Парламентарыі, прадстаўнікі працоўных калектываў і валанцёры зладзілі навагодняе свята для дзяцей, якія знаходзяцца на лячэнні ў анкалагічным аддзяленні Магілёўскай абласной дзіцячай бальніцы. Пра гэта БЕЛТА [1] паведаміла дэпутат і старшыня першаснай арганізацыі Беларускага саюза жанчын Палаты прадстаўнікоў Нацыянальнага сходу Вольга Петрашова.
"Разам з прадстаўнікамі Магілёўскага гарадскога Савета дэпутатаў, працоўных калектываў горада, актывістамі маладзёжнага парламента і валанцёрамі мы наладзілі для маленькіх пацыентаў анкалагічнага аддзялення навагодняе свята. Мерапрыемства прымеркавана да рэспубліканскай акцыі "Нашы дзеці". Мы пастараліся пацешыць дзяцей, якія на дадзены момант знаходзяцца на лячэнні, падарыць пазітыўныя эмоцыі і добры настрой", - распавяла Вольга Петрашова.
Удзельнікамі свята сталі пацыенты ад 2 да 14 гадоў. Для іх і іх бацькоў падрыхтавалі яркую забаўляльную праграму: гульні, конкурсы, карагоды і танцы. Самым доўгачаканым госцем стаў Дзед Мароз, з якім дзеці дзяліліся запаветнымі жаданнямі. "І калі адразу дзеці трохі саромеліся, неахвотна ўдзельнічалі ў конкурсах, то потым мы змаглі падпаліць іх сэрцы: хлопцы сталі больш актыўна гуляць і весяліцца, забыўшыся, што яны ў бальніцы. Гэта вельмі важна: адцягнуць ад дрэнных думак, надаць трохі ўвагі і здабыць наўзамен самую шчырую і цёплую ўсмешку", - адзначыла дэпутат.
Усе дзеці атрымалі зарад станоўчых эмоцый і салодкія падарункі. У цяперашні час у анкалагічным аддзяленні праходзяць лячэнне 25 маленькіх пацыентаў.
Спасылкі
[1] http://belta.by
[2] https://zviazda.by/be/tags/ankalagichnyya-zahvorvanni-0
[3] https://zviazda.by/be/tags/magilyou
[4] https://zviazda.by/be/tags/nashy-dzeci