Экскурсаводы пройдуць абавязковую акрэдытацыю

Як расказаў «Звяздзе» дырэктар дэпартамента па турызму Мiнiстэрства спорту i турызму Вiктар Янкавенка, летась на развiццё турыстычнай сферы было засвоена 200 мiльярдаў рублёў. Гэта прынесла свае вынiкi, прыбыткi ад унутранага турызму павялiчылiся ў некалькi разоў.

Разам з тым усё залежыць ад развiцця мясцовага i агратурызму. Вiктар Янкавенка падкрэслiў, што ў кожным раённым цэнтры, у кожным горадзе Беларусi трэба стварыць арганiзацыю, якая займалася б аказаннем турыстычных паслуг у маштабе сваёй мясцовасцi. «У сельскiх раёнах краiны таксама няшмат сваiх тураператараў, i гэта дрэнна адбiваецца на атрыманне прыбыткаў, — сцвярджае спецыялiст. — Трэба, каб госць, якi завiтаў у любую кропку краiны, ведаў, якiя экскурсiйныя маршруты яму там прапаноўваюць, i — адразу ж — куды можна звярнуцца па турыстычныя паслугi. Развiваць мясцовы турызм трэба не толькi аддзелам па спорту i турызму абласных i раённых выканкамаў. Усе галiновыя ведамствы нашай краiны ўжо далучылiся да гэтай дзейнасцi, i ў будучым трэба яе працягваць».

На Мiншчыне засталiся толькi тры раёны, дзе яшчэ няма ўласных тур-аператараў, якiя б аказвалi турыстычныя i экскурсiйныя паслугi ў межах уласнага рэгiёна. Мiнскай вобласцi больш складана, чым iншым — пад бокам знаходзiцца сталiца, якая «адцягвае» на сябе i клiентаў, i, адпаведна, прыбытак. Амаль усе ўдзельнiкi семiнара-нарады па пытаннях развiцця турыстычнай галiны ў Мiнскай вобласцi ў 2007 годзе адзначылi, што перш-наперш увагу трэба звярнуць на абслугоўванне людзей. Персанал у гасцiнiцах, кафэ, рэстаранах павiнен быць не проста лагодны да наведвальнiкаў, а паслужлiвы, уважлiвы. Таму, паводле слоў прадстаўнiкоў «Нацыянальнага агенцтва па турызму», надышла неабходнасць уводзiць абавязковую сертыфiкацыю гасцiнiчных паслуг, i да гэтага ўжо зараз трэба рыхтавацца ўсiм, хто мае дачынене да гэтай галiны турыстычнай дзейнасцi.

— Пры ўездзе ў кожны раён, горад на аўтамабiльнай трасе будуць размешчаны прыдарожныя знакi i карта-схема тэрыторыi, iнфармацыя наконт усiх гiстарычных i славутых месцаў, турыстычных аб’ектаў. На гэтыя i iншыя мэты з бюджэту Мiнскай вобласцi ў кожны раён выдаткавана па 10—15 мiльёнаў рублёў, — адзначыла намеснiк начальнiка ўпраўлення фiзiчнай культуры, спорту i турызму Алена Брок.

Патрабаваннi прад’яўляюцца i да турыстычных маршрутаў. Зараз агляд мясцiн будзе больш цiкавым, у склад экскурсiй увойдуць новыя аб’екты. Накiрункi, iдэi для развiцця турызму на Мiншчыне распрацоўвае кожны раён. Агратурызм таксама набудзе больш удасканалы выгляд. У вобласцi ўжо створаны 47 сядзiб, што значна больш у параўнаннi з iншымi абласцямi. Зараз iдзе праца над прыцягненнем новых iнвестараў, у тым лiку i з замежных краiн. Вiктар Янкавенка адзначыў, што выдзяленне экскурсiйных паслуг як асобнага вiду турыстычнай дзейнасцi (чаго раней не было) мае вялiкi патэнцыял.

Дзмiтрый АЛЬФЕР.