З найблiжэйшай суботы, 2 лiстапада, на «першай кнопцы» адбудзецца прэм'ера новага кулiнарнага шоу. На «Кухнi жыцця» навучаць гатаваць здаровую i карысную ежу не толькi гледачоў, але i вядомых спартсменаў, артыстаў i тэлевядучых.
«Кухня жыцця» — не толькi кулiнарны праект, але i падручнiк па культуры харчавання, эпiграфам да якога могуць стаць словы. «Мы — гэта тое, што мы ядзiм». Такой думкi прытрымлiваюцца i вядучыя праграмы Аляксандр Яраслаўцаў i Святлана Кашыцкая, якая з'яўляецца ўрачом-дыетолагам i фiтнес-трэнерам i дапамагла прыйсцi ў жаданую форму не адной славутасцi.
Гасцямi на тэлевiзiйнай кухнi стануць Вольга Барабаншчыкава, Аляксей Ягудзiн, Ларыса Грыбалёва, Аляксей Хлястоў, Iна Афанасьева, Аляксей Талай i многiя iншыя. Для iх вядучыя падабралi пытаннi «на дэсерт», якiя раскрыюць медыйных асоб з новага боку. У прэм'ерным выпуску праграмы адказваць на пытаннi i гатаваць здаровую ежу будзе вядучы праектаў Белтэлерадыёкампанii «Добрай ранiцы, Беларусь!», «Макаёнка, 9» Яўген Перлiн.
«Кухня жыцця» складаецца з цiкавых рубрык — напрыклад, «Халадзiльны рэвiзор» раскажа, чым запоўнiць лядоўню i з якiмi прадуктамi лепш назаўсёды развiтацца, «АБВГДэйка» пазнаёмiць дзяцей з карыснымi ўласцiвасцямi прадуктаў i падкажа, дзе i якi вiтамiн шукаць. А вось «У чым фiшка?» — спадарожнiк кулiнараў-аматараў у свеце лайфхакаў на кухнi.
Таму не прапусцiце прэм'ерны выпуск на «Беларусь 1» 2 лiстапада ў 15.45.
Пяць пытанняў для вядучай «Кухнi жыцця» Святланы Кашыцкай:
1. Здаровы лад жыцця пачынаецца... — З харчавання. Наш знешнi выгляд, стан валасоў, скуры i любыя захворваннi — усё гэта пачынаецца з харчавання.
2. Я нiколi не зайду на кухню... — Калi яна не прыбраная, бо люблю гатаваць у чысцiнi.
3. Мая любiмая страва, што вяртае мяне ўспамiнамi ў дзяцiнства... — Макарона з сасiскай i бананы, якiя мы куплялi некалi зялёнымi i клалi ў тумбачку, каб яны даспявалi. Магчыма, таму я цяпер люблю гатаваць пасту, бо ведаю, што такая страва дае больш карысцi.
4. Перакус, якi парэкамендую... — Садавiна i арэхi. Я люблю, каб перакус быў зручны. Таму i назвала арэхi — гэта найкарыснейшы прадукт для мозга i нервовай сiстэмы. I садавiну, бо 90 працэнтаў людзей не спажывае патрэбную колькасць правiльных вугляводаў i нават не здагадваецца пра тое, а ў вынiку такога недахопу i з'яўляюцца лiшнiя кiлаграмы.
5. Якой цаны не вартая iдэальная знешнасць? — Не трэба дзеля прыгажосцi шкодзiць свайму здароўю. Бо жыць можна як заўгодна, але лепш, калi жывеш з энергiяй, з задавальненнем i якасна.
Алена ДРАПКО
Спасылкі
[1] https://zviazda.by/be/tags/alena-drapko
[2] https://zviazda.by/be/kaleydaskop
[3] https://zviazda.by/be/teletydzen
[4] https://zviazda.by/be/tags/teletydzen