестываль спорту i сяброўства розных народаў, — кажа мая суразмоўца. — Кожнаму, хто прыедзе на нашу Алiмпiяду, прадастаўляецца цудоўная магчымасць пазнаёмiцца з традыцыямi Кiтая, нашай багатай культурай, нацыянальнай кухняй, звычаямi, стаць у Пекiне сведкам сустрэчы ўсходняй i заходняй культур.

Усе алiмпiйскiя аб’екты будуць гатовыя да канца 2007 года. Паводле слоў Чжан Iн, спартыўныя пабудовы (iх будзе 37, як новых, так i рэканструяваных) заклiканыя паказаць навукова-тэхнiчныя дасягненнi Кiтая, бо выкарыстана лепшае абсталяванне, вопыт вядучых спецыялiстаў, найноўшыя будаўнiчыя матэрыялы. Прыклад таму — нацыянальны цэнтр па плаванню пад назвай «Куб вады». Матэрыялы для яго вонкавага афармлення (каля 3 тысяч блакiтных злучаных кавалачкаў нагадваюць пухiркi вады), праз якiя можа праходзiць сонечнае святло, яшчэ не выкарыстоўваў нiхто ў свеце. Таксама нiхто не ўзводзiў аб’екты з такой вялiкай колькасцю сталi, як «Птушынае гняздо».

Нельга не ацанiць палёт фантазii аўтараў алiмпiйскiх будынкаў — простых, практычных, функцыянальных — i пры ўсiм гэтым яны яшчэ i падкрэслiваюць асаблiвасць культуры Кiтая. Напрыклад, арэна для спаборнiцтваў па гiмнастыцы i гандболу выглядае ў форме традыцыйнага кiтайскага веера. Не ўступае па задумцы i «Птушынае гняздо»: улiчваючы, што ў кiтайцаў iснуе 12 знакаў нараджэння (у прыватнасцi дракон, змяя), на стадыёне будзе менавiта 12 уваходаў, а над кожным з iх пазначаць адзiн з гэтых знакаў, таму знайсцi сваё месца на трыбуне будзе вельмi проста.

Нягледзячы на ўнiкальнасць алiмпiйскiх пабудоў, не меншай увагi, з пункту гледжання аташэ па справах культуры, заслугоўваюць алiмпiйскiя медалi: «Мы лiчым, што спартсмены — моцныя людзi не толькi фiзiчна, але i сваiм духам, таму на адваротным баку медаля выкарыстаны нефрыт, якi ў Кiтаi азначае высокую павагу, а выява багiнi Нiкi на фоне стадыёна ў Грэцыi на пярэднiм баку ўзнагароды гаворыць, што ўладальнiк медаля — сапраўдны пераможца», — тлумачыць Чжан Iн.

Што ж датычыцца планаў гаспадароў у заваяваннi медалёў, то кiтайскiя спартсмены тут не раскрываюць карт: кажуць толькi, што яны традыцыйна моцныя ў настольным тэнiсе, скачках у ваду, дзюдо, бадмiнтоне, валейболе, спартыўнай гiмнастыцы i таму вельмi жадаюць пацвердзiць свой клас у iх, аднак кiтайскiя атлеты мараць аб дасягненнях i ў новых для сябе вiдах спорту. Усе яны рыхтуюцца i iмкнуцца да поспеху. Увесь свет ведае аб тэхнiчнасцi i працаздольнасцi кiтайцаў.

— Алiмпiяда ў Пекiне, без сумненняў, увойдзе ў гiсторыю, бо будзе адметная ад iншых, — пераканана Чжан Iн. — У нашых Гульняў тры мэты — зялёная, навукова-тэхнiчная i гуманiтарная Алiмпiяда. Тое, што Кiтаю даверылi яе правядзенне, кажа аб развiццi краiны i росквiце яе культуры. Кiтай жа — першы па тэмпах развiцця ў свеце.

Арганiзатары Алiмпiяды клапоцяцца аб бяспецы гасцей, транспартным забеспячэннi, размяшчэннi, харчаваннi, каб госцi адчувалi сябе ўтульна ў Кiтаi. Каб палепшыць экалогiю, кантралюецца забруджанне паветра, ачышчаюцца рэкi, жыхары на месяц перасаджваюцца са сваiх аўто ў грамадскi транспарт. Дапамагаць дэлегацыям на Алiмпiядзе будуць мiльёны валанцёраў, якiя ўжо вучаць англiйскую, рускую, французскую мовы. Вядома, што над пастаноўкай шоў цырымонii адкрыцця працуе рэжысёр фiльма «Праклён залатой кветкi» Чжан Iмоу. Што гэта будзе, зразумела, трымаецца ў вялiкiм сакрэце, але не ўзнiкае сумненняў: у прадстаўленнi гаспадары раскажуць аб сваёй вялiкай краiне, гiсторыя якой налiчвае 5 тысяч гадоў.

— Я з вялiкiм хваляваннем чакаю гэтай Алiмпiяды, — прызнаецца мне Чжан Iн. — Я сама б з радасцю стала валанцёрам, каб дапамагаць дэлегацыям, магчыма, вашай краiны, бо ўсе мы розныя, з розным колерам скуры, вачэй i валасоў, але жывём мы ў адным свеце з адной марай — жыць на зямлi без жабрацтва i няшчасцяў.

Чжан Iн пажадала ўдачы ўсiм спартсменам, а асаблiва кiтайскiм i беларускiм, i параiла прыехаць на Алiмпiяду як мага раней: «У нас высокая вiльготнасць, а жнiвень наогул — самы спякотны месяц. Вы будзеце адчуваць сябе, як у лазнi. Аднак я пераканана, што такiя моцныя людзi, як спартсмены, вытрымаюць гэтыя ўмовы».