Беларускі асілак Кірыл Шымко зрушыў з месца і працягнуў шматтонны тралейбус з пасажырамі

Беларускі асілак Кірыл Шымко зрушыў з месца і працягнуў шматтонны тралейбус з пасажырамі, перадае БелТА.

Гэта 12-тонны тралейбус «Альгерд» серыі 32100D вытворчасці «БКМ Холдынг» з павялічаным аўтаномным ходам даўжынёй 12,5 м. Значна ўскладнілі задачу асілку пасажыры, якія ўвайшлі ў тралейбус.

Вядомы сілавы атлет, неаднаразовы рэкардсмен Кнігі рэкордаў Гінеса Кірыл Шымко з дапамогай тросаў змог працягнуць тралейбус на 10 м.

«Тралейбус я цягнуў упершыню. Ідэя цікавая, тым больш гэта сучасны, запатрабаваны на гарадскіх маршрутах транспарт. Пастаўленая задача — зрушыць яго з месца — паспяхова выканана. І гэта добрая нагода паказаць усім гасцям выстаўкі, нашай моладзі магчымасці чалавечага арганізма, даказаць, што пры вялікім імкненні нават самыя складаныя мэты дасягальныя, чарговы раз нагадаць аб тым, як важна займацца спортам і весці здаровы лад жыцця», — падзяліўся Кірыл Шымко.

У біяграфіі асілка — мноства рэкордаў. Кірыл Шымко рухаў танкі «Т-26» і «Т-34», пасажырскі самалёт «Боінг-737», чыгуначны састаў з пяці пасажырскіх вагонаў, транспартны самалёт «ІЛ-76», кар’ерны самазвал БЕЛАЗ.

Для новага сілавога рэкорда тралейбус выбраны невыпадкова — сёння ў Мінску праходзіць Дзень электратранспарту, мерапрыемствы якога накіраваны на папулярызацыю транспарту на электрацязе, павелічэнне яго долі ў аўтапарку краіны.

Дзень электратранспарту праходзіць на пляцоўцы каля Нацыянальнай бібліятэкі. Мерапрыемства сабрала шырокае кола ўдзельнікаў: прамысловыя прадпрыемствы, навуковыя арганізацыі, кампаніі — імпарцёры электрамабіляў. На выстаўцы прадстаўлены ўсе віды электратранспарту, у тым ліку папулярныя мадэлі легкавых электрамабіляў і навінкі рынку, новыя мадэлі беларускіх электробусаў і электрагрузавікоў. На выстаўцы таксама прадстаўлены электраматацыклы і электравеласіпеды айчыннай вытворчасці. У праграме мерапрыемства — тэст-драйвы электрамабіляў, інтэрактыўныя пляцоўкі, конкурсы і розыгрышы.

Арганізатарам Дня электратранспарту выступае Міністэрства энергетыкі сумесна з ВА «Беларуснафта» пры падтрымцы Мінгарвыканкама.

Прэв’ю: БелТА