Для пераходу да незалежнай атэстацыі ў школах спатрэбіцца некалькі гадоў. Пра гэта заявіў сёння журналістам міністр адукацыі Беларусі Ігар Карпенка, перадае БЕЛТА [1].
Мінадукацыі прапрацоўвае пытанне правядзення незалежнай атэстацыі за курс сярэдняй школы. "Каб укараніць такую сістэму, спатрэбіцца некалькі гадоў. Павінна быць праведзеная сур'ёзная падрыхтоўчая праца, пробы, павінны быць арганізаваны прамежкавыя атэстацыі ў такіх формах. Увядзенне незалежнай атэстацыі не стане нечаканасцю для вучняў і іх бацькоў. Выпускнікам гэтага года не трэба нічога баяцца, атэстацыя будзе праходзіць у ранейшым выглядзе", - сказаў Ігар Карпенка.
Выпускныя экзамены за курс сярэдняй школы прапаноўвалася змяніць яшчэ некалькі гадоў таму. Пры гэтым для выпускнікоў 9-х класаў плануецца ўвесці незалежную атэстацыю, па выніках якой яны змогуць працягнуць навучанне ў гімназіях ці гімназічных класах сярэдніх школ, у звычайных класах, а таксама пайсці па шляху прафтэхадукацыі. Для 11-класнікаў гэта будзе нацыянальны экзамен.
"Выніковая атэстацыя за курс сярэдняй школы павінна адпавядаць па форме і змесце выпрабаванням уступнай кампаніі. Гэта павінна знізіць нагрузку на навучэнцаў і стварыць больш спрыяльныя ўмовы для працы педагогаў. Сёння настаўнік не ведае, ці то яму больш увагі надаваць падрыхтоўцы вучня да атэстацыі ў выглядзе напісання пераказу, ці то ў выглядзе выканання тэста для паступлення ў ВНУ. Гэтыя пытанні цяпер адпрацоўваюцца ў форме эксперыменту. Да яго падключаюцца псіхолагі і педагогі. Яны глядзяць, як лепш выбудаваць гэтую атэстацыю, аналізуюць яе асаблівасці, недахопы. Нечаканасці ў гэтым пытанні не будзе", - запэўніў Ігар Карпенка.
Спасылкі
[1] http://www.belta.by/society/view/minobrazovanija-dlja-perehoda-k-nezavisimoj-attestatsii-v-shkolah-potrebuetsja-neskolko-let-322196-2018/?utm_source=yxnews&utm_medium=desktop
[2] https://zviazda.by/be/tags/agulnaya-syarednyaya-adukacyya
[3] https://zviazda.by/be/tags/igar-karpenka-0
[4] https://zviazda.by/be/tags/vypusknyya-ekzameny