У Гродзенскай вобласці за 8 месяцаў гэтага года колькасць загінулых на вытворчасці знізілася з 15 да 8 чалавек, разам з тым колькасць цяжка траўміраваных работнікаў узрасла з 43 да 54 чалавек, паведамляе БелТА.
Як адзначыў галоўны тэхнічны інспектар працы Гродзенскага абласнога аб’яднання прафсаюзаў Дзмітрый Гаравенка, найбольшая колькасць загінулых і якія атрымалі цяжкія траўмы на вытворчасці ў гэтым годзе зарэгістравана ў арганізацыях сельскай гаспадаркі (38,7% ад агульнай колькасці), будаўніцтва (12,9%), а таксама малога прадпрымальніцтва і без ведамаснай падпарадкаванасці (24,2%).
«Сёлета ў Гродзенскай вобласці на вытворчасці ўжо пацярпелі работнікі 39 прафесій. Сярод іх 7 трактарыстаў-машыністаў, 6 вадзіцеляў аўтамабіля, па тры рабочыя па комплексным абслугоўванні і рамонце будынкаў і збудаванняў і вартаўнікоў. Асноўныя прычыны няшчасных выпадкаў на вытворчасці — невыкананне работнікамі элементарных патрабаванняў бяспекі, дысцыпліны і інструкцый па ахове працы, невыкананне службовымі асобамі сваіх абавязкаў па ахове працы», — распавёў Дзмітрый Гаравенка.
Да прыкладу, у красавіку гэтага года 39-гадовы цясляр адной з арганізацый Шчучынскага раёна, грэбуючы правіламі бяспекі, разрэзаў нажніцамі па метале дрот для распакоўкі металаканструкцый аэратара, у выніку чаго адбылося іх зрушэнне. Адыходзячы назад, мужчына спатыкнуўся, упаў на спіну, стукнуўся патыліцай аб бетоннае пакрыццё і атрымаў смяротную траўму. У маі ў адным з раёнаў вобласці на тэрыторыі вытворчага ўчастка падчас рамонту прычапнога льноўборачнага камбайна ЛК-4 адбылося яго перакульванне. У выніку 55-гадовы трактарыст-машыніст быў смяротна траўміраваны.
«Каб прадухіліць падобныя выпадкі, 28 верасня, у адзіны дзень прафілактыкі вытворчага траўматызму, прафсаюзныя спецыялісты правядуць сустрэчы ў працоўных калектывах арганізацый, якія знаходзяцца на прафабслугоўванні, — дадаў Дзмітрый Гаравенка. — Такія сустрэчы неабходныя, каб кожны работнік вяртаўся дадому цэлым і непашкоджаным. Праца павінна быць не толькі эфектыўнай, але і бяспечнай».
Прэв’ю: БелТА
