Лукашэнка павіншаваў мотастралкоў: стойкасць, мужнасць і высокая баявая вывучка воінаў застаюцца нязменнымі

Прэзідэнт Беларусі Аляксандр Лукашэнка павіншаваў ветэранаў-мотастралкоў, ваеннаслужачых механізаваных злучэнняў і воінскіх часцей Узброеных Сіл з прафесійным святам — Днём мотастралкоў, паведамілі ў прэс-службе беларускага лідара.

«Адважная пяхота — „царыца палёў“ — аснова асноў любой арміі. Так было ў мінулыя часы, так застаецца і сёння. Мяняецца тактыка, узбраенне, тэхніка — нязменнымі застаюцца стойкасць, мужнасць і высокая баявая вывучка нашых воінаў», — гаворыцца ў віншаванні.

Кіраўнік дзяржавы адзначыў сімвалізм таго, што вытокі сённяшняга свята цесна звязаны з гісторыяй Вялікай Айчыннай вайны і гераічнымі дзеяннямі 1-й Маскоўскай стралковай дывізіі, якая вызначылася ў баях на беларускай зямлі і атрымала 21 верасня 1941 года найменне «гвардзейская».

У нашы дні новае пакаленне воінаў механізаваных злучэнняў і воінскіх часцей паспяхова асвойвае нялёгкую навуку перамагаць, свята захоўваючы пераможныя традыцыі ветэранаў і эфектыўна вырашаючы самыя складаныя вучэбна-баявыя задачы, канстатаваў беларускі лідар.

«Перакананы, кожны з вас добра разумее, што менавіта майстэрства, прафесіяналізм і патрыятызм салдат і афіцэраў Узброеных Сіл Рэспублікі Беларусь з’яўляюцца лепшымі гарантыямі захавання міру і бяспекі на роднай зямлі. І, калі спатрэбіцца, вы зробіце ўсё, каб адстаяць свабоду і незалежнасць нашай краіны», — падкрэсліў Аляксандр Лукашэнка.

Прэзідэнт пажадаў ветэранам-мотастралкам, ваеннаслужачым механізаваных злучэнняў і воінскіх часцей, а таксама іх блізкім моцнага здароўя, шчасця, дабрабыту і вялікіх поспехаў у справе ўмацавання абараназдольнасці Беларусі.

Прэв’ю: БелТА