Утварэнне выбарчых камісій прайшло без парушэнняў. Заявіла старшыня Цэнтральнай выбарчай камісіі Беларусі па выбарах і правядзенні рэспубліканскіх рэферэндумаў Лідзія Ярмошына ў відэазвароце.
Па словах кіраўніка ЦВК, учора адбыліся пасяджэнні мясцовых распарадчых і выканаўчых органаў, якія ўтварылі ўчастковыя выбарчыя камісіі. Адзначыла большую за леташнюю цікавасць да выбарчай кампаніі — не гледзячы на тое, што ў цэлым участковых камісій утворана ў цэлым менш, у іх вылучана на 2,5 тысячы прэтэндэнтаў больш (больш за 70 тысяч чалавек).
На два працэнты — да 36 — вырасла колькасць вылучаных грамадзянамі шляхам падачы заяў, некалькі паменшылася колькасць прадстаўнікоў працоўных калектываў. Прадстаўніцтва грамадскіх аб’яднанняў, у тым ліку палітычных партый, засталося на мінулым узроўні.
«Па выніках утварэння камісій колькасць асоб, якія ўвайшлі ў склад участковых выбарчых камісій і вылучыліся шляхам збору подпісаў выбаршчыкаў, знізілася на два працэнты ў параўнанні з колькасцю вылучэнцаў. На 0,4 працэнта ўзрасла колькасць прадстаўнікоў працоўных калектываў. Палітычныя партыі і грамадскія аб’яднанні ўмацавалі свае пазіцыі — іх стала ў выбарчых камісіях больш», — паведаміла Лідзія Ярмошына.
У цэлым хістанні паміж колькасцю вылучаных і ўключаных у склад камісіі не перавышаюць двух працэнтаў, дадала кіраўнік Цэнтрвыбаркама. На першых арганізацыйных пасяджэннях выбраны старшыні, намеснікі старшынь і сакратары камісій.
«Закон прадугледжвае магчымасць уключэння ў склад камісіі да 19 членаў. Фінансаванне дадзена па Мінску толькі на 16 членаў, па рэгіёнах — на 15. Сыходзячы з гэтага, выканаўчыя камітэты памяншалі ці павялічвалі колькасныя склады камісій з улікам колькасці выбаршчыкаў», — растлумачыла кіраўнік ЦВК.
Цэнтральная камісія не назірае парушэнняў працэдуры пры ўтварэнні выбарчых камісій, падкрэсліла Лідзія Ярмошына. Прэтэнзіі, якія сустракаюцца ў сеціве, старшыня Цэнтрвыбаркама лічыць беспадстаўнымі. Па рэкамендацыі ЦВК шэраг мясцовых органаў улада правялі пасяджэнні без запрашэння назіральнікаў і прадстаўнікоў, вылучаных у склады камісій, але вялі стрымы. Іншыя правялі традыцыйныя пасяджэнні з запрашэннем усіх зацікаўленых.
Лідзія Ярмошына таксама нагадала, што відэазапіс на пасяджэннях недапушчальны.
«Падобныя паводзіны ніякага дачынення не маюць да галоснасці, бо галоснасць згодна з арт. 13 Выбарчага кодэксу забяспечваецца прысутнасцю назіральнікаў і прадстаўнікоў сродкаў масавай інфармацыі. Ніякія ўласныя бачанні грамадзянамі гэтай працэдуры законам не прадугледжаны», — старшыня ЦВК запрасіла ўсіх ахвотных удзельнічаць у выбарчым працэсе паважаць процілеглы бок і паводзіць сябе ў адпаведнасці з нормамі.
Зараз тэрытарыяльныя выбарчыя камісіі на ўзроўні раёнаў і гарадоў правяраюць падпісныя лісты ў падтрымку вылучэння кандыдатаў у Прэзідэнты. Падпісныя лісты падалі сем прэтэндэнтаў, нагадала Лідзія Ярмошына. Колькі сапраўдных подпісаў утрымліваецца ў лістах, стане вядома да першага ліпеня.
Да чацвёртага ліпеня ўключна патэнцыйныя кандыдаты павінны падаць заявы аб згодзе балатавацца і неабходныя пакеты дакументаў для праверкі. Падобныя пакеты пакуль падалі толькі двое прэтэндэнтаў.
Па інфармацыі Лідзіі Ярмошынай, у ЦВК паступіла каля 700 пісьмовых зваротаў грамадзян, шэраг з іх з’яўляюцца па сутнасці адной скаргай. Каля 500 чалавек звярнуліся на «гарачую лінію» па самых розных пытаннях, у тым ліку па пытанні водазабеспячэння ў Мінску.
«Гэта яшчэ раз кажа аб тым, што роля Цэнтральнай камісіі неабгрунтавана перабольшваецца. Грамадзяне часцяком лічаць, што падчас выбараў Цэнтральная камісія ў стане вырашыць любое пытанне. Гэта не так: мы абавязаны дзейнічаць і вырашаем пытанні толькі ў межах нашай кампетэнцыі», — падкрэсліла Лідзія Ярмошына.
Варвара МАРОЗАВА
Спасылкі
[1] https://zviazda.by/be/palityka
[2] https://zviazda.by/be/gramadstva
[3] https://zviazda.by/be/tags/vybary-2020
[4] https://zviazda.by/be/tags/lidziya-yarmoshyna