Чатыры гады таму цялятніца адной з аграгаспадарак Горацкага раёна з 20-гадовым стажам вымушана была звольніцца, каб даглядаць мужа пасля інсульту — таксама былога работніка гэтага прадпрыемства. Урэшце мужу далі першую групу інваліднасці, а жанчына зноў вярнулася ў гаспадарку. Але яе стаж абнуліўся, і гэта сур'ёзна паўплывала на заробак. Для сям'і, дзе выхоўваецца непаўналетняе дзіця, такі паварот спраў быў адчувальным ударам.
— Гэта падштурхнула жанчыну звярнуцца да нас, — паведамілі ў прэс-службе Федэрацыі прафсаюзаў па Магілёўскай вобласці. — Галоўны прававы інспектар Магілёўскага абласнога Савета Белхімпрафсаюза Мікалай Фяськоў растлумачыў ёй, што асноўныя нормы налічэння працоўнага стажу і аплаты працы павінны быць прапісаны ў калектыўным дагаворы арганізацыі. Каб дапамагчы заяўніцы, да справы далучыліся старшыня прафкама сельгаспрадпрыемства і старшыня раённага камітэта Беларускага прафсаюза работнікаў АПК. Пасля хадайніцтва перад кіраўніцтвам прадпрыемства работніцы пайшлі насустрач. На падставе заявы жанчыне аднавілі працоўны стаж і налічылі 20-працэнтную надбаўку.
Нэлі ЗІГУЛЯ
Спасылкі
[1] https://zviazda.by/be/tags/neli-zigulya
[2] https://zviazda.by/be/gramadstva
[3] mailto:zіgulya@zvіazda.by
[4] https://zviazda.by/be/tags/prafsayuzy
[5] https://zviazda.by/be/tags/dapamoga
[6] https://zviazda.by/be/tags/pracouny-stazh