Прэзідэнт Беларусі Аляксандр Лукашэнка 2 мая падпісаў Указ № 150 «Аб рэканструкцыі моста». Дакументам прадугледжваюцца арганізацыйныя меры па забеспячэнні рэканструкцыі моста цераз Прыпяць у Жыткавіцкім раёне, якія дазваляюць завяршыць работы ў 2018 годзе.
Старшыня Жыткавіцкага райвыканкама Віктар Атліванаў нагадвае, што цяпер раён падзелены на дзве часткі:
— Мост для нас стратэгічна важны, бо ў абодва бакі пастаянна трэба весці дастаўку ўгнаенняў, паліва, прадукцыі... За Прыпяццю знаходзіцца Тураўскі малочны камбінат, самае магутнае сельгаспрадпрыемства нашага раёна «Тураўшчына» і фермерская гаспадарка Міхаіла Шруба. Цяпер у дзень праз паромную і пантонную пераправы праходзіць каля дзвюх тысяч аўтамабіляў. Таму пераацаніць неабходнасць тэрміновага будаўніцтва моста проста немагчыма. Пакуль не было паромнай і пантоннай перапраў, Тураўскі камбінат і сельгаспрадпрыемствы неслі вялікія выдаткі — транспартнае плячо аб'езду складала каля 300 км. На сённяшні момант абедзве пераправы працуюць па графіку. Паромная раз у гадзіну — з 6.00 да 20.00. Пантонная — кругласутачна. На жаль, не кожная тэхніка можа скарыстацца пантоннай пераправай. Таму цяжкая пераязджае на пароме, што па часе атрымліваецца даўжэй. З рухам па пантоннай пераправе ўзнікаюць складанасці толькі тады, калі па рацэ праходзяць судны. Сёння, напрыклад, пантонную пераправу разводзілі на дзве гадзіны — праходзіў сухагруз з матэрыяламі для работ на мосце. Людзей пры гэтым апавяшчаем своечасова праз sms і прэсу. Для нас важна, што кіраўнік дзяржавы даў распараджэнне зрабіць мост капітальным, дасканалым, трывалым і зручным. Канешне, усе жыхары Жыткавіцкага раёна чакаюць, калі будзе пабудаваны мост.
Вядома, што генеральнай праектнай арганізацыяй вызначана дзяржаўнае прадпрыемства «Белдзіпрадар», генеральнай падраднай арганізацыяй па выкананні будаўніча-мантажных работ — ААТ «Мастабуд». Прадпрыемства «БЕЛДАРНДІ» стала арганізацыяй, якая здзяйсняе навукова-тэхнічнае суправаджэнне праекта.
Ірына АСТАШКЕВІЧ
Спасылкі
[1] https://zviazda.by/be/tags/iryna-astashkevich
[2] https://zviazda.by/be/ekanomika
[3] https://zviazda.by/be/transpart
[4] https://zviazda.by/be/tags/most
[5] https://zviazda.by/be/tags/zhytkavichy