У ганаровай абстаноўцы адбыўся першы рэгулярны рэйс па маршруце Мінск — Мюнхен — Мінск. Яго ажыццявіла ААТ «Авіякампанія „Белавія“». Сярод першых пасажыраў быў і карэспандэнт «Звязды».
На адмысловай прэс-канферэнцыі ў Мінску выступілі генеральны дырэктар авіякампаніі, генеральны дырэктар Нацыянальнага аэропорта, Часовая Павераная ў справах ФРГ Аня Лютэр, прадстаўнікі знешнепалітычнага ведамства, авіяцыйных уладаў і сілавых структур. У Германіі з прывітальным словам выступілі віцэ-прэзідэнт па авіяцыі міжнароднага аэрапорта Мюнхен Андрэас фон Путкамэр і намеснік гендырэктара па маркетынгу і ЗЭД Ігар Чаргінец.
«Адкрыццё рэйса ў Мюнхен стала сапраўды значнай падзеяй, да якой мы рыхтаваліся некалькі гадоў. Авіяцыйныя ўлады Беларусі і Германіі ўвесну дамовіліся пра павелічэнне маршрутаў палётаў для авіяперавозчыкаў дзвюх дзяржаў. Дзякуючы гэтаму рашэнню „Белавія“ здолела дадаць гэты новы напрамак у маршрутную сетку», — адзначыў генеральны дырэктар авіякампаніі «Белавія» Анатоль Гусараў.
Таксама ён дадаў, што Беларусь і Германія стануць бліжэй па ўсіх напрамках: для развіцця бізнес-кантактаў, міжкультурнага дыялогу, умацавання гандлёва-эканамічных узаемаадносін. Для гасцей Беларусі мінскі аэрапорт можа стаць зручным міжнародным портам для палётаў у іншыя краіны.
Палёты будуць ажыццяўляцца чатыры разы на тыдзень: па панядзелках, чацвяргах, пятніцах і нядзелях. Час вылету з Нацыянальнага аэрапорта Мінск — 12:35, прыбыццё — 13:35. У 14:15 самалёт адправіцца назад у сталіцу Беларусі. Прыбыццё запланавана на 17:15. Ва ўсіх выпадках пазначаны мясцовы час. На дадзены момант у галоўным горадзе зямлі Баварыя стрэлкі гадзіннікаў «адстаюць» на адну гадзіну.
Што праўда, сёння ўрачыстасці ў Мюнхене некалькі зацягнуліся, таму адваротны самалёт узляцеў на паўтары гадзіны пазней. Гэта вызвала абурэнне ў некаторых пасажыраў.
Пасажыры будуць вандраваць на самалётах Embraer-195, якія могуць змясціць 76 пасажыраў. Кошт авіяквіткоў у адзін бок стартуе ад 115 еўра, уключаючы таксы і зборы. Пры куплі білетаў туды-назад заплаціць прыйдзецца як мінімум 255 еўра.
Міжнародны аэрапорт Мюнхена стаў чацвёртым аэрапортам «Белавіі» ў нямецкім напрамку. На рэгулярнай аснове нацыянальны авіяперавозчык ажыццяўляе палёты ў Берлін, Франфуркт-на-Майне і Гановер.
Для беларусаў, адзначылі ў авіякампаніі, горад будзе цікавы ўсім, хто хоча наведаць музеі, у тым ліку музей BMW, вывучыць архітэктуру розных стыляў і папрысутнічаць на вядомых па ўсім свеце фестывалях піва.
Дзмітрый СУГАНЯЕЎ
Фота аўтара
Спасылкі
[1] https://zviazda.by/be/author/dzmitryj_suhaniajeu
[2] https://zviazda.by/be/ekanomika
[3] https://zviazda.by/be/transpart
[4] https://zviazda.by/be/tags/myunhen
[5] https://zviazda.by/be/tags/belaviya-1
[6] https://zviazda.by/be/tags/aviyareys