У Мінску выдадзены перакідны каляндар «Адзіныя гістарычныя карэнні Расіі і Беларусі ў перыяд Расійскай імперыі/ 2019».
Дванаццаць месяцаў — дванаццаць старых паштовак. Калі быць дакладным — рэпрадукцый старых паштовак. Усе ілюстрацыі — з калекцыі мінскага збіральніка даўніны лаўрэата Прэміі Прэзідэнта Рэспублікі Беларусь «За духоўнае адраджэнне» Уладзіміра Ліхадзедава. Студзень знаёміць нас з помнікам расійскаму імператару Аляксандру ІІ.
Люты — з Рускай настаўніцкай семінарыяй (раней у гэтым будынку размяшчаўся каталіцкі манастыр і шасцікласнае вучылішча дамініканскага ордэна). Сакавік у календары прадстаўляе Пушкінскую вуліцу ў Брэст-Літоўску. Следам — філакартычныя сустрэчы з красавіком і іншымі месяцамі. Надзвычай цікавае падарожжа!
Калекцыянер Уладзімір Ліхадзедаў у гэтым творчым праекце аб'яднаўся з Пасольствам Расійскай Федэрацыі ў Рэспубліцы Беларусь.
— Гэта не першы мой зварот да расійскай тэматыкі, — расказвае Уладзімір Аляксеевіч. — Дружба нашых народаў на працягу розных гістарычных часін сталася асновай і маіх выставак, і многіх публікацый з выкарыстаннем даўно выдадзеных паштовак, а таксама тэмай маіх кніг і альбомаў у серыі «У пошуках страчанага», што пабачылі свет у розных выдавецтвах Беларусі. Арыгінальнае дызайнерскае рашэнне, цікавае паліграфічнае выкананне ў выпадку з календаром дазваляе выкарыстоўваць рэпрадукцыі як звычайныя паштоўкі, дазваляе адпраўляць іх у вандроўку па розных адрасах.
Ужо сам па сабе каляндар «Адзіныя гістарычныя карэнні Расіі і Беларусі ў перыяд Расійскай імперыі/ 2019» — калекцыйны прадмет, які будзе, несумненна, прыцягваць увагу і па-за межамі 2019 года.
Сяргей ШЫЧКО
Спасылкі
[1] https://zviazda.by/be/author/syargey-shychko
[2] https://zviazda.by/be/gramadstva
[3] https://zviazda.by/be/tags/gistoryya