Чаго чакаць ад надвор'я ў выхадныя

Калі на працягу ўсяго дня ў чацвер нас турбавалі моцныя дажджы і навальніцы, то ўжо ў суботу зноў стане сонечна і пацяплее, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

Між іншым, у пятніцу яшчэ будзе пахмурна і сыра. У гэты дзень ўмовы надвор’я ў нашай краіне ў асноўным будзе вызначаць вобласць павышанага атмасфернага ціску, толькі ноччу і раніцай па ўсходняй палове адаб’ецца ўплыў франтальнага раздзелу, які ссоўваецца на Смаленскую вобласць Расіі. Чакаецца пераменная воблачнасць. Уначы і раніцай па ўсходняй палове краіны кароткачасовыя дажджы, месцамі навальніцы. Удзень пераважна без ападкаў. Ноччу і раніцай у асобных раёнах слабы туман. Вецер паўночны ўмераны, пры навальніцах парывісты. Тэмпература паветра мінімальная ноччу ад 6 да 12 градусаў, па ўсходняй палове —13—15. Максімальная тэмпература паветра днём усталюецца ад 16 да 22 цяпла. Атмасферны ціск будзе інтэнсіўна расці.

У суботу і ў нядзелю надвор’е ў асноўным будзе вызначаць вобласць павышанага атмасфернага ціску, якая сфарміравалася ў прахалодным паветры. Толькі днём 17 верасня па захадзе краіны адаб’ецца ўплыў няўстойлівай паветранай масы, якая распаўсюдзілася з паўднёвага захаду Еўропы. Таму чакаецца пераменная воблачнасць. У суботу пераважна без ападкаў. Ноччу і раніцай у асобных раёнах слабы туман. Вецер няўстойлівы слабы да ўмеранага. Тэмпература паветра ўначы 2–8 цяпла, па паўднёвым усходзе да 12 градусаў. Днём тэмпература пачне расці, чакаецца ад 17 да 24 цяпла.

У нядзелю пераважна без ападкаў, толькі днём месцамі па захадзе краіны кароткачасовыя дажджы, магчымы навальніцы. Ноччу і раніцай у асобных раёнах слабы туман. Вецер паўднёва-ўсходні, паўднёвы ўмераны, удзень парывісты. Тэмпература паветра ўначы 2–8 градусаў, месцамі, у асноўным па заходняй палове, да 11 цяпла. Днём стане ўжо значна цяплей, калі тэмпература павысіцца ад 20 градусаў па паўночным усходзе да 28 па паўднёвым захадзе краіны.

Сяргей КУРКАЧ