Вы тут

Абагульніць міжнародны вопыт і паказаць развіццё айчыннай навукі


Наша краіна адкрыта для супрацоўніцтва з усімі краінамі — удзельніцамі выстаўкі «Белагра-2023», заявіў намеснік прэм'ер-міністра Леанід Заяц падчас старту Беларускага аграпрамысловага тыдня.


«Мы сапраўды ганарымся тым, што ўжо ў 33-і раз арганізоўваем выстаўку «Белагра». Тут мы абагульняем міжнародны вопыт у сферы сельскагаспадарчага машынабудавання. Акрамя таго, дэманструем развіццё навукі ў Беларусі і нашы дасягненні ў харчовай прамысловасці. Падкрэслю, што мы адкрытыя для супрацоўніцтва з усімі краінамі, якія ўдзельнічаюць у гэтай выстаўцы», — сказаў Леанід Заяц.

Ён нагадаў, што першая выстаўка «Белагра» праводзілася ў 1990 годзе. «Тады ў нас не было асаблівых падстаў для гонару, а сёння наша краіна набыла зусім іншы статус. Цяпер на нашу выстаўку з'язджаецца паўкантынента. Нягледзячы на санкцыі, да нас прыязджаюць прадстаўнікі краін ЕС. Пры гэтым наша краіна дэманструе выдатныя дасягненні ў аграпрамысловым і нафтахімічным комплексах. Беларуская навука таксама ідзе ў нагу з часам, забяспечваючы нас новымі насеннем і тэхналогіямі», — заявіў віцэ-прэм'ер.

Як адзначылі ў Мінсельгасхарчы, Беларусь мае самазабеспячэнне па малочнай галіне на 263 %, а па мясной — на 134,9 %. Каментуючы гэтыя лічбы, Леанід Заяц дадаў, што па выніках работы за 4 месяцы 2023 года экспарт беларускай сельскагаспадарчай сыравіны і харчавання склаў 2,7 мільярда долараў.

Віцэ-прэм'ер адзначыў, што Беларусь цалкам забяспечыла сваю харчовую бяспеку і паспяхова прадае лішкі за мяжу. «Рэкордным у плане паставак для нас быў мінулы год. Тады рост экспарту сельскагаспадарчай сыравіны і харчавання склаў 124 %, або 1,6 мільярда долараў. Сёлета па выніках работы за 4 месяцы мы прыплюсавалі 11,2 % да аналагічнага ўзроўню мінулага года. Гэта сведчыць аб тым, што нашу прадукцыю паважаюць і плацяць за яе немалыя грошы», — падкрэсліў Леанід Заяц.

Паводле яго слоў, такія вынікі сталі магчымыя дзякуючы таму, што 15 гадоў назад у тэхнічнае і тэхналагічнае пераўзбраенне прадпрыемстваў Беларусі былі ўкладзены вялікія сродкі.

«Адзначу, што гэта не мяжа, бо намі яшчэ не да канца вывучаны рынкі Афрыкі. Таксама можна больш актыўна працаваць з Кітаем. Да таго ж мы развіваем супрацоўніцтва з Расіяй, у прыватнасці па імпартазамяшчэнні. Мы захавалі якасць нашай прадукцыі, таму яна карыстаецца вялікім попытам за мяжой», — заявіў намеснік прэм'ер-міністра. Ён таксама дадаў, што кіраўнік дзяржавы ставіць задачу перад галіной сельскай гаспадаркі давесці экспарт да 10 мільярдаў долараў за год.

Асобна спыніўся Леанід Заяц на забеспячэнні ўнутранага рынку ранняй зелянінай і іншай вітамінавай прадукцыяй. У папярэднія гады мы закуплялі гэтую прадукцыю ў заходніх краінах. У далейшым гэтага не павінна быць, лічыць віцэ-прэм'ер. «У міжсезонны перыяд 2023/2024 года нашы спажыўцы будуць есці выключна беларускія свежыя агуркі. Прымаюцца ўсе неабходныя меры таксама і па забеспячэнні таматамі, спадзяёмся да 2027/2028 года канчаткова вырашыць гэтую задачу», — падсумаваў Леанід Заяц.

А ў той жа час міністр сельскай гаспадаркі і харчавання Ігар Брыла заявіў, што дадзеная выстаўка — гэта дэманстрацыя ўсіх тэхналагічных магчымасцяў, якія ёсць у Беларусі. «Нам не сорамна паказаць айчынныя тэхналогіі ў вытворчасці трактарнага і машыннага парка, а таксама тэхналогіі ў вытворчасці прычапной тэхнікі. Сёння мы выстаўляем высокапрадукцыйных жывёл, праводзім конкурсы, у прыватнасці, выбіраем найлепшую малочную карову краіны. Таксама на выстаўцы прадстаўлены тэхналогіі вытворчасці даільнага абсталявання і іншыя аспекты, якія ахопліваюць АПК», — сказаў Ігар Брыла.

Ён адзначыў, што «Белагра» добра ведаюць ва ўсім свеце, і кожны год выстаўку наведвае ўсё больш кампаній. «Тут прадстаўлена каля 450 кампаній — для нас гэта вялікі крок, асабліва ў параўнанні з мінулым годам. Прысутнічаюць каля 16 дэлегацый з розных краін. Дастаткова актыўна ўдзельнічае Расійская Федэрацыя, ад якой прадстаўлена 14 стэндаў з розных рэгіёнаў гэтай вялікай дзяржавы. Упэўнены: у нас атрымаецца добры і прадукцыйны дыялог з усімі ўдзельнікамі», — падкрэсліў міністр.

На адкрыцці выстаўкі ў якасці ганаровага госця быў намеснік міністра сельскай гаспадаркі Расійскай Федэрацыі Іван Лебедзеў. Ён адзначыў, што паміж Беларуссю і Расіяй сфарміравана правільная партнёрская палітыка. «Пра гэта гавораць лічбы ўзаемнага гандлю. Так, у 2022 годзе дасягнуты рэкордныя паказчыкі па колькасці прадукцыі, якая пастаўляецца, і грашовым эквіваленце. Мы ўжо фіксуем дынаміку і рост, таму ў цэлым па годзе чакаем добрых паказчыкаў. Так, за першы квартал гэтага года прырост па ўзаемным гандлі паміж Беларуссю і Расіяй у галіне сельскай гаспадаркі склаў 25 % у адносінах да аналагічнага перыяду мінулага года. Мы працуем і глядзім на ўсе напрамкі сумесна. Упэўнены, разам дасягнём яшчэ большых вынікаў», — сказаў Іван Лебедзеў.

Выстаўка арганізавана ў ходзе правядзення Беларускага аграпрамысловага тыдня з 6 да 11 чэрвеня ў выставачным цэнтры індустрыяльнага парка «Вялікі камень». Гэты аграрны форум знаёміць усіх удзельнікаў з перадавымі напрамкамі ў развіцці раслінаводства, жывёлагадоўлі, птушкагадоўлі і з сучаснымі тэхналогіямі перапрацоўкі. Аграпрамысловы тыдзень уключае не толькі «Белагра-2023», але і выстаўкі «Белферма», «Белпрадукт» і «Харчовая індустрыя».

Аграрны форум традыцыйна збірае разам не толькі беларускіх аграрыяў і работнікаў харчовай і перапрацоўчай прамысловасці, але і іх замежных калег і партнёраў. Сёлета ўдзел бяруць сотні кампаній з Беларусі, Расіі, Кітая, Пакістана, Турцыі, В'етнама, Германіі, Італіі, Індыі, Палесціны. Таксама выстаўку наведаюць дэлегацыі краін далёкага замежжа, сярод якіх Зімбабвэ, Егіпет, Іран, Кенія, Куба, Манголія, Сірыя, Уганда, ПАР.

Калектыўныя экспазіцыі сфарміравалі Міністэрства сельскай гаспадаркі і харчавання Беларусі, Міністэрства прамысловасці, Нацыянальная акадэмія навук, канцэрн «Белдзяржхарчпрам», «Белкаапсаюз», а таксама ўсе вобласці Беларусі.

Штогод «Белагра» становіцца адной з галоўных пляцовак для дзелавых перагавораў. Шырокае кола пытанняў па забеспячэнні канкурэнтаздольнасці сельгаспрадукцыі, выкарыстанні зямельных рэсурсаў з пункту гледжання экалагічнай і эканамічнай эфектыўнасці, перспектывы супрацоўніцтва Беларусі з краінамі блізкага і далёкага замежжа ў сферы вытворчасці інавацыйных тэхналогій у галіне сельскай гаспадаркі, а таксама іншыя актуальныя пытанні можна будзе абмеркаваць у ходзе тэматычных канферэнцый і семінараў.

Міжнародная спецыялізаваная выстаўка адкрыта для свабоднага наведвання з 10.00 да 18.00 да нядзелі ўключна. З Мінска да месца правядзення мерапрыемства арганізаваны бясплатныя транспартныя маршруты ад станцыі метро «Магілёўская».

Сяргей КУРКАЧ

Фота Віктара ІВАНЧЫКАВА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».