Карціна беларускага рэжысёра «Хрусталь», якая рэзанансна прагучала ў нашай кінапрасторы ў мінулым годзе, прызнана найлепшым фільмам краін СНД і Балтыі на цырымоніі ўручэння кінапрэміі «Ніка». Лаўрэаты прэміі Расійскай акадэміі кінематаграфічных мастацтваў былі трыццаць другі раз абвешчаны ў Маскве 30 сакавіка.
У сваёй карціне Дар'я Жук паказала Беларусь 1990-х, дзе галоўная гераіня Вэля марыць з'ехаць у ЗША, але з Мінска трапляе ў беларускае мястэчка і захрасае ў рэчаіснасці. Фільм здымаўся ў капрадукцыі Беларусі, Расіі, Германіі і ЗША, а ў выніку стаў сапраўдным беларускім хітом, у тым ліку ў пракаце, што выклікаў шэраг дыскусій як пра сам фільм, так і пра нашы 90-я.
Дзеля вылучэння карціны на саісканне прэміі «Оскар» у намінацыі «Найлепшы фільм на замежнай мове» нават была адноўлена дзейнасць беларускага оскараўскага камітэта, праўда, у шорт-ліст прэміі «Хрусталь» у выніку не трапіў. Затое быў паказаны на дзясятках міжнародных кінафестываляў і забраў некалькі буйных узнагарод, у тым ліку Гран-пры Адэскага міжнароднага кінафестывалю і Гран-пры кінафестывалю ў Алматы.
«Нікай» таксама былі адзначаны Кірыл Сярэбранікаў з фільмам «Лета» (найлепшы рэжысёр), Аляксей Фядорчанка з карцінай «Вайна Ганны» (найлепшы фільм), а прэмію «За гонар і годнасць» гэтым разам атрымаў легендарны грузінскі і савецкі аўтар Атар Іаселіяні.
Ірэна КАЦЯЛОВІЧ
Спасылкі
[1] https://zviazda.by/be/tags/irena-kacyalovich-0
[2] https://zviazda.by/be/kultura
[3] https://zviazda.by/be/kino
[4] https://zviazda.by/be/tags/kino
[5] https://zviazda.by/be/tags/hrustal
[6] https://zviazda.by/be/tags/rezhysyor